السبت، 18 أغسطس، 2012

حاجة حلوة



لوسمحتوا  الكل يجمع هنا بسرعة بسرعة
عايزة أقلكم على موضوع خطير جدا 

خدوا نفسكم بقى  وركزوا معايا 
بقلكم ايه ياولاد محدش شاف النضارة بتاعتى ؟ .. خلاص خلاص لقيتها ..  استعنا على الشقى بالله  
لأ بلاش تركزوا وتبحلقوا أوى كده فى الشاشة ..  لنظركم يضعف وتقولوا مروة السبب
طيب يا عم براحة متزقكش أنا مالى  خليه يضعف بس ابقى كل كل يوم جزرة  
خلاص خلاص مبتحبش النصايح .. طيب خليك  ريلاكس 

بطلوا رغى بقى وخلونى  أفتكر كنت عايزة أقول ايه !

متقلقوش أكيد مش عايزاكم علشان تتذوقوا بسكوتاتى وكحكاتى ، اينعم هما اختراعاتى وعمايل ايدتينى  الاتنين دووووول وأكيد أكيد كنتوا هتاكلوا صوابعينكم وراهم زى العيال اخواتى 
بس الصراحة الصراحة أولا انا مش معايا رصيد أطلبلكم الاسعاف ، وثانيا هما أكيد حفظوا رقمى  من كتر ما اتصلت بيهم ومش هيردوا عليا تانى ، وثالثا أنا دلوقتى مش فاضية لأنى منقوطة .. بما انكم مش سألتوا  أنا منقوطة ليه ؟ .. يبقى من عينتينى الاتنين أنا هحكيلكم كل حاجة !
 سبب  نقطتى المنقوطة هى التهمة الزور اللى اتهموا بيها بسكوتاتى وكحكاتى واللى سببتلهم سمعة وحشة ! .. تلاقى الجيران  جايين يزوروا العيال اخواتى الغلبانين .. أصل فى سركم كده - وخلوا السر فى بير -  جالهم تلبك معوى .. بس متقلقوش هما بقوا كويسين بعد غسيل المعدة اللى عملوه ، المهم بيجوا يزوروهم  بالنهار علشان يكون الوقت صيام ومش يضطروا ياكلوا  من عمال ايدتينى ،  واللى بينقطنى أكتر  انهم بيكونوا جايين بطبق بسكوتاتهم وكحكاتهم معاهم .. قال ايه عايزينى أتذوقهم وأشوفهم حلوين ولا لأ ! ، مش عارفه بيعاملوا بسكوتاتى وكحكاتى  كده ليه .. هما ذنبهم  يعنى ان العيال اخواتى معدتهم مش قدرت تستحمل طعامتهم ؟ !

بس متخافوش عليا ..  أنا ولا همنى ولا آثر معايا ، محدش هيقدر يحبطنى أبدااااا ..أنا هقعد بعد الفطار أكل عمايل ايدتينى اللى تعبت فيهم  .. وانتوا بقى عليكم  تطلبولى الاسعاف
بس أنا احتياطى هتشاهد علشان أنا عارفة انكم عايزين تخلصوا منى

يوووووووه  بطلوا رغى بقى خلونى أقلكم ايه الموضوع الخطير قبل ما أودع !
 
لأ  يا ذكى .. مش عايزة أقلكم كل سنة وانتوا طيبين .. ما أنا قلتلكم امبارح ! .. مرة واحدة كفاية علشان بتخنق بسرعة   
 أنا كده هتخنق وهتجنن بجد ..  لبس عيد ايه  انت كمان اللى عايزة أخد رأيكم فيه ! ، مش سمعنى وأنا بغنى (قالوا راحت علينا خلاص ) ؟!
بص يابنى أنا هفهمك علشان انت شكلك غلبان وصعبت عليا أوى 

الحكاية انهم بيقولوا ان الواحد لما بيكبر مش بيجيب لبس عيد
رحت قلتلهم .. يعنى ايه كبرت ..  يكونشى أنا بقى عندى 60 سنة وأنا مش واخدة بالى ؟؟!
رحت لقيتهم بيبصولى باستغراب .. كأن فيه حاجة فى شكلى غلط 
استنوا كده لما أحسبها ، 24 سنة و11 شهر يبقى 35 و17 يوم يبقى 52 و11 ساعة يبقى 63 ودقيقتان يبقى 65 سنة ، تصدقوا كان عندهم حق وأنا ظلمتهم  ..  أنا كبرت وراحت عليا .. يالا بقى ربنا يسامحنى .. قولوا .. آميييييييييييييييييين
بس برده فيه حاجة تجنن أكتر
العيدية اللى اتلغت دية وبرده لنفس السبب .. نفسى أعرف ليه ؟ ما يقولوا بصراحة كده انى فلستهم  !

والحاجة اللى تنقط أكتر هى  العيال المقاريض اللى طلعولى فى البخت دووول علشان يفلسونى ،  الناس تتجوز وتجيب عيال والمفروض أنا بقى أدى عيدية ، طب وأنا مااااااااااالى .. مش كفاية راحت عليا .. لأ كمان لازم أعلن  افلاسى
المهم بلاش تقلبوا عليا المواجع بقى
يوووووه بقى مش قلتلكم بطل رغى ، بقلكم مش فاضلى كتيييييييييير !

بصوا بقى سيبكم من الجنان اللى فوق ده وركزوا معايا  علشان هنقوووول كلمتين جد
أنا وأصحابى فى الكلية كنا متعودين نعمل حاجة حلوة ليلة العيد .. وأكيد الحاجة دية الفكرة بتاعتهم هما  .. انتوا عارفين أنا مش بيطلع  منى غير الأفكار المجنونة
وبما انى أنا وأصحابى اتفرقنا وكل واحد دلوقتى فى حياته .. يبقى مفيش غيركم تدبسوا معايا فى الحاجة الحلوة دية
والحاجة الحلوة دية هنعملها فى ساعة الا ربع 
 بس هنصحى كلنا فى نفس الوقت وليكن مثلا الساعة 3 قبل الفجر
هنتوضى ونصلى ركعتين ونقرأ فيهم أخر صفحة من سورة الزمر
﴿ وسيق الذين اتقوا ربهم الى الجنة زمرا حتى اذا جاؤها وفتحت ابوابها وقال لهم خزنتها سلام عليكم طبتم فأدخلوها خالدين
وبعدين ندعى ان  ربنا يدخلنا الجنة مع بعض زى ما اجتمعنا على طاعته وذكره مع بعض
والوقت الباقى قرآن واستغفار 
بس كده
 وربنا يتقبل منا ومنكم ان شاء الله
اللهم اجعلنا ممن يقال لهم سلام عليكم طبتم فأدخلوها خالدين

احبكم فى الله
يالا بقى سلام أشوفكم بخير 
وياريت محدش ينسى عيديتى مع العيال الصغيرين

هناك 14 تعليقًا:

  1. والله انك عسل وسكر .. بس كبرتي برده يا مروه وانتي المفروض تدينا عيديتنا وخلي الكحك والبسكوت بتوعك ال زي السكر ليكي
    جميله الحاجه الحلوه دي وربنا يقدرني واعملها
    تحياتي

    ردحذف
    الردود

    1. تسلمى ربنا يكرمك يارب
      هنعمل كبرنا واحنا مش عايزين
      ان شاء الله هتقدرى

      حذف
  2. أولا ويلكم باك !!
    ..
    طبعا بعيدا عن إستمتاعي بأسلوبك الجميل إللي وحشنا،و إن كان تسبب لي في تلبك معوي على السيرة لأني غصت معاكي في الحكاية واكلتيني بسكوت وكحك وأنا أصلا النهاردة بظروفها صايم وضيعتي صيامي !!،
    ..
    أكرمك الله يا مروة و جزاكِ كل الخير على هذه الدعوة،و أعاننا الله على تنفيذها- رغم سهولتها و لكن كما يعلم الجميع الشيطان شاطر!!-و اتمنى ان ينفذها كل من يقرأ..
    ..
    كل التحية مروة،و تقبل الله منا و منكم صالح الإعمال.

    ردحذف
    الردود
    1. شكرا يا أحمد
      دايما تعليقك بينور المدونة
      معلشى بقى ان شاء الله هشحن بعد الفطار وهطلب عربية الاسعاف ليا وليك .. بس يارب ترد .. بس برده احتياطى اتشاهد زيى وتبقى شهيد بسكوتاتى وكحكاتى

      اللهم آمين
      ان شاء الله تقدر .. احنا أشطر من الشيطان .. بس انت قول أعوذ بالله منك يا شوشو

      اللهم آمين ياااااااارب

      حذف
  3. جميل يا أ. مروه، كتاباتك متميزه، واضح انك هيكون لكى مستقبل باهر فى الكتابة :) ، اتمنى لكى دوام التوفيق

    ردحذف
    الردود
    1. نورت المدونة
      كلماتك فرحتنى جداااااااااا
      بلاش أستاذة دية ربنا يكرمك
      أنا مصدقت أحمد بطلها وبقى يقول مروة بس

      خليها مروة أو ميرو

      حذف
  4. ما تنسيش تدعيلى إن ربنا يرضى عنى ويجبر بخاطرى.. ممكن :)

    كل سنة وأنتِ طيبة يا ميرو

    ردحذف
    الردود

    1. ربنا يرضى عنك فى الدنيا والأخرة يا قمر
      وانتى بألف خير

      حذف
  5. المدونة منورة بكتاباتك ، انا بقدر جدا ، الكاتب الذى يستطيع ان يرسم البسمه على شفاه القراء ، وانت كتبتى فاجدتى فجعلتينا نبتسم :) ، الى الامام دائما

    ردحذف
    الردود

    1. شكرا جدا على كلماتك المشجعة
      وياااااارب أقدر أكون عند حسن ظنكم دايما

      حذف
  6. كل سنه وانتى طيبه يا ميرو
    عيد سعيد عليكى
    تقبل الله منا ومنكم صالح الاعمال
    فكره جميله بس للاسف شوفتها متأخر , على اى حال تتعوض ان شاء الله فى افكار جديده
    عيد سعيد

    ردحذف
    الردود

    1. وانت بألف خير يا محمد
      اللهم آمين
      معلشى ان شاء الله تتعوض المرة الجية

      حذف
  7. هو ده يا ميرو .. إوعي حد يحبطك أو يوقف مسيرتك العظيمة في عمايل الكحك ورسالتك الأعظم في التوصل نوع جديد من إنهاء مشاكل البشر عن طريق الانتحار غير المباشر P:

    واما عن موضوع العيدية فأنا بقى وانا شحط كدة لسه مصر إني آخد عيديتي من عزت وعزيزة D:

    وتقبل الله منا ومنكم صالح الأعمال

    ردحذف
  8. شفتى بقه ..خليتنى نسيب الشاى اللى عايز اعمله ع الصبح ع النار
    اصلى الوحيد اللى لسه صاحى
    المهم ان موضوعك مميز جدا ,,واسلوبك الحقيقة يشجع ع القرايه
    ويخلى الواحد يسهى معاه زى ما حصلى ^_^
    وربنا يعينا على تنفيذ الفكره
    وربنا يستر وشوشو ما يصاحبنيش ليلتها :D
    تحياتى .. :)

    ردحذف