الأحد، 11 أغسطس، 2013

إفلاس




حلو أوى انك تكون عايش احساس الأم والأب اللى بيحبوا وبيدوا ويراعوا ويطبطبوا ويحايلوا من غير ما تستنى مقابل  .. لأنك حابب تعمل كده .. حاسس انك لازم تعمل كده .. ويمكن كمان مخلوق عشان كده .. دورك و قدرك اتحددوا وبقوا كده .. ودايما احساسك بيخليك تآمن  أوى بإن " وجعك بيوجعنى أكتر ما وجعى بيوجعنى " وبالتالى بتكون حاسس انك انت اللى مسئول انك تفرح حد زعلان .. وتطبطب على حد موجوع .. وتدى شوية أمل وتفاؤل لحد محبط ويائس .... وتمسك ايد حد تايه .. وتحضن أوى حد وحيد .......... الخ ....  حلو الاحساس ده على فكرة على قد ما بيملاك وجع  لما بتبقى  عاجز عن تخفيف وجع حد أو  تفشل فى انك تقلل أى مشاعر وأفكار سلبية جواه وتعباه .. بس لما بتنجح وتريح حد بترتاح انت كمان .. بتحس بالرضا من جواك انك قدرت تعمل حاجة حلوة   .. انك بجد وجودك فى حياة ناس كتير مهم  .. وأهم حاجة انك بتحس انك انسان .......... وعلى فكرة مش لازم يكون فيه حد  بيعمل معاك كل ده عشان تكون انسان بيحس ويقدر يهتم بغيره أوى كده  .. لأ بالعكس غالبا احنا بندى غيرنا أهم المشاعر اللى بنكون محتاجينها أوى  .. مش دايما فاقد الشىء لا يعطيه

 انك تكون قادر تدى الشىء ده مع افتقادك ليه وعدم وجوده فى حياتك هو المهم .. هو سر قوتك  .. القدرة على الحب والعطاء موجودة على الرغم من كل حاجة وجعاك وحاجات تانية محتاجها .. يبقى ليه ماتستخدمهاش ؟ !.. ايه فايدتها وانت مش بتستخدمها فى انك تسعد وتساعد وتقوى وتطمن وتريح بيها غيرك ؟!  بخل مثلا .. بيقولوا أسوأ أنواع البخل .. هو البخل فى المشاعر .. والشح ده بيخليك ضعيف أوى .. ف خلى بالك

المشكلة بقى  لما بتقع انت .. لما كل قواك بتنهار .. لما بتبقى نفسيا حاسس انك  مبقتش قادر تعمل ده .. لما تحس ان كل المشاعر الى جواك دى خلصت فجأة .. فقدت قدرتك على الحب والعطاء ومعاها فقدت قوتك اللى مسنود عليها .. وزعت كل حاجة جواك  وبقيت مفلس من غير ما تحس ولا تبقى عامل حسابك تخلى حبة ليك ينفعوك وقت الزنقة دى عشان يساعدوك تقوم وترجع تأدى نفس الدور تانى   .. وقتها بتكون ضايع أوى.. ومش عارف تعمل ايه .. تتبرى من كل اللى اتبنيتهم .. ولا تمثل انك قادر تدى وتراعى ووقتها هيكون تمثيلك مزيف أوى وهتتكشف أكيد ده غير انك مش هتقبل تعمل كده .. مش هتقبل غير انك تعيش الحاجة اللى بتقدمها دى بكل ما فيك .. عشان تعملها صح أوى مش تقضية واجب  .. طب ايه الحل ؟..  تستلف .. بس لو  انت مش بتحب تستلف شوية مشاعر دافية وايجابية من حد .. مش تكبر ولا غرور بس انت مش متعود تقول أنا تعبان أوى ومحتاج أنا كمان مع انك  ممكن تكون أحوج الناس لكل اللى كنت بتعمله .. فى الوقت ده محتاج حد يهتم بيك أكتر ما انت تهتم  بغيرك ..  بس دايما بتصبر وبستنى ربنا يرزقك من غير ما تطلب   .. زى تعفف الفقير اللى ربنا ذكره فى القرءان

متهيألى  ان الحل الأول أريح  ليك .. لأنك نفسيا مش هتتحمل حد يعاتبك انك مابقتش تهتم زى الأول  ولا انت قادر ترد ولا تبرر .. انت أصلا بيوجعك البوح باللى جواك .. فــ اتبرى منهم أحسن .. ابعد على قد ما تقدر .. أكيد هيحسوا بالقهر لما تتخلى عنهم وتسيب ايدهم فى نص الطريق .. واحتمال يكونوا وقتها موجوعين وخايفين وتايهين ومحتاجينك ...  بس انت كمان افتكر ان ايدك بقت باردة أوى مش دافيه زى الأول .. وروحك بقت منهكة أوى مش حمل وجع أكتر  .. وقلبك بقى متفتت حتت  وكل حته مليانة وجع بعد ما كان مليان حب .. وعيونك وابتسامتك بقوا باهتين جامدين بعد ما كانوا بيشعوا حنان وحياة .. مش هتتحمل وجعهم زى الأول ولا هتعرف تريحهم .. غصب عنك ..  بص اسمع كلامى انت مش هتقدر تمثل ولا تعافر أكتر من كده ..... بس كده هما هيزعلوا .. أه ومش هيفهموا ولا هيقدروا ولا هيحسوا .. هما بردوا معذورين .. انت عودتهم على حبك الغير مشروط وفجأة سبت ايدهم فى نص الطريق

تفتكر لو ايدكم الباردة حضنت بعض أوى هتدفوا .. هيقل الوجع .. هتحسوا بالأمان .. هتفرح قلوبكم .. روحكم الموجوعة هترتاح .. هتوصلوا لبر الأمان ... تفتكر ؟!

هناك 10 تعليقات:

  1. يا دي النور يا دي التور
    من غير حلفان بلوجر كله نور
    لأ وكمان في شغل جديد وإستايل جديد ومركبة بتلت أربع أشرعة..إشتريتها بكام دي؟ وجبتي الفلوس منين؟ إعترفي!
    ..
    نتكلم جد شوية بقى!
    عارفة يا مروة العطاء العاطفي والإنساني ده عامل كدة زي الصَدَقة، ربنا قال (يمحق الله الربا ويربي الصدقات)، لو جينا نطبق ده في تعاملنا العاطفي والإنساني مع الناس اللي حوالينا هنلاقي في تشابه كبير. يعني اللي بيدي للناس شعور عشان ياخد مقابل لية شعور مماثل عامل زي اللي بيتاجر بالربا ربنا بيمحق تجارته، لكن اللي بيوزع أحاسيسه الإنسانية على الناس بدون مقابل ولوجه الله فالأكيد إن ده بيقويه جدا نفسيا وعاطفيا وبيخليه أقدر على مواجهة مشاكله إللي بيعجز أو يرفض البوح بيها لحد.
    لكن الأكيد فعلا إننا ممكن في لحظة من اللحظات نحس إننا أفلسنا ما عدش عندنا حاجة نديها للناس، لكن في الواقع أظن ده ليس إفلاس، فالعطاء يغني لا يسبب إفلاس، أظن المسألة هي أقرب للحزن بسبب التجاهل أو الجحود الذي يقابل به عطائنا منها إلى الإفلاس. كلنا بنحتاج حد يهتم بينا ويشيل معانا همومنا مهما كنا قدام الناس أقوياء، وأما ما بنلاقيش الحد ده، أو بنلاقي تجاهل من الجميع حتى اللي ساعدناهم بكل الطرق نفسيتنا-حتى ممكن من غير ما نعرف- بيسيطر عليها الحزن وبيوهمها إننا خلاص ماعدناش قادرين ندي أي حد أي حاجة، وده لأننا مقتنعين إن اللي إديناه مش هنقدر نسترده وأصلا إحنا ما كناش عاوزين له مقابل، بس طالما وصلنا للمرحلة دي يبقى خلاص بح. ونقول إننا أفلسنا.
    لكن كإجابة على تساؤلاتك، يمكن فعلا العطاء بدون مقابل شئ جميل، يمكن إحنا مش محتاجين مقابل بقدر ما احنا محتاجين جدا لتفاعل، محتاج إذا إديت لحد حاجة ما يدينيش لها مقابل بس يتفاعل معايا ويتفاعل مع عواطفي، حتي يمكن وقتها لو ما بحتش بهمومي هلاقي لها في التفاعل ده حل أو سلوى، مش مجرد ما ادي لحد حاجة ياخدها ويجري حد من غير شكر.
    لو إيدينا الباردة حضنت بعضها بدون ما تفكر في كمية الدفا اللي هتديها أو هتاخدها قد إية، أكيد وقتها إيدينا كلها هتدفا وهترتاح أرواحنا وقلوبنا.
    ..
    شفتي الموضوع سهل وبسيط، كل اللي تنشريه على الفيس أنشريه هنا...ولو ماعندكيش مشابك أبعتلك دستتين!

    ردحذف
    الردود
    1. من غير حلفان .. أنا مفلسة .. دى حاجة مش جديدة طبعا .. بس فلست أكتر بعد العيد .. مش أخدت عيدية بس اديت عيال اخواتى
      أنا علقت على كلامك فى الفيس بس أقول تانى .. لتزعل المدونة وتهرب هى والسفينة
      أنا مقتنعة بكل كلامك جدا جدا جدا
      بس زى ما قلتلك حتى وقت التفاعل انتهى .. غصب عننا نفسيا مش هنتقبله .. واحتمال كمان نكون اتعدينا ومش نحس بأى مشاعر تتقدملنا .. مش عارفة بردوا أوصللك الاحساس ده .. أصبر عليا كام يوم كده .. واذ ربما يعنى أسبوعين تلاتة
      على فكرة السفينة دى اللى هروح بيها طريق اللى يروح ما يرجعش لو عايزة تاخد لفة بيها تعالى واتحمل النتايج
      وابعت الدستتين .. بس بشرط ببلاش

      حذف
  2. بعد بلوغ القمة لا تنظر العين الا للاسفل
    وكلماتى مهما بلغت لا تستطيع ان تنظر الا لاعلى :) :)


    تسلم ابداعك .. الوصف شبيه بحالات كتيره لناس كتيره
    جمعتيهم كلهم تحت سقف حروفك ..

    دمتى بخير يا مروه :)

    ردحذف
    الردود
    1. متقولش كده
      انت كلماتك أعلى وأعلى وأعلى بكتيييير
      على فكرة أنا متابعة كل كتاباتك بس معلش بقى سامحنى مش مود انى أعلق خالص
      بس ما شاء الله عليك أفكارك مختلفة دايما وأسلوبك ممتع

      حذف
  3. حمد الله بالسلامة يا ميرو
    وحشاني
    عجبتني التدوينة مع اني مش عارفة اقول حاجة عنها
    هو كدة في حاجات مش بنقدر نتكلم عنها
    وحشاني علي فكرة

    ردحذف
    الردود
    1. الله يسلمك يا بنت الحلال
      وانتى وحشتينى كتير
      كفاية زيارتك وسؤالك عليا دايما
      تسلميلى :)

      حذف
  4. أزال المؤلف هذا التعليق.

    ردحذف
    الردود
    1. كلام جميل و مظبوط
      وصف دقيق لحالة موجودة عند ناس كتير
      وللاسف بتتحول في حالات كتير لحالة من العدوانية و الرفض للمجتمع المحيط

      معتقدش ان ممكن ايدتين بادرين يدفوا بعض , ,, لازم يكون في طرف واحد لسه قادر يدي

      تحياتي على العرض و الوصف الرئع

      حذف
    2. صح جدا
      ممكن تتحول لرفض كمان للدور نفسه
      شكرا على كلماتك
      نورتنى ونورت المدونة

      حذف