الأحد، 7 أكتوبر 2012

حب عبر الأسلاك


 حب عبر الأسلاك
رواية الكترونية لصديقة التدوين الجميلة وصف الاحساس 
وصاحبة الحلول الرائعة لاكتئاب العفريتة النكدية أم سحلول وحل مشكلتها النفساوية بمساعدة أم خليل  ( أينعم هم جم يكحلوها قاموا عموها وزودا اكتئاب البنية  ، وأينعم وصف دلوقتى فى القائمة السودة مع أحمد وضياء ومحمد جمال كمان يالا بقى .. وان شاء الله مش هيسلموا من ميرو الشريرة ..
 بس برده تشكر على المحاولة وان شاء الله نردهالها فى جوازة سناء المعنسة وخليل الرخم ده )

حب عبر الأسلاك
رواية الكترونية ل  Hanoda Moody
ده أول اسم أكتشفه لوصف الاحساس
ايمان زيتون ده الاسم التانى اللى مكتوب على الرواية  

 بقلكم ايه محدش يتلخبط .. عادى يعنى أنا ليا كذا اسم .. وانسوا خااااالص انكم تعرفوهم 

...................................



نسيب الهزار بقى ونتكلم جد شوية

 مبرووووك يا ايمان على الاصدار الالكترونى ( حب عبر الأسلاك ).. خطوة جميلة جدا  .. وان شاء الله هيحقق نجاح عظيم  وتتحول لرواية ورقية لأنها بجد تستاهل
 الصراحة أنا حملت الرواية وفتحتها لقيتها 100 صفحة .. اتفاجأت ان الصفح كتير .. فقررت انى هقرأ جزأ ومرة تانية أكمل .. وده مش كسل .. بس لأنى مش كنت فاضية
وبدأت أقرأ وصلت لربعها ومش قادرة أوقف .. قلت أكمل شوية كمان وشوية وشوية لحد ما خلصتها

الرواية رائعة جدااااااااااا
الاسم حلو أووى ومعبر جدا
أسماء الأبطال ( ندى وعمر ) .. أسماء هادية وجميلة أوووى 
الحواربينهم  لذيذ وخفيف .. مش ممل خااالص
وفكر حلوة أوى اللهجة اللبنانية فيها .. وما شاء الله عليكى عرفتى تتكلميها كويس
قدرتى من خلال الرواية تنتقدى الواقع وتوصفى مشاعر أبطال مشاكله الاجتماعية ( المطلقة ونظرة المجتمع ليها .. ، الحياة الزوجية وعدم التعاون فيها .. ، تربية الأولاد وليه بيطلعوا قريبين من أمهم أكتر من أبوهم .. وعجبنى تفسيرك لكلمة ( ابن أمه ) .. دايما لما بنسمعها بنقول على صاحبها معندوش شخصية ومامته مسيطرة بس انتى وضحتيها بطريقة تانية عجبتنى أووى .. )
الخواطر اللى كانت فى الرواية حلوة جدا جدا .. الاحساس فيها عالى جدااا
الرومانسية اللى فى الرواية لذيذة ونقية جدا .. مش مبتذلة
الرواية مش خيالية .. يعنى ممكن تتحقق فى الواقع

 في جمل على لسان أبطال الرواية ( عمر وندى ) عجبتنى أوى وحسيتها زى مثلا



( وفى قلبها شىء يتحرك ناحية عمر تخاف أن تفقده وتخاف أن تؤكده ) 

( بالنسبة لعمر أصبحت ندى حياته وبالنسبة لندى أصبحت تحب وجود عمر)

(لا تقل لى أحبك
انت عندى أغلى من الدنيا كلها .. حتى أغلى عليا من نفسى .. وما أقدرش أتحمل لحظة انى أشوفك تعبان بسببى)
(مرت الأيام سعيدة وبدأت حياة جديدة فى قلب كل منهما
هو اللى بيحب حد مش بيدور على أى حاجة تسعده ويعملهاله )

وأحلى حاجة حسيتها فى الرواية هو قدرة الحب على شفاء الجروح وبث الحياة بداخل القلوب من جديد

أحلى حاجة فى الحب انه يكون كالمعجزة التى تعيدك الى الحياة ..
فكم هو رائع أن تحبنى  !!
ولكن الأروع أن يكون حبك قادر على شفاء جروحى .. ولكن ان لم يكن لديك القدرة أو أن حبك سيزيد جروحى .. ابتعد

عمر قدر يشفى جروح ندى .. ولأنه كان متأكد انه هيقدر يخفف وجعها بحبه .. حاول بكل الطرق انه يحسسها بالأمان .. صبر عليها واستحمل ترددها وخوفها من تكرار التجربة ودور على اللى بيسعدها وعمله 

والحمد لله النهاية كانت سعيدة
اتجوز عمر وندى وخلفوا عبد الرحمن .. وتوتة توتة .. خلصت الحدوتة

ممكن تحملوا الرواية من هنا 

حب عبر الأسلاك لــ ايمان الزيتون

نصيحة 
لما تخلصوا الرواية ابقوا ارجعوا اقرأوا الاهداء والمقدمة تانى .. الاحساس مختلف


 


هناك 6 تعليقات:

  1. ميرووو .. الف شكر يا قمر علي كﻻمك الجميل
    انتي وصفتي الروايه بشكل فعلا جميل
    اﻻ قوليلي .. ام سحلول اخبارها ايه .. اكيد قلبت عليها المواجع
    ربنا يخليكي يا قمر
    تحياتي ليكي وﻻم سحلول

    ردحذف

  2. مواجع ايه !!
    أم سحلول اتغيرت خااااالص
    دية مش فاكر أيتها حاجة وخاصة المتيم العاشق الولهان اللى اتكعبل على عينه وحبها الشاب المأسوف على شبابه المدعو أحمد أحمد صالح
    فلسعته يا أختى
    ياعينى عليه من وقتها وهو عمال يكتلها فى قصائد وهى ولا معبراه .. ربنا يكون فى عونه بقى
    ....
    تسلمى يا ايمان
    مفيش داعى للشكر
    احنا اللى لازم نشكرك على كلماتك واحساسك الجميل
    يارب بالتوفيق والنجاح دايما ان شاء الله

    ردحذف
  3. الأول كدة قبل ما انسى موضوع الأسماء ده بيفكرني بجدي وطريقته في تسمية اولاده،يعني كان يكتب الواحد منهم بإسم ويندهوه في البيت بإسم تاني خالص، يعني مثلا عمي عرفة إسمه أبوالفتوح،وعمي شحاتة إسمه عبدالسلام،أما خالد إبن عمي-لأن هو اللي سماه- فإسمه أشرف !!
    ههههههههههههههههه..والله بجد!
    ..
    وطبعا لأني ذكي وعارفك بتجيبي سيرة الحبيبة أم سحلول عشان تجري رجليا وتخليني أهلفط بالكلام..عشان كدة هاطلع أخبث منك وهأسكت المرة دي!
    ..
    أنا شفت الرواية وتصفحتها على السريع،وإن شاء الله هاخلصها قريب،مشكلتي إني بس من النوع القديم فبلاقي صعوبة شوية في موضوع القراءة الأليكترونية!
    ويارب دايما بالتوفيق والنجاح والتألق لوصف أو لإيمان،وليكي يا ميروووو أو يا مروة!

    ردحذف
  4. رواية شيقة باين من اسمها ألف مبروك

    ردحذف
  5. مبرووووووووووووك يا وصف وقولي لإيمان ولهندوة مبروك برضه

    إن شاء الله هقرأ الرواية .. والصراحة مروة شوقتنا ليها وعملتلك تقديم جامد

    بالتوفيق دايما

    ردحذف
  6. نفس اسمي انا وحبيبي وكمان حب عبر الأسلاك هو في بلد وانا في بلد بعييييدن عن بعض

    ردحذف