أكيد أكيد مش نسيتوا العفريتة التنكة أم سحلول ومشكلتها النفساوية
ولو نسيتوا أو لسه فيه حد مش عارف وعايز يحل معانا المشكلة هيلاقيها فى
حكايات لاسعة عن العفريتة ( أم سحلول )
...............
أم سحلول .. أم سحلول
ولو نسيتوا أو لسه فيه حد مش عارف وعايز يحل معانا المشكلة هيلاقيها فى
حكايات لاسعة عن العفريتة ( أم سحلول )
...............
أم سحلول .. أم سحلول
يووووه بقى يابنتى اصحى فوقى ، انتى استحليتى النوم فى برميل الطرشى؟ !
مش بترد ليه دية ؟ !
دية نومهم تقيل أوى زى أخويا أحمد .. بيعمل زيها كده بالظبط .. أقعد أصحى فيه .. يا أحمد اصحى .. يا بنى انت مش قلتلى صحينى الساعة 8 ؟ .. يا أحمد بطل فشل المحاضرة هتروح عليك .. وبعد زمن يتعطف عليا حضرته ويقلى اعمليلى كوباية شاى بلبن وأنا هحصى على طول .. أنا طبعا ناصحة بكون عاملهوله أصلا .. بفوت عليه فرصة انه يزحلقنى علشان ينام تانى .. وفى الأخر بيستسلم وبيقوم ينام فى الكوباية قصدى يشربها !
بس أنا أول مرة أعرف ان العفاريت كمان نومهم تقيل زى البشر
لتكون ........ ، يا سلام لو اللى فى دماغى حصل بجد .. ده أنا كده هرتاح راحة ما بعدها راحة
أم سحلول ..
يا بنتى الكل بيسأل عليكى
يا بنتى الكل بيسأل عليكى
أحمد وضياء ودينا وبيقولوا انك وحشتيهم
أم سحلول.. شكلها كده فطست
لولولولى .. الله أكبر .. انتصرنا يا جدعان .. العفريتة التنكة فطست وماتت وخلصت منها خلاص
ياربى دا حلم ولا علم .. حد يرش عليا شوية مية
ياربى دا حلم ولا علم .. حد يرش عليا شوية مية
أحمد لو سمحت بلاش انت بالذات .. أنا عارفة انك زعلان على حبيبتك العفريتة .. بس رش المية عداوة !
سيبنى بقى أفرح و أغنى براحتى .. هغنى ايه ؟ .. أيون افتكرت
لابد من يوم معلوم تترد فيه المظالم ابيض على كل مظلوم اسود على كل ظالم
أم سحلول :
اهىء اهى ء
ميرو :
استنوا كده
حد سمع حاجة ولا أنا بيتهيألى ؟
شكلى من كتر الفرحة بقيت بتخيل صوت حد نفسى انه يكون فطس ورحل من زمان
أم سحلول :
اهىء اهىء .. لأ يا ميرو .. متخافيش عليا أنا مش غرقت ولا فطست اهىء اهى ء .. وبعدين ابقى خبى نواياكى الشريرة دية جوايا وبلاش تقوليها بصوت عالى كده .. أنا لسه قاعدة على قلبك ومنورة حياتك !
ميرو :
منورة حياتى !
( ده انتى ضلمتيها ربنا يهدك )
منورة حياتى !
( ده انتى ضلمتيها ربنا يهدك )
ما انتى مش فطستى أهو .. قصدى يعنى مش نايمة .. أومال مش بتردى ليه ؟!
أم سحلول :
عايزة ايه يا ميرو ؟
ميرو :
هعوز منك ايه يا ختى .. ده انتى اللى محتجانى ؟
أم سحلول :
اهىء اهىء أنا مش عايزة حاجة من حد .. ومش ليا نفس أرد عليكى أو أتكلم مع حد .. أنا قلت أرد عليكى وأطمنك انى الحمد لله لسه حية أرزق
ميرو :
حية ترزقى !
( ضيعتى فرحتى ربنا يهدك )
أم سحلول :
اهىء اهىء امشى بقى وسيبينى فى حالى الله يخليك
اهىء اهىء امشى بقى وسيبينى فى حالى الله يخليك
ميرو :
ليه بقى يا ختى ؟
أم سحلول :
اهىء اهىء عندى اكتئاب
ميرو :
لا حول ولا قوة الا بالله .. هو الفيروس ده مش بيعتق حد .. حتى العفاريت انتشر عندهم
أم سحلول :
أه اتعدينا منكم .. امشى بقى علشان أنا مخنوقة على الأخر وحاسة انى هطق هموت اهىء اهىء
ميرو :
يااااااااارب يا ختى
أم سحلول :
سمعاكى يا ميرو .. ادعى براحتك .. أنا أصلا عايزة أرتاح بقى من الدنيا دية اهىء اهىء
ميرو :
رجعنا تانى لبحر الدموع .. طب خلاص يا أم سحلول متقطعيش قلبى .. كفاية بقى لحسن أقعد أعيط جمبك .. أه والله أعملها اهىء اهىء
أم سحلول :
أصل انتى متعرفيش الحكاية يا ميرو .. حكاية صعبة أوى عليا
ميرو : طب ما تحكى يا ختى .. أهو نفضفض لبعض ..
ونغنى زى ما بيقولو على الفيس (تيجي نحط همي ع همك ٠٠ ونضربهم في الخلاط ٠٠ونرقص ونطنطط ع مزيكتهم وهما بيضربوا ٠٠ وتشربي كاس واشرب كاس ٠٠ونزقطط ونفرح ونضحك في وش الناس )
أم سحلول :
أهو هو الفيس ده سبب اكتئابى اهىء اهىء
ميرو :
ازاى يعنى ؟
ما تحكى بقى على طول .. ما بقاش عندى دموع الله يخربيتك
أم سحلول :
طيب يا ميرو براحة .. ولو سمحتى متخربيش بيتى
ميرو :
يا شيخة روحى كده .. هو انتى أصلا لسه اتفتحلك بيت علشان يتخرب
أم سحلول :
كده يا ميرو بتزلينى اكمن يعنى عنست اهىء اهىء
ميرو :
ما انتى السبب يا أم سحلول .. أصل انتى عايشة فى الدور قوى .. وانتى أصلا راحت عليكى .. بس أنا خلاص يا ستى هسكت وهسمعك .. معلشى بقى أنا أسفة
أم سحلول :
ماشى اعتذارك مقبول
ميرو :
الله ما أطولك ياروح .. يارب صبرنى على العفريتة التنكة دية
ها قوليلى مالوه الفيس باكتئابك ؟
أم سحلول :
أصل أنا من كام يوم هربت من برميل الطرشى اللى انتى فاكره نفسك حبسانى فيه بالعافية .. ورحت على طول على الفيس وقعدت أتنطط وأنا فرحانة من بروفايل لبروفايل تانى .. رحت اتصدمت صدمة عمرى كلها ووقعت ومحدش سمى عليا !
ميرو :
تستاهلى علشان بعد كده تسمعى الكلام وتبطلى شقاوة العيال المتهورة دية
بس انتى اتصدمتى فى ايه ؟ حسب معلوماتى لسه معملوش خط مترو على الفيس !
أم سحلول :
مترو ايه انتى كمان ؟!
ميرو :
مش انتى اللى بتقوليلى اتصدمتى .. يكونشى اتصدمتى فى أتوبيس .. طب مش تخلى بالك .. ها طمنينى الأتوبيس عامل ايه دلوقتى ؟؟!
أم سحلول :
امشى يا ميرو .. انتى عايزة تنقطينى وتموتينى ناقصة عمر
ميرو :
طيب خلاص متزعليش .. وبعدين محدش بيموت ناقص عمر .. فيه ناس بتخلل .. زيك كده !
أم سحلول :
اهىء اهىء .. أنا مش عايزة أتخلل تانى .. اهىء اهىء
ميرو :
طب ما أنا قاعدة بقلك من الصبح اطلعى من البرميل .. هو الاكتئاب عملك طرش وللا ايه ؟ !
أم سحلول :
اهىء اهىء .. هتجننينى .. بقلك عايزة أمووووووووووت .. أنتحر وأرتاح من الدنيا كلها .. تقوليلى اطرشيتى
ميرو :
( هو انتى لسه شوفتى حاجة .. دية فرصتى علشان أنتقم من اللى عملتيه فيا )
براحة انتى فاكرنى اطرشيت زيك .. أنا موافقكى جدا وهساعدك كمان بس قوليلى الأول
براحة انتى فاكرنى اطرشيت زيك .. أنا موافقكى جدا وهساعدك كمان بس قوليلى الأول
ايه اللى صدمك وخلاكى تقررى القرار الصح جدا ده ؟
أم سحلول :
هقلك على المصيبة .. اهىء اهىء .. لقيت كل الريلاشن شيب فى البروفايلات اتحولت من سينجل لمرتبط .. حتى اللى اتحولت من مرتبط لسينجل – وقتها أنا فرحت أوى – رجعت تانى اتحولت لمرتبط
ميرو :
ما هو علشان نيتك الوحشة دية حصلك اكتئاب .. ليه يا أم سحلول كده تفرحى فى مصايب غيرك؟!
أم سحلول :
مصايب ايه انتى كمان ؟!
دوووووووووول بيلعبوا بأعصابى .. شوية سينجل وشوية مرتبط وبعدها بحبة يرجعوا سينجل وبعدها بحبة أقل يبقوا مرتبط
ميرو :
معلشى يا أم سحلول .. خلينا نفترض حسن النية وبعدين انتى مالك ؟ ! .. انتى عنستى وراحت عليكى سيبى غيرك يلعب براحته !
أم سحلول :
أنا ماليش دعوة .. أنا عايزة ألعب زيهم كده ..
هما بس يعلمونى بس البداية وأنا هبقى حريفة زيهم .. سينجل مرتبط سينجل مرتبط
ميرو :
أم سحلول اتجننت يا جدعان
على فكرة ضياء ودينا وأحمد بعتولك سلام .. وخصوصا أحمد لسه مكلماه دلوقتى وقال عليكى كلام يجنن
أم سحلول :
متجبليش سيرته خااااالص أحمد ده
ميرو :
ليه كده يا أم سحلول ؟ ! .. ده حتى وصانى عليكى وقعد يزن عليا ويتحايل علشان أخرجك من البرميل .. بيقول يا ستى انك وحشتيه جدا
أم سحلول :
وحشته ! .. أه ما هو باين أوى .. سيبينى فى حالى بقى علشان عايزة أقعد لوحدى
ميرو :
طب فهمينى قبل ما تروحى تكتئبى .. أحمد عملك ايه ؟!
أم سحلول :
أصل انتى متعرفيش الحكاية يا ميرو .. لو عرفتى قلبك اللى جوه ده هيتقطع بجد مش هتمثلى وتحطيلى ايدك على قلبك وتقولى أه قطعتيلى قلبى وانتى فى الحقيقة بتكونى خايفة على مدونتك تغرق .. وعينك دية هتسح بحر دموع مش دمعتين بطلعيهم بالعافية مجاملة يعنى
ميرو :
تصدقى أنا غلطانة انى بواسيكى .. ده انتى عفريتة معندكيش دم .. يالا روحى بقى سحى دموع بره المدونة بتاعتى
أم سحلول :
اهىء اهىء .. متناديش عليا تانى .. علشان مش هرد عليك .. أنا هروح أدخل البرميل تانى علشان عايزة أفكر ومتخافيش مش ناوية أموت وأريحك دلوقتى .. لازم أخد وقتى فى الاكتئاب !
( دعونى أكتئب فى صمت ! )
دية أخر حاجة قالتها أم سحلول قبل ما تغطس فى برميل الطرشى
ياترى يا أحمد عملت للبنت ايه خلاها تتصدم وتبقى حالتها كده ؟
لتكون زى ما بيقول ضياء
( اذ ربما حب جديد ) ؟
أنا بقول يا دينا تخلى بالك من خطيبك وبلاش تدعى لأم سحلول بالشفا وبالسلامة تانى لأنها أكيد شافت البروفايل بتاعك وتقريبا كده هى بتفكر تنتقم من كل اللى مرتبط
على العموم يا جماعة مش تقلقوا خااااالص .. أم سحلول مش ناوية تودع دلوقتى وان شاء الله هنعرف هى مبقتش طايقة أحمد ليه .. ده أنا لسه حتى مش قلتلها اللى قالهولى .. تكونشى سمعتنا واحنا بنتكلم ؟!
هو مفيش غيره ال ينشك في قلبه الحب
ردحذفوزي ما بنقول الحب في القلب زي عضة الكلب
ربنا يصبرك يا ام سحلول ياختي مكنش يومك يا نضري
اه يانا يا اما
جميل أوى تعليقك
حذفنورتى يا قمر حكايات أم سحلول اللاسعة
ماقبل البداية :
ردحذفتودع ؟ إنتي بتقولي إية يا مروة !!
بعد الشر عنها، إلهي إللي يكرهوها !!
أم سحلولتي، وي ويل جت أولد توجيزر!!
....
تكونش سمعتنا؟تكونش إية؟هتعملى مش عارفة يا مروة؟ دا أنا واثق إن الخط مفتوح مباشرة على ودان أم سحلول !!
مابعد البداية( عارف أني فوت البداية...بس مافيش!!) :
أكتب هذه الكلمات ودموعي تسيل في صمت(ماهو ما ينفعش أم سحلولتي تكتئب في صمت وأنا دموعي تسيل في زيطة و زمبليطة !!..مشاركة وجدانية بقى !!)،فقلبي دام يبكي بحرقة، ليس من أجل حالتك التي تحزنني جدا يا أم سحلولتي،والتي تتعذب لها روحي ويأن لها قلبي،فأنت تعلمين مدى الحب المتقد في كياني تجاهك،وإن كنتِ لا تعلمين فأتمنى أن تعلمين،..وإذا ماكنتيش ناوية تعلمين قوليلي من بدري كدة ونفضها سيرة بقى !!
ولكن تحزنني أيضا خيانة الأصدقاء،فقد نزفت من طعنة صديق،فها هو ضياء الصديق الذي اعتبرته مثل الأخ يلمح بشكل سافر أنه ( إذ ربما حب جديد !!)... بس لعلمك ده كله عشان يوقع بينا،عاوزك تخيبي أمله و ما تصدقيهوش خالص،أوعك تخليه يوقع أو يفرق بنا أبدا !!
أما الطعنة الأخرى،و هي الأعمق و الأسوأ والأشد فقد جاءت من الصديقة ميرو،إللي قال إية عاملة بتوفق بين دماغتنا في الحلال و هي أصلا عمالة توقع بينا !! أوعك تصدقيها في أي حاجة وحشة تقولها عني،صدقيها في الحلو بس لكن الوحش لأ..أوعك !!
أم سحلولتي،فلتعي جيدا هذه الكلمات،وفنجليلي عنيكي و فتحيلي ودانك، ولا تجعليني أنفي نفية إلا أودعتيها بحماطة حلجلانك، أصعب ما في الحياة هو ان يدعي عليك البعض بالكذب مالم تقله و مالم تفعله، إسبيشاللي وين لا تجد سبيل للدفاع عن نفسك، عشان كدة، دونت بيليف ذيم دول عاوزين يفرقوا بينا !!
...
في النهاية..
رغم أن وجودك في البرميل بيقطع فيا،لكن أهي فرصة للتفكير،لكن أوعك تسلمي ودانك للعوازل(وأظنهم عارفين نفسهم كويس!)،و أنا عارف إنك هتوصلي للقرار الصح،وأنتي أكيد واخدة بالك إني لو مش شاري ما كنتش إهتميت !!
...
مابعد النهاية :
على رأي ليلي،إللي جننت المجنون بحبها،و زودت جنانه أما قالت له البيتين دول :
كلانا مُظهر للناس بُغْضَا
وكلا عند صاحبه مكيـــن
تُبلغنا العيون مقالتينــــــــا
وفي القلبين ثم هوى دفين !!
..
يعني إفهموا يا حسادين..إحنا بس بنتناقر قدامكم..لكن على رأي مش عارف مين : إللي في القلب في القلب !
...
مابعد مابعد النهاية :
شوية جد بقى..
بجد يا مروة هايلة جدا جدا جدا،و مش عارف أقولك إية،مافيش كلمات مدح تعبرعن إعجابي،مش بس بحكايات أم سحلول اللاسعة لكن بكل كتاباتك...و أوعدك في فرحي أنا وام سحلول هقعدك صف أول...و كمان- وشوفي بقى الكرم الحاتمي ده- هأفتحلك البوفية أنتي لوحدك !!
...
تحياتي يا رائعة.
ههههههههه هههههههههههه
حذفماتفهمنيش صح صح يا أحمد.. أنا بس حبيت أفكر مع البنية بصوت عالي P:
وأرجوكي يا أم سحلول إوعي تصدقيني وأبوس إيدك خيبي أملي وإوعي تسيبي أحمد وإوعك (على رأيه) تسمعي كلامي
ههههههههههه
والله أم سحلول عندها حق.. العيال بتوع الفيس دول عيال تجن أصلا.. شوية مرتبط وشوية سنجل.. وشوية أوفسايد
ردحذفبس افتكر إنك مبسوطة مني يا أم سحلول لما جيتي وشفتي البروفايل بتاعي.. صح صح ؟
قولي ماتنكريش.. وماتخافيش من أحمد.. أحمد سبور وعادي D:
وعلى فكرة بقى انتي صعبتي عليا يا عفريتة الحلال انتي وعشان كدة بفكر أضمك لمملكة السناجل.. لحد ما احمد ما يعلن عالفيس إنه ريليشن شب معاكي.. ماهو بصراحة لازم تاخدي موقف بقى
جمييييييييييييل أوي أوي أوووووي يا ميرو بجد
بتكتبي الحلقات بأسلوب وخفة دم جامدين آخر 13 حاجة
تسلم إيدك
ردحذفوالله انتوا شباب تجنن .. وتعليقاتكم الجميلة المضحكة دية بتفرحنى جدا
تسلمولى يارب أصدقاء مجانين دايما
ردحذفبجد يا أحمد انت وضياء كلامكم اللى فى المدونة أحلى من التدوينة نفسها ..
انتوا مش بس بكاشين وأونطجية .. كمان دمكم خفيف جدا
وعلى الرغم يا أحمد انك بعتنى أنا وضياء وطلعتنا خونة وبنوقع بينك وبين المحروسة المكتئبة اللى هتفطس قريب ( بعد الشر عليها طبعا ) بس هنعمل ايه بقى مسامحينك ( ده حتى ضياء صلح موقفه وبيقولك انه كان بيفكر مع البنية بصوت عالى ) بس أنا لا ممكن أتراجع عن موقفى أبدا الا لما أعرف من صحبتى العفريتة عملتلها ايه بالظبط .. أه أنا مينفعشى معايا البكش ده خااااااااالص .. علشان كده بقلك من دلوقتى .. اعترف ومتخافشى زى ما انت عارف ( السر فى بير )
mohamed
ردحذفميرو انا بجد تعبت
دى تالت مره اعلق هنا على المدونه وياترى تعليقى ده هيوصل ولا لأ
بصوا بقى
اولا انا هفطس من الضحك على اللى انتوا عاملينه ده بجد تنفع مسرحيه كوميديه اخر 18 حاجه بالعند فى ضياء
اما بقى احمد باشا فالف مبروك مقدما على اذ ربما حب جديد؟ ( طبعا ام سحلول) ربنا يا ابنى يهنيكوا ببعض
والى ام سحلول : الف حمد الله على سلامتك انك ما متيش , بقول بقى تقومى كده وتفوقى ده انتى فرحك خلاص قرب ( اعاينى عليك اساحبى ) واهو تشوفينا بمج نسكافيه بدل الاخت ميرو اللى عاملالنا ازمه فى النسكافيه
وانت بقى يا عم ضياء سيب الناس فى حالها بقى خلينا نفرح فيهم ( اقصد بيهم - كل واحد يخلى باله )
والاستاذه ميرو : بطلوا بقى الحقد والنفسنه دى على ام سحلول
هههههههههههههههههههههه
بجد تحياتى كان بوست جامد اخر .............. الى مالا نهايه علشان ضياء ما يقولش حاجه بعدى
حذفأنا نشرت تعليقك يا محمد ولا تزعل نفسك خالص
من الواضح كده ان أم سحلول لسه مضايقة منك علشان كده كل التعليقات بتتعفرت من على المدونة
بس حتى انت يا محمد ظالمتنى أنا وضياء .. ده احنا دايما بنهدى بينهم ولسه حالا بقلها اعقلى يا أم سحلول واطلعى بقى .. الولد هيكون عملك ايه يعنى ؟!
بس للأسف لسه بتفكر ورافعة شعار دعونا نكتئب فى صمت
جري ايه يا ام سحلول يا اختي
ردحذفانا اغيب اغيب وارجع الاقيكي لسه مكتئبة
قطع احمد علي ضياء علي الكل كيله هو يعني ال بقو في ريليش خدو ايه ما رجعو سنجل تاني
قومي ياختي كده روقي ولا اقولك تيجي عندي تغيري جو والله ده انتي هتشوفي ام خليل وام متحت هتنبسطي اخر انبساط
فكري كده وردي عليا
حذفيارب ترضى
والله انتوا تعليقاتكم سكر وتجنن