الخميس، 19 يوليو 2012

خبى السر يا قمحاية مهما تزن النحلاية

بمناسبة ان رمضان بكره .. كل سنة وانتوا طيبين .. عايزة أسألكم سؤال رخم أووووى
بس بقلكم ايه تجاوبوا من غير شتيمة .. 

وحتى كمان عارفين الاحساس اللى بتحسوا بيه لما بتكون مخنوقين من حد رخم ..     الاحساس اللى من جوه ده .. عارفينه صح ؟
برده ممنوع ..
يعنى من الأخر ممنوع تتهوروا أو تتخنقوا أو تتضايقوا
معلشى يقى اللى أوله قهر أخره ربنا ربنا يسامحنى 


                                             

صايمين ولازى كل سنة ؟؟

سؤال بنسأله كل سنة على سبيل الاستظراف
طبعا أنا أقصد الأولاد بالاستظراف ده
وقبل ما تتحيروا وتسألوا ليه كده ؟
هقلكم تفرقة عنصرية بقى
وقبل ما تتهوروا وتقولوا ايه البت الرخمة دية هقلكم 


( ربنا ربنا يسامحكم )




بعد الرخامة والخنقة .. نويت أصالحكم بسر خطير
بس قربوا ودانكم علشان محدش يسمعنا وبالذات أم سحلول .. تمسكهالى زلة
هى حاجة عملتها وأنا صغيرة ومقلتش لحد عليه .. أو بمعنى أصح أنكرت بشدة انى عملتها
بس انتوا طبعا أصحابى ومش بحب أخبى عليكم حاجة

وهقلكم زى ما وائل جسار قال
خبى السر يا قمحاية مهما تزن النحلاية

طبعا هتقولولى قولى سرك فى بير ..
ماشى وأنا هصدقكم
بس لو رحتوا قولتوه للنحلة هغرقكم فى البير أو فى برميل الطرشى مع أم سحلول
خلاص كده اتفقنا .. 

برده اللى أول سر أخره ربنا ربنا يسامحكم 

السر بقى
ان أنا لما كنت صغيرة أوى كان عندى 5 سنين تقريبا .. كانت أول سنة ليا فى الصيام
كنت شاطرة بقى و بصوم اليوم كله ومش بيعيط زى العيال المفجعوين


 ( اوعى تكونوا منهم .. ولو انتوا منهم بلاش تقولوليلى علشان انتوا عارفينى مش بعرف أخبى سر جوايا )

المهم أنا زى كل يوم صمت عادى وبعدين فطرنا برده عادى و بعدين نمت على أساس انى هصحى زى كل يوم أتسحر قبل ما أصوم اليوم التانى
بفتح عينى وصحيت بشكلى العسل المنكوش ده




ببص حواليا .. خير اللهم ما أجعله خير .. لقيت الدنيا منورة .. قام قلبى وقع فى رجلى لأن كده معناه ان معاد السحور راح خلاص
زعلت بس مش زعلت أوى .. قلت مش مشكلة تلاقيى مامتى حبيبتى راحت عليها نومه
مشيت فى البيت وأنا لسه بفرك عينى .. رحت اتخبطت فى الترابيزة .. رحت ببص قدامى .. اتفاجأت وبحلقت .. لقيت أثار الخيانة والغدر ..
اكتشفت انهم صحيوا واتسحروا وسايبين بقية الأكل على التريبزة .. يعنى كمان مش مخبيين خيانتهم .. رحت أنا بقى اتنرفزت جدا ووجعنى قلبى اللى وقع فى رجلى ..
( قبل ما تسألوا ازاى وجعنى .. هقلكم أصلها مش محتاجة نباهة على فكرة .. مش انا اتخبطت فى الترابيزة فى رجلى .. طبعا المفروض كنت عيطت وصوتى المسرسع وصل لحد أخر الشارع .. بس حظهم حلو لأنى لما اتفاجأت بالخيانة نسيت الوجع وبعدين لما اتأكدت منها حسيت بالوجع ولأن قلبى وقع فى رجلى .. فكان لازم يتعدى بشوية وجع .. أكيد مش فهمتوا حاجة .. 

صدقونى ولا أنا )


 

بطلوا بقى أستلتكم دية وأطلعوا من دماغى وخلونى أكمل
كنا فين ؟
أه افتكرت .. لما اكتشفت الخيانة اتنرفزت و لقيت نفسى جوه التلاجة .. ومحدش يسألنى ليه علشان مش فاكره اللى ودانى عندها يمكن كنت عايزة تلج ولا حاجة تخفف قلبى اللى اتوجع فى رجلى
فتحت التلاجة بحلقت أكتر .. اكتشفت خيانة أعظم .. لقيت حلويات وجاتوه وأنا بمووووووووووت فى حاجة اسمها جاتوه بالشيكولاته .. مقدرتش أستحمل طبعا انهم مش صحونى وكلوا لوحدهم .. تقريبا كانوا خايفين أخلصلهم على الجاتوه كله
وعلشان أنتقم وأبوظلهم خطتهم .. ومن غير ما أطول عليكم بقيت شبه الولد القمر ده 







وفجأة وبعد ما كانت الدنيا هدووووووووء .. لقيت مرة واحدة صوت مامتى من ورايا
( بتعملى ايه جوه التلاجة يا مروة ؟ )
طبعا كان شكلى كفاية انه يجاوب عنى
بس أنا بقى سألت بلماضة :
انتوا مصحتونيش أتسحر امبارح ليه ؟
ردت مامتى بخنقة منى :
صحيناكى ومردتيش تصحى .. بقى نومك تقيل أوى
قمت قلت بمسكنة وطيبةواستسلام بالأمر الواقع :
خلاص بقى هصوم من غير ما اتسحر

 
وهربت من قدام مامتى ورحت غسلت ايدى ووشى من أثار الجريمة اللى عملتها ونويت أكمل صيام ولا كأنى عملت حاجة

بس مامتى حبيبتى طالعة لبنتها .. أنا يعنى .. مش بتعرف تخلى سر جواها أبدا .. ( عندنا ميزة تجنن )
قالت بحسن نية ان مروة فطرت النهارده .. وطبعا الشخص اللى عنده الميزة اللى عندنا برده بحسن نية نقل الخبر .. ولأن احنا بيت عيلة عندهم كلهم الميزة دية الخبر اتنشر بسرعة وكانت فضيحة جامدة .. كل شوية أقابل عيل رخم ( قصدى طبعا الأولاد ) يقعد يضحك ويقلى انتى فاطرة النهارده .. لحد ما لقيت زفة تجنن بتجرى ورايا على السلم و بتغنى الأغنية اللى مش فاكرها دية

يافاطر رمضان ياخاسر دينك القطة السوداء هطقع مصرينك
   


المهم أنا هربت منهم بأعجوبة .. واتخاصمت أنا ومامتى بطريقة الصباع الصغير .. ولما جه بابا أنكرت بشدة انى فطرت وقعدت بره على السلم أعيط وأشتكى للدبدوب .. وعلشان يدخلونى من بره جابولى بقية الجاتوه أكله .. وانتهى الموضوع ان اللى ماما شافته جوه التلاجه بياكل الجاتوه الصبح كان عفريت 
( من الواضح كده ان أم سحلول كانت مضطهدانى من وأنا صغيرة زى ما بتعمل مع ضياء دلوقتى)

المشكلة دلوقتى بقى ان كل ما حد ينادينى وأنا جوه التلاجة أفتكر الحكاية دية والسر الخطير ده
ولو سمحتم مفيش حد يستغرب أو يتريق
أنا بقضى أكتر اليوم جوه التلاجة عادى يعنى .. وأمى تفضل تنادى عليا
يا بنتى اقفل التلاجة .. نفسى أعرف بتعملى ايه جوه ؟
ولحد دلوقتى مش عارفه تعرف أنا بعمل ايه جوه لحد ما هتتجنن منى .. تقريبا كده أنا لحد دلوقتى بنتقم من مامتى
( ربنا يباركلى فى عمرها يارب )

 

..................................

نروح بقى لأم سحلول

أحمد

 
معلشى بقى مش هخرجها من البرميل دلوقتى .. خليها تتعذب شوية .. مش كفاية كلت الجاتوه من التلاجة وطلعتنى فاطره وخلت العيالة يتريقوا عليا وسببولى عقدة مخليانى بحب أقعد فى التلاجة لحد دلوقتى .. ده كده بقى بينى وبينها تار .. وأنا صعيدية ولازم أخد بالتار


ضياء

 
أنا أخدتلك حقك أهو ومش هخرجها دلوقتى ..
تقريبا هى اللى مسحت التعليق  بتاعك .. أو يمكن أحمد .. أنا بهدى النفوس مش أكتر
بس ده مش معناه انك هتعرف تهرب زى ما انت عاوز .. احتمال فى رمضان أتجنن وأستغلك زى أحمد علشان أنتقم من أم سحلول .. أو أدبسك برده زى أحمد .. يعنى انت وحظك .. حسب الظروف بقى
بس عندك حل علشان تأجل استغلالك شوية .. انت تقعد تدعيلى فى رمضان ان ربنا يهدينى وأبطل جنان لحد العيد .. ويمكن أخلص منها فى العيد ونفرح فيكم .. قصدى بيكم .. وأهو تبقى الفرحة فرحتين

دينا , ريماس , وهبة 

 
أم سحلول زعلانة منكم جدا لأنكم قعدتم تضحكوا على مشكلتها النفساوية .. ومش بتحاولوا تساعدوا فى حلها خالص
وبتقلكم متخافوش هى عفريتة عندها ضمير ومش بتحب تخطف خطيب حد .. بس هى عطفت عليكم وهتديكم فرصة قبل ما تتصرف معاكم .. تتعاونوا مع بعض وتتصرفولها فى عريس منتحر عقبال ما هى تتعذب شوية فى برميل الطرشى
وأنا علشان أساعدكم ومتقولوش عليا ندلة واتخليت عنكم .. مش هطلعها دلوقتى من برميل الطرشى .. بس انتوا ادعوا انها تفطس

محمد 

 
صعب أوى طلبك ده .. انت عارف انى بحوش منه كميات كتيرة علشان لما يشح من السوق أبيعه أنا بقى بأسعار غالية جدا وأستغل الناس المدمنين زيى
بس ممكن علشان أخليك مدمن أعملك كوباية وبعدين بقى أستغلك براحتى

مصطفى سيف الدين


أم سحلول مش نافع معاها حاجة خالص ومش ناوية تنصرف الا لما أجوزها عريس منتحر أو تجننى وبعدين تجننكم
بس هو فيه اقتراح من حد بيعزك جدا وهو

ايه رأيك لو تخطبها ؟

 على فكرة يا ريماس أنا مقلتش حاجة خالص 
 
انتى بقى ضحى وخلينا نفرح بيكم على العيد علشان أم سحلول تبعد عن خطيبها

...................................



بجد فرحانة جدااااااااااااااا انى اتعرفت عليكم .. وبصراحة معنديش كلام يوصف فرحتى بيكم ومشاعرى ناحيتكم
غير انى 


( بحبكم فى الله )

كل عام وانتوا بألف خير وصحة وسعادة
كل عام وانتوا اللى الله أقرب وعن معصيته أبعد وعلى طاعته أدوم



............................

نبطل جنان بقى ونتكلم جد شوية







هناك 14 تعليقًا:

  1. كل سنه وانتى طيبه يا قمر
    ورمضان كريم وسلام خاص لام سحلول حبيبتنا واحنا منقدرش على زعلها ابدااا
    بجد انتى شخصيه لذيذه وانا حبيتك ودخلتى قلبى بسرعه

    ردحذف
  2. كالعادة محتار أبدأ بإية..
    فهبدأ بــ...هههههههههههههههههههههههههههههههه!!!
    ...
    على سبيل الاستظراف هأجاوب..طبعا زي كل سنة،بالزمة دي حاجة عاوزة سؤال !!
    ...
    لالالالا..انا كدة كل ما اتخيل أم سحلولتي بتتعذب في برميل الطرشي أتعذب أنا كمان...منك لله يا ضياء عشان انت اللي كبرتها في دماغ مروة و خلتها تطول فترة إعتقالها...و لعلمك بقى ومن الأخر و بالمفتشر أنا اللي أكلت الجبنة..قصدي انا اللي مسحت التعليق !!
    ..
    عندي صفقة ليكي يا مروة- و عارف ان ضياء هيبوظها زي كل مرة !- الفانوس عليا بس اطلقي سراح الغلبانة اللي في البرميل دي !!
    ...
    بجد بقى يا مروة تعارفنا ببعضنا كلنا كدة من خلال الحملة دي كان من أجمل و أروع الحاجات اللي حصلتلي السنة دي،دايما يارب في تألق و إبداع و نجاح..كل سنة و انتي و كل الاسرة بألف خير و سلامة وسعادة،و كل عام و جميع الاصدقاء و جميع الأمة الاسلامية بخير و أمن و سلام.

    ردحذف
    الردود
    1. مش هينفع يا أحمد ..
      لازم أخد بالتار وأنتقم شوية منها

      ربنا يكرمك يارب
      وانت بألف خير

      حذف
  3. قبل أيتها حاجة لازم أعرف انتي بتعملي إيه جوه التلاجة D:

    تاني حاجة عايزك تراضي أم سحلول عشان ظلمتها وقلت انها مضطهداني وأتاريه أحمد (قلبي كان حاسس على فكرة)

    ومعاكي أنا في موضوع حبسها طول شهر رمضان ده.. واستغليتي زي ماتحبي بس من غير تدبيس والنبي D:
    وهدعيلك حاضر.. عايزة دهوة من أم كام؟؟

    بجد بقى يا ميرو أنا مبسوووط أوي والله بأني عرفت مدونتك واتعرفت على شخصية جميلة زيك
    يارب دايما على تواصل وربنا يديم المعروف

    كل سنة وانتي طيبة ويارب يكون رمضان جميلة أيامه عليكي وعلى كل حبايبك

    بالتوفيق دايما

    ردحذف
    الردود
    1. لما أبقى أعرف أنا هبقى أقلك

      يا ضياء دية عفريتة تنكة .. مش هتقبل أسفك

      حتى الدعوة ياضياء

      وأنا أكتر

      اللهم آمين

      وانت بألف خير

      حذف
  4. كل سنة وأنتِ طيبة يا ميرو
    ويارب يكون شهر ملئ بالخير والطاعة لينا كلنا

    ردحذف
  5. بجد بجد بوست عبقري ...حبيت قوي قويييييييي سردك...ومشاركتك لينا السر الخطير ده...
    وعلى فكرة انا زيك بضعف قدام كيكة الشوكلاطة ومبعرفنيش...
    وانتي طيبة ياقمر ...

    ردحذف
    الردود
    1. تسلمى ربنا يكرمك
      وانتى بألف خير
      نورتى المدونة

      حذف
  6. واضح انك عسل من صغرك يا مروه ^_^
    هى اول سنه صيام دى لازم يبقى فيها شويه مواقف تحفه

    مالها ام سحلول بقى
    انا قولت انها مشيت وهتسبنا فى حالنا :D

    كل سنه وانتى طيبه يا ميرو
    ورمضان كريم عليكى يا جميله ويعود عليكى الايام بالخير ياااارب ان شاء الله :))

    ردحذف
    الردود
    1. تسلمى يا دينا

      أم سحلول ربنا يهديها

      وانتى طيبة ياقمر

      حذف
  7. بجد تدوينه جامده جدا يا مروه
    وبعدين اقولك على سر وطبعا عارف السر معاكى بيبقى فى بير
    ( انصحك تروحى وتشوفى تدوينة رمضان رابعه ابتدائى على مدونتى وتعرفى انا أول رمضان صمته ...... ولا اقولك اسيبك تروحى تعرفى بنفسك )
    المهم ان انا رحت اشتريت نسكافيه امبارح من السوبر ماركت بجد قولت لمروه تعملها وتحتكر النسكافيه بجد هههههههه
    كل سنه وانتى طيبه

    ردحذف
    الردود
    1. شكرا يا محمد ربنا يكرمك
      ان شاء الله هبقى أجى عندكم وأخلصه كله

      وانت بألف خير

      حذف