السبت، 7 ديسمبر، 2013

دعوة للرقى (2)

- احنا ليه بنحط توقعات توجعنا لما مش تحصل ؟! غاويين وجع !
 افرض الشخص اللى انت حاطط عليه توقعات معينة.. طبيعته مختلفة عنك .. مثلا بيهتم وبيحب بطريقة مختلفة عن الطريقة اللى ترضيك .. أو مش بيعرف يحب ولا يهتم خالص .. عادى .. هو مالوش ذنب انك مش قدرت تتقبل طبيعته وطالبته بتوقعات هو مش أدها
حاول تتقبله كـ شخص لذيذ موجود فى حياتك .. تقبله كـ انسان - ليه مميزات وعيوب زيك بالظبط - .. وبلاش تحطه فى تصنيفات - صديق ، حبيب ، أخ ، .. - وتطالبه يأدى الدور زى ما انت كاتبه بالظبط للشخص ده فى حياتك

- وليه بندور على مبررات تبوظ وتعقد العلاقات بينا أكتر ما هى معقدة ؟!
هتغير حاجة حصلت مثلا .. متهيألى الفعل وقع وانتهى .. ومفيش أى مبررات هترجع الزمن لورا وتخلى الفعل ميحصلش.. بس ممكن كلمة بسيطة ، احساس صادق يغير كتييير
فـ لما تحس انك ندمان على حاجة عملتها .. بلاش تبرر لنفسك ولغيرك .. بس قول بـ صدق " أنا أسف " واوعد نفسك قبله انك هتحاول بجد ميتكررش غلطك معاه تانى .. وخاف انك تخلف وعدك مع نفسك .. خاف وجعه يوجعك

ولما تحس بــ مشاعر حلوة ناحية حد - اعجاب ، امتنان ، اشتياق ، خوف عليه ، اهتمام ... - ليه بردوا بتدور على مبررات للاحساس ده ؟!
 عبر عن احساسك ببساطة ومن غير كلاكيع .. اعمله مفاجأة ، خد بعضك و روحله ، أو كلمه واسمع صوته.. أو حتى رسالة اكتبله فيها كلمة واحدة " وحشتنى ، شكرا ، انت رائع ، استمر ، ربنا يوفقك ، .. " .. وبلاش تنتظر أو تطالبه انه يرد عليك بإحساس مماثل .. بلاش تربط احساسك بشروط أو مقابل أو توقع .. ممكن يكون مبيعرفش يعبر زيك ، أو يتخض من مشاعرك .. أه والله بتحصل فى أحسن العائلات.. فيه ناس عندها فوبيا من المشاعر غير المبررة أو حتى المبررة - زيى كده ، الموضوع ده عايز تدوينة لوحده - ، وممكن ميكونش حاسس نفس احساسك أو مش حسك .. مش حاسس بخوفك ولا اهتمامك ولا سؤالك ولا....- ممكن يكون عنده مشكلة فى أجهزة الاستقبال مثلا - زيى بردوا - المهم ان كل ده مش هيقلل أبدا من روعة وصدق وتأثير احساسك جواك وجواه .. فـ متعملهاش مشكلة وتقرر بينك وبين نفسك انك مش هتعبره تانى .. بلاش تقتل احساس جميل وراقى جواك

..
- نيجى بقى لـ سوء الظن واطلاق الأحكام
واحد - منعرفهوش- بيكلم واحدة - بردوا منعرفهاش - فى مكان أو مناسبة - فرح ، كافيتريا ، أى تجمع ، حتى لو الفيسبوك -
الحكم :
1)
" شايف الواد ( الحشاش ) ابن ( اللذين ) - اللى كفروا ولا اللى أمنوا - ( شأط ) - دورت فى جوجل على معنى ومش لاقية بس هى بتتقال كده - ( المزة ) - بحسها شتيمة بس بقت أكتر كلمة مشهورة فى التعبير عن الجمال - "
2)
تفتكر بيقولها ايه وهو بيتنحنح كده .. أكيد أكيد كلام ( قبيح فشخ )  أه يا بنت (الجذمة ) مادام لابسة ( محزق وملزق ) يبقى أكيد بتموتى فى الكلام القبيح .. وأكيد لو رحنا نصحناكى هتردى بـ ( وانت مال أهلك ) - اتكتبت خلاص - بس لازم أعمل اللى عليا وأرفع المنكر ده .. أقلك هروح أنصحهم بعد لما تضحك ( ضحكة خليعة ) ..  كده أبقى جبت أخرى ومحدش يقدر يعترض ولا يومنى خصوصا بـ عريها وفجرها ده

ده مثال صغير أوى على سوء الظن واطلاق الأحكام ..
 نفسى أعرف " ليه " ؟! ليه بنكون مشغولين أوى بغيرنا ؟! ليه بقت نفوسنا مريضة أوى كده ؟! ليه عادى أوى سيرة الناس وأحوالهم بقت زى اللبانة فى بقنا ؟ !ليه بنحاول ندعى المثالية والفضيلة واحنا جوانا خراب ؟!  ليه مش بنحاول نصلح جوانا المريض قبل ما بنحكم على أى انسان مهما كان هو ايه ؟! لحد امتى هنعمل ميزان على هوانا ؟! بنتبرأ من الحاجة فى العلن بس بنعملها فى الخفاء ، نختلق لنفسنا أعذار وغيرنا لأ ، بنحاسب نفسنا برحمة وغيرنا بقسوة ، احنا دايما صح وغيرا غلط ، اللى مش معاك يبقى عدو ! احتمال تنجح وتقدر تقنع غيرك بأنك النموذج المثالى اللى هيقدر ينقذ البشرية من ضلالها بس مش هتقدر تقنع نفسك .. لأن ببساطة " شخصيتك  الحقيقية " هى اللى انت تعرفه عن نفسك مش اللى يعرفه الناس عنك ..
فـ لما تحس ان نفسك المريضة بدأت تتابع الناس .. وقفها وحاسبها ودايما تابعها .. واتأكد ان مش كل حاجة انت بتشوفها وتفهمها وتحسها بتكون هى الحقيقة أو الصح .. فيه تفاصيل كتييييييير بتكون غايبة عنك .. فـ بلاش أحكام وسوء ظن .. وخليك فى نفسك


..
ياريت
بلاش مبررات مش هتغير ، بلاش توقعات ، بلاش سوء ظن ، بلاش أسئلة كتيييير ملهاش اجابات أو اجاباتها مش هترضينا ، بلاش نكون زى الأطفال متطلبين مرهقين ودايما مش صبورين ..
وياريت نقتنع ان كل واحد فيه اللى مكفيه .. فـ بلاش نحمل بعض أعباء احنا فى غنى عنها .. وزى ما بيقولوا " خليك بسيط تتبسط "
صباحكم بساطة


..........



- أسفة جدا على شوية الألفاظ اللى فى الآخر " حشاش ، شأط ، مزة ، ........ " والصراحة أنا قاصدة
الحكاية انى ظبطت نفسى متلبسة بترديد شوية ألفاظ عجيبة وأنا مش فاهمة معناها أوى..  بقيت عاملة زى الطفل اللى بيلقط أى كلمة ويرددها من غير ما يفهمها ولا يعرف اذا كانت صح ولا لأ
طبعا دلوقتى هيطلعلى واحد لذيذ ويقولى ما هو الواقع اللى كده .. قتل وخراب .. انتى مش عايشة فى الدنيا ولا ايه !
الصراحة أه حقيقى أنا مغيبة عن العالم الخارجى .. وفى القوقعة اللى أنا عايشة فيها .. محدش بينطق الألفاظ دى قدامى .. احتمال أبويا وأمى يكونوا عارفيناها بس مش بيرددوها قدامنا - مع ان أبويا اتصدم لما قولت لـ أخويا اعمل دماغ نسكافيه وقعد يحقق معايا ومصمم يعرف أنا جبتها منين - فـ ياريت يعنى بلاش تعملى تلوث سمعى وبصرى بألفاظ ومفردات صعب انى عقلى يستوعبها أو يتقبلها  .. طبعا ده مش مبرر كفاية لـ حضرتك انك تعمل كنترول على لسانك
طب هكلمك بطريقة ممكن تأثر فيك شوية .. انت عارف انك لما تملى قاموس مفرداتى بألفاظ غير موثوقة التأثير .. احتمال نفسوياتى - الشريرة والعدوانية والقاسية والمجنونة - يدمنوها .. وأفضل أرددها زى البغبغان .. وأبويا يتصدم فيا أكتر وأكتر .. ويحس انى مش بنته ..واحتمال يهرب من البيت.. وأتشرد أنا والعيال اخواتى .. مش حرام عليك .. معندكش عيال :'(
عارفة .. ولا هتتأثر بردوا .. طب على فكرة بقى نفسويتى المريضة المتناقضة بتحذرك انك هـ تاخد ذنبك وذنبى وذنب غيرنا وغيرنا .. وربنا هيحاسبك .. واحتمال - لأ اكيد بعد كل الذنوب دى- تخش النار .. وأنا هكون فى الجنة وأطلعك لسانى كده :P

-على فكرة الرغى ده كله مش نصايح ولا تقييم ولا توجيه لأى حد .. ده عبارة عن فضفضة بينى وبين نفسوياتى ، خناقة بين ميرو الطيبة والعاقلة والحنونة والرحيمة والهادية............... وبين ميرو الشريرة والمجنونة والقاسية والعدوانية والشعنونة .. فـ أنتوا ممكن بردوا تسيبوا نفسوياتكم يتخانقوا مع بعض عشان النفوس تصفىوتهدى وان شاء الله مش هتكون فيه خساير كتير
..

هناك تعليقان (2):

  1. في الواقع -ويمكن دي نفس فكرتك يا مروة بس بصورة تانية- المشاعر سفسطة، لذلك بثها أو التعبير عنها أو التعامل معاها بمنطق أعتقده شئ صعب جداً!
    يعني صعب مع المشاعر أو الأحاسيس نُكوّن معادلة ليها مُدْخَلات معينة ونتوقع ليها مُخْرَجَات بعينها. لكن النقطة المهمة إننا، رغم ما قد نواجهه من عدم الفهم او اللخبطة..الخ. لازم نبوح ونعبر سواء أكان بإحساس بنبوح بيه ومنتظرين عليه رد أو كان رد لإحساس إتقدم لينا أو حسيناه!
    ..
    أما إجابة شوية الليهات إللي في الجزء التاني فأعتقد إن إجابتها هتطول، لكن يمكن نقطة الإدعاء وتمثيل دور المثالي والفاضل في مواجهة التانيين الوحشين واحدة من أهم الأسباب!
    أما شوية البلاشات الأخرانية دي فانا معاها تماماً!
    ..
    بالنسبة لميرو الشريرة والمجنونة والقاسية والعدوانية والشعنونة فدي نعرفها كويس جداً، لكن تطلع مين ميرو الطيبة والعاقلة والحنونة والرحيمة والهادية؟! :P
    ..

    ردحذف
  2. صديقى الكسول اللمض منور دايما
    يارب شيطانى يكون عمل الواجب وزيادة معاك على الفيس

    ردحذف