صرخة جيل

عزيزى القارىء

أنا مصطفى  خريج كلية اعلام قسم صحافة .. ودلوقتى أنا  فى مرحلة تدريب لمدة ستة شهور .. ادعولى انهم يخلصوا بسرعة علشان أنا اتخنقت ومش حابب أصلا مهنة الصحافة دية

أكيد شخص خفيف هيسألنى :

طب ودخلتها ليه ؟

هقوله – أصلها مش محتاجة نباهة على فكر ة - أهلى الله يسامحهم بقى  .. علشان جبت مجموع كبير فى الثانوية العامة .. أصروا انى أدخل كلية من كليات القمة مع انى كان نفسى أدخل كلية أداب قسم علم نفس علشان بحب أفتش وأبحث وأفهم نفسيات البشر المتقلبة

وعلشان أرضيهم مصيت نص لمونة وعصرت بقيتها على نفسى ( أه يا ماما بصراحة كده أنا اللى أخدت اللمونة اللى كنتى هتعصريها على السلطة وسبتك تتهمى بابا فيها .. فى الأول كنت فرحان لأنى عملت حاجة طلعت حبة من الكبت اللى جوه وبعدين ندمت شوية – بس مش كتير – لما اتخانقتوا  .. معلشى بقى بس على فكرة انتوا السبب   )    المهم بعد ما خبيت أثار اللمونة - فى الحتة اللى كنت برمى فيها بقية اللبن اللى أمى كانت بتشربهولى بالعافية وأنا صغير -  دخلت كلية اعلام واكتفيت انى أفتش فى نفسيتى أنا .. وبصراحة مش وصلت لحاجة لحد دلوقتى ..

 عارف هتقولوا علشان انت فاشل .. مش مهم .. ما أنا برده شايف كده

أكيد دلوقتى شخص أخف من الشخص اللى فات هيسألنى 
ليه سميت التحقيق الصحفى  ده ( صرخة جيل ) ؟

برده هجاوبه  ، بس على فكرة دية بقى محتاجة نباهة ومش أى حد هيعرف يجوابك ،

بص يا سيدى .. أصل احنا – الشباب يعنى - عمالين نتكلم ونصرخ – طبعا جوانا بس – ومحدش سمعنا أو فهمنا .. قلت يمكن تكون ودانهم مسدودة .. وقعدت أفكر أفكر والأخر طلعت بفكيرة حلوة .. قلت أجمع الصرخات المكتومة دية وأحررها وأطلقها زى المدفع مرة واحدة .. يمكن يحصل الشفا وتجيب نتيجة وودانهم تتسلك ويسمعونا وكمان قلوبهم تلين ويحسوا بينا شوية

أكيد شخص ألذ وأخف من اخواته اللى قبل كده هيسألنى ، هما مين ؟

هصوت وأقول آآآآآآآآه منكم جيل متسرع ، وبعد الصويت ههدى أعصابى - بس مش عارف ازاى- وأقوله  أصبر يا خفيف وانت تعرف ده لو مش اطردت وأنا لسه فى مرحلة التدريب  

المهم بما انى  ضيعت 4 سنين من عمرى فى الكلية اللى مش حاببها دية ووصلت لمرحلة تدريب ،

 ففى الجريدة الله يسامحهم كلفونى انى أعمل لقاء أو تحقيق عن أى حاجة ولأنى شخصية خجولة جدا ومش بحب الاختلاط مع الناس ومجرد فكرة انى أعمل حوار مع شخصية بتخلى وشى يجيب ألوان لأنى أكيد هتهته وهنسى كل الكلام والأسئلة اللى هحضرها للحوار وهيبقى منظرى تحفه

فعلشان كده ومنعا للاحراج قررت أعمل حوار مع أصحابى لأنى معاهم هما بس بكون على طبيعتى وبنسى الخوف والقلق

المهم  بعد الرغى ده هطلب منكم طلب تانى غير الدعاء - ليا مش عليا - لو لقيتوا حبة أخطاء املائية أو جمل مش متركبة على بعض أو فصلة مش فى مكانها أو .... ،  بلاش تحبطونى وتهاجمونى وأنا لسه فى أول الطريق لأنى بصراحة فاشل فى كتابة أو صياغة أى تحقيق أو خبر حتى لو كان صغير ، يعنى من الأخر  خلونى أتدرب  فيكم شوية  لما أشوف أخرتها ،  مش يمكن أفلح وأبقى صحفى مشهور .. بصراحة نفسى أوى البلية تلعب معايا  ، بغض النظر انى مش فاهم يعنى ايه البلية تلعب معايا ؟! ، بس أهو تلعب معايا زى ما تلعب مع الناس كلها ، اشمعنى أنا يعنى ؟!  ، وصدقونى وقتها – من غير حلفان علشان أنا أصلا كمان فاشل فى الكدب - أوعدكم انى مش هعبر ولا واحد فيكم  

هنبدأ مع حكاية ( الفوتوكوبى )
أحمد شاب هادى جدا ومسالم أوى ودايما فى حاله ومش بيحب المشاكل ، ودايما حاطط ايده على خده كأنه عنده أورطة عيال ومش لاقى يأكلهم 

مصطفى :

مالك يا عم شايل ضاجن ستك ليه ؟

أحمد :

بس والنبى يا درش ..  سبنى فى حالى  ، أنا مش فايقلك خاااااااالص

مصطفى :

 فى ايه بس يا ميدو .. ما كلنا فى الهوا سوا .. قلى بس زعلان ليه ؟!

أحمد :

اتخانقت مع أبويا

مصطفى :

وايه الجديد يعنى ما انت دايما بتتخانق معاه ؟

أحمد :

زهقت وحاسس انى هتجنن .. مش قادر ينسى انى خيبتله أمله ومدخلتش كلية الهندسة

طب وأنا ذنبى ايه ؟ ، الله يسامح التنسيق بقى كان وعدنى وخلى بيا !

وهو من وقت ما عرف انى مش هينفع أدخل كلية الهندسة وهو مسكنى تقطيم

( ما أنا كنت كل شوية بقلك روح ذاكر ، انت لو كنت شديت حيلك كان زمانك دخلت كلية الهندسة وبقيت مهندس زيى و ....... )

غلبت أفهمه ان ربنا خلقنى كده ..  قدرتى على الاستيعاب محدودة  .. ومع ذلك  حاولت أضغط على نفسى علشان أجيب مجموع عالى وأدخل كليه الهندسة وأرضيه  .. بس فشلت ومعرفتش

دلوقتى أنا أعمل ايه علشان أرضيه  ؟ أموت نفسى يعنى  ؟

عزيزى القارىء بجد أنا صعبان عليا احمد جداااااااااا ،  والده العزيز عايزه يبقى فوتو كوبى منه ، مش عارف ليه ؟!

مش يمكن هو مش شد حيله بمزاجه علشان عايز يطلع سباك مثلا ؟

وبينى وبينكم كده بصراحة عنده حق .. السباكين دلوقتى بيكسبوا جامد أوووووى ..

 ولو سمحتم بلاش تسييييح وخلوا الفولة تتبل شوية علشان لو والد أحمد سمع حاجة عن موضوع السباك ده .. هيطخنى أنا وأحمد بالنار واحتمال – لأ ده أكيد – تتاخدوا فى الرجلين وينوبكم من الحب جانب

المهم بعد أن أقنعت أحمد بعدم الانتحار  .. أقنعته برده انه  يروح بيتهم علشان يسمع وصلة التأنيب بدرى أحسن  وبعدين يتكبت وينام .. أصل الكبت بدرى مفيد جدا والنوم بعده ياسلام روووووعة  .. بصراحة لازم تجربوا علشان تصدقوا، وأكيد أكيد هتدعولى

...................

انتظروا بقية التحقيق الصحفى ( صرخة جيل )

وعلى فكرة بقى انتوا تستاهلوا لأنى قلتلكم تدعولى ان ربنا يهدينى وأبطل جنان فى رمضان 

بس من الواضح كده انكم بتعملوا حاجة من أربعة .. 

أول حاجة انكم أول ما الأذان يأذن وتشوفوا الأكل فطبعا أكيد أكيد بتنسوا أختكم الغلبانة 
أم سحلول :
 أيوه يا ميرو عندك حق .. قدام الأكل مش بيعرفوا حد
 بصراحة عيب تفضلوا الأكل على ميرو .. دى برده زى أختكم الصغيرة أو الكبيرة .. مش فارقة يعنى 

والحاجة التانية انكم   بتدعوا بسرعة ومش بضمير 
 أم سحلول :
أيوه يا ميرو عندك حق  .. أنا بشوفهم بعينى الاتنين دوول اللى هياكلهم الدود دووول ..مش هخبى عليكى وهحكيلك كل حاجة بس طلعينى من البرميل

والحاجة التالتة  ان أكيد  أم أسحلول  عمالة تدعى عليا وهى فى البرميل وانتوا عمالين تاكلوا وتقولوا ( آميييييييين )
أم سحلول :
أنا يا ميرو .. ده حتى انتى سكر وعلى طووووول بدعيلك 
 
هو المفروض يبقى فيه حاجة رابعة ، بس مش عارفة ايه هى ؟
من الواضح كده  ان أختكم فصلت وصواميل مخها فكت على الأخر