الثلاثاء، 17 يوليو 2012

برميل طرشى وورق الورد


أصحابى طبعا فاكرين ان أنا وأم سحلول اتخانقنا امبارح ومشيت بعد ما جننتنى وجبتلى الضغط والسكر وكمان شغلتنى عندها سكرتيرة

( أنا أشتغل سكرتيره .. ياناس ده أنا متخرجة من كلية العلوم بتاعة حط حاجة على حاجة تانية  هتطلع حاجة تالتة منعرفهاش ونهارنا كان بيكون أسود لو معرفهناش .. والحمد لله دايما مش بنعرفها )

المهم أنا بعد ما شربت برميل نسكافيه مخمخت وفكرت ونويت نية شر
ان أنا هنتقم منها بمساعدة أحمد .. والحمد لله انه مش بيدخل كتير الأيام دية علشان ميمنعنيش لأنه معجب بأم سحلول جدا وحابب أوى انه يبقى أبو سحلول فى الفيوتشر .. المهم دلوقتى انى أستغله فى الانتقام



أم سحلول : 
يا ميروووووووووووووووو
ميرو :
فى ايه ؟ بتزعقى ليه ؟ 
وطى صوتك شوية .. المدونات اللى جنبنا انزعجوا من حنجرتك المجلجلة دية
أم سحلول:
تعالى طلعينى من البرميل ده بقى .. أنا فطست حرام عليكى
ولما أبقى أطلعلهم بتوع المدونات دوول .. قالوا انزعجوا قال .. طب وحياة ابنى سحلول اللى مجاش لسه لأوريهم العفرته على أصولها 
ميرو :
هدى بس نفسك شوية وبطلى بلطجة 
أم سحلول :
بقلك طلعينى من البرميل ده
ميرو :
معلشى يا أم سحلول مش هينفع أطلعك دلوقتى .. لازم تقعدى شوية كمان
أم سحلول :
 مش عارفه ليه شمه ريحة غدر
انتى بنتقمى منى ولا ايه يا ميرو ؟
ميرو :
وهو أنا أقدر يا أم سحلول 
وكمان هو انتى عملتيلى حاجة .. انتى بس جننتينى وبعدين عطفتى عليا وشغلتينى عندك سكرتيرة .. ده انتى طيبة خااااااااالص 
أم سحلول :
أدينى بعمل خير علشان يقعدلى فى ابنى سحلول .. طلعينى بقى 
ميرو :
معلشى  مش هينفع لازم تقعدى تتخللى فى برميل الطرشى شوية .. أحمد هو اللى طلب منى كده
أم سحلول :
ومين أحمد ده كمان ؟
ميرو :
أنا هقلك مين هو .. وكمان هقلك على المدونة بتاعته علشان لو عايزة تروحى تصيفى عنده شوية ؟
 بصى يا ستى
 اسمه بالكامل
(  أحمد أحمد أحمد صالح .. 
مدون رائع ومميز جدا ومدونته اسمها  ( وجع الفلسفة ) .. وكمان بيكتب فيها قصص جميلة جدا يعنى هتتسلى عنده جدا )

أم سحلول :
ده بقى يا ستى اللى خلاكى تغرقينى فى برميل طرشى
ميرو :
أه ده أول واحد طلب ايدك منى ..
عندك مانع انك تتخللى ؟؟
أم سحلول :
لأ .. بس بصراحة طلباته غريبة أوى
ميرو :
هقلك أنا هو طلب منى كده ليه 

أحمد بيقول
 انك صعبتى عليه خالص .. ومستعد انه يسمحلك تخنقيه وتتجوزوا لأن على الأقل الحياة معاكى مش هتكون مسكرة زى البنات اللى فى الدنيا ويموت بغيبوبة سكر وهو بيحب المخللات أصلا

أم سحلول :
 ليه بقى الغلط من أولها كده ؟؟
يعنى ايه صعبت عليه ؟
هو هيتجوزنى علشان بيحبنى ولا هيتجوزنى شفقة ؟
ميرو :
 لأ يا أم سحلول .. ده معجب بيكى جدا  وعلشان خاطرك عايز يدخل مستشفى المجانين وكمان يا ستى هيجيب الجاتوه والحاجة الساقعة وأوفر أنا بقى فلوسى للنسكافيه  
أم سحلول :
طب وايه بقى سؤاله؟
ميرو :
بصى هو الأيام دية مش فاضى يسألك
بس كان  دايما على المدونة  بتاعته مشغل  كلمات الأغنية التركية ( قطرة قطرة ) تقريبا كان مشغلهالك وهى كلها أسئلة أصلا  ..
ايه رأيك تسمعيها وتجاوبى؟؟
أم سحلول :
 ماشى يا ميرو هجاوب  .. وانا هخاف يعنى

( لو تدفقت اليك قطرة قطرة ، فهل ستملأ قلبك بي وتحتويني ؟؟
او انك لن تستطيع احتوائي وتسكبني على الارض !! )


 


أم سحلول :
 صعب أوى السؤال ده يا ميرو
ميرو :
 ده انتى طلعتى عفريتة فاشلة ..
وأنا عمالة أقنعه وأقله انك عفريتة مثقفة وفى الأخر تكسفينى كده 
أم سحلول :
خلاص بقى يا ميرو .. أنا أصلا مخنوقة من البرميل ده .. اسألي يالا السؤال اللى بعده  
( وهو أنتى لسه شوفتى حاجة )

( لو اصبحت مطراً وهطلت عليك ، فهل ستبلل نفسك بي ؟؟
او انك لن تحتملني وتهرب الى مكان مظلل لا يصله المطر !! )



 


أم سحلول :
 الله أنا بحب أجرى تحت المطر أوى ..  لأ كده شكلى هحبه
ويالا علشان خاطره هكون عفريتة وديعة وطيبة وأتحمله وأسامحه بس والله لو خانى مع البت جارتنا العفريتة زعبوبة المسهوكة دية  لأطلع روحه بايدى دية
ميرو :
 يابنتى انتى نسيتى ان روحه هتكون طلعت لما يتجوزك
أم سحلول :
وماله يا ميرو نطلعها تانى .. انت فاكره أول مرة اتعرفنا فيها أنا وانتى .. لما  قلتيلى براحة على أصحابى ومتعذبهمشى وانتى بتموتيهم .. المرة دية هيبقى جوزى وأعذبه براحتى ولو سمحتى يا ميرو متدخليش  انتى
ميرو :
وأنا مالى يختى .. اعملى اللى انتى عايزاه .. يستاهل مش هو اللى عينه زايغة ..
عذبيه علشان يعرف قيمتك ويبطل بصبصة .. ولا أقلك طريقة أحسن وشريرة جدا .. انتى تفقعيله عينه الاتنين علشان يبطل بصبصة وأهو كمان يستريح من شكلك

( لو في يوم من الايام وقعت ارضاً او تعبت من الحياة ، فهل ستبقى معي في لحظات حياتي الاكثر تعقيداً ؟؟
او انك لن تتحمل معي هذا ، وتهرب الى اشخاص غيري !! )


أم سحلول :
لأ هو فكرنى  عفريتة فافى  بتقول بابى ومامى .. لأ ده أنا أبويا وأمى العفاريت معلمنى ان الست لازم تقف جمب جوزها وعند اللزوم تبقى بميت راجل وأبقى أطلعه عليه بعد كده


( في ايامي الحلوة وايامي السيئه في كل ظروف حياتي هل ستكون معي في هذه الصورة التي يقال عنها الحب ؟؟
او انك لن تتحملني وتذهب مع احلام اخرى غير احلامي !! )

أم سحلول :
بص يا بنى الحلال علشان أنا اتخنقت من طلباتك وأسئلتك  ..
احنا الحب عندنا ليه قيمة كبيرة أوى .. فعلشان كده  أول ما تتزرع بذرة الحب فى قلوبنا .. بنرويها بالحنان  فبتكبر شجرة صغيرة ومع الاهتمام والرعاية   بتكبر وتتعمق جذورها أكتر فى تربة قلوبنا وبتواجه أعتى العواصف
يعنى أنا معاك على المره قبل الحلوه  ويارب ميجعلنا بينا مر ويوسع رزقك يارب ويخليك ليه ومتحبش غيري ابدا
ميرو :
ما تروحى تشحتى بيه على باب السيدة أحسن
أم سحلول :
وماله بس لما نجيب سحلول .. علشان تبقى شحاته أسرية 
بس ايه اللى يخلينا نتعب ونروح بعيد هنبقى نشحت على باب مدونتك ..
 ميرو :
بجد تشرفونى وتفرحونى
( يارب تفطسى يارب )


( لو قلت لك اني احبك ، فلا اعلم هل ستحبني انت ايضاً ؟؟
هل ستمسك بيدي إن وقعت امامك ؟؟)

أم سحلول :
لأ هنا بقى خط أحمر
احنا معندناش بنات تقول بحبك ولا تتمسك ايدها قبل الجواز .. ادبس الأول وبعدين هتلاقى بحبك بكل اللغات اللى أعرفها
 يعنى الصبح هقلك 
 I love you
والظهر هقلك 
 Je t'aime
وبالليل هقلك   
Ich liebe dich


وفى كل الأوقات هقلك هات هات بحبك يا منيل
ميرو :
هات ايه ؟
أم سحلول :
يجيب فلوس .. أومال هأكل الواد سحلول منين يعنى لحد ما نشحت على باب مدونتك ؟


 

( لو قلت لك انك نور عيني ،  فلا اعلم هل سوف اكون انا ايضاً ؟؟
هل ستمسك بيدي الى ما لا نهايه إن وثقت بك ؟؟ )
أم سحلول :
يابنى قلتلك بطل اسطواناتك المشروخة  دية .. ومن الأخر لو مت قدامى برده مش هتمسك ايدى

ميرو : 
ربنا يسامحك يا شيخة .. شوهتى كلمات الأغنية وأكيد المغنى بعد ما يقرأ كلماتك دية هيرفع قضية على المدونة 
وأحمد كمان هيطفش بعد ما كان راضى بيكى ومش هتعرفى تجيبى سحلول أبدا

أم سحلول : 
مش مشكلة .. خليه يروح هيجى غيره
ميرو : 
ايه التناكة اللى انتى فيها دية؟؟
أم سحلول : 
مش تناكة يا ميرو .. دية ثقة .. مش انتى اللى قولتيلى اللى مش يعجبه الباب يفوت أشجع عريس منتحر متهور فى لحظة طيش
ميرو : 
شاطرة يا أم سحلول ..
طب مش عايزة تقولى حاجة تانى لأحمد تخليه ما يطفش

تؤتؤ .. ولا أقلك ..
قوليله
لو عايز يجيلى بسرعة 
خليه يلعب لعبة ورق الورد
ميرو :
ازاى يعنى ؟
أم سحلول :
والله يا ميرو انتى صعبانة عليا ؟
أم سحلول :
ليه يختى ؟
أم سحلول :
مش عارفة يعنى ايه لعبة ورق الورد
طب صحابك يقولوا عليكى ايه دلوقتى ؟
متخرجة من كلية علوم ومش عارفة يعنى ايه لعبة ورق الورد ؟
ميرو :
وايه علاقة كلية العلوم بيها ؟
أم سحلول :
كلية العلوم هى أساس كيميا الحب .. وعلى فكرة بقى أنا سمعتك وانتى بتقولى انك عايزة تنتقمى منى
 انتى هتعرفى تنتقمى منى ؟
أذا كان انتى كنتى فاشلة فى الكلية ودايما مكنتيش بتعرفى الحاجة التالتة ؟
يا فالحة
 لو كنتى عرفتى ايه هى الحاجة التالتة دية كنتى فهمتى قصدى من لعبة ورد الورق
ميرو :
طيب اخلصى بقى بدل ما أتجنن وأرميكى بره المدونة
أم سحول :
متقدريش بس هقلك علشان انتى صعبتى عليا وأهو أبقى كسبت فيكى ثواب
أحمد اللى هو أبو سحلول فى الفيوتشر لو حصل نصيب يعنى وعرف ينفذ اللعبة دية صح
هيقف قدام البحر وهيتأمل القمر وهو ماسك وردة لونها أبيض ويبدأ يقطف ورقة ورقة وهو بيقول ( بتحبنى ما بتحبنيش )
ميرو :
أه عارفاها اللعبة دية .. بس دية كانت بوردة لونها أحمر
وبعدين  هو أحمد فاضيلك وباله رايق وكمان معاه فلوس علشان يضيعه على الورد
أم سحلول :
احنا عندنا لونها أبيض .. وأحمد بقى لازم يفضيلى نفسه شوية لو عايز يتجوزنى .. مش كفاية مش بعتلى سؤال وخلانى أجاوب على أسئلة المغنى التركى الرغاى ده
ومن ناحية الفلوس .. هو قال انه هيجيب جاتوه وحاجة ساقعة .. يعنى معاه فلوس وبصراحة أنا عايزة أفلسه علشان بعد الجواز أمارس عليه النكد الزوجى وأقله هات هات يا منيل
ميرو : 
النكد الزوجى ! وهات وهات يا منيل !
وأنا مالى ..  كملى  يختى هيعمل ايه أحمد علشان يجيلك بسرعة ؟
أم سحلول :
لو طلعت أخر ورقة فاضلة ما بتحبنيش هيزعل هو أووووووى ويروح رامى  نفسه فى البحر ويغرق ويجيلى ونتجوز بقى
ميرو :
طب لو طلعت بتحبنى .. يبقى أحمد كده نفد من الغرق ومنك.. صح ؟
أم سحلول :
لأ طبعا وهو أنا هسيبه الا لما أغرقه فى البرميل الحلو ده شويه
لو طلعت بتحبنى .. من كتر الفرحة انى بحبه ..  هيروح رامى  نفسه برده فى البحر ويغرق ويجيلى ونتجوز 

أنا عملت اللى عليا كده يا أحمد  ووصلتك الرسالة
بس معلشى بقى استغليتك وعذبت أم سحلول شوية ولو عاوز تنقذها ابقى روحلها علشان تغرقك فى برميل الطرشى شوية
ولو مش هتروح يبقى أحسن برده خليها تتعذب شوية لحد المرة الجاية 
يبقى ضياء هو اللى ينقذها 
هروح بقى أشرب نسكافيه بمزاج على صوت أم سحلول وهى بتتعذب ..
 مش عارفه ليه حاسه انى بقيت شريرة !

أم سحلول  افطسى كويس سي يو يالا باى



هناك 6 تعليقات:

  1. أولا أسفي للأخ الصديق أورهان أولمز على البهدلة اللي شافتها أغنيته من أم سحلول..( بس في سرك يا اورهان يا صاحبي و غلاوتك عندي لأردلك كرامتك منها بعد أما اتجوزها..خلاص جوازي من أم سحلول بعد كل ده بقى مسألة حياة أو موت ! )
    ...
    على فكرة بعد كل ده أنا مش هأقدر أبدا اتنازل عن أم سحلول، و موافق أني ألعب عشانها لعبة ورق الورد، الكيمان عندنا مليانة نرجس( هو مش مبيض شوية برضه؟ و لا لازم ورد بلدي؟ )هأملا ايدي ورد وأقف على شط البحر مع طلعة الشمس بالظبط..دا انا حتى وحشني البحر،و وحشتني وقفتي على الشط بعد الفجر..شكرا يا ام سحلول انك هتخليني أطلع البحر الصيف ده !! و افضل أقطف في الورد، بس و لأني رجل متزن بأقدر أتحكم في نفسي وقت الفرح مش هأرمي نفسي في البحر من الفرحة لو كانت أخر ورقة بتحبني..عادي !!
    و برضة لأني راجل مؤمن فأكيد اني مش هأنتحر و أرمي نفسي في البحر لو كانت اخر ورقة ما بتحبنيش..يعني من الأخر خطتك يا ام سحلول فشلت !!
    و بعدين موضوع برميل الطرشي مش هينفع،اذا كان انتي مش موافقة ألمس ايدك، ينفع نغرق جنب بعض كدة في برميل طرشي ضيق كدة ؟ لو موافقة أنا ما عنديش مانع !
    ..
    بما انك يا مروة همزة الوصل ما بينا، عاوزك تسأليها سؤال، ومش من أسئلة اورهان كفاية اللي صابة !، هو سؤال بس كي يطمئن قلبي و هيحدد مصير علاقتنا..أم سحلول مش عاوزاني المس ايديها، و أنا احترم احترامها ده،ده طبعا قبل الجواز..بس يا ترى هتطلع عاقلة بعد الجواز و لا هتعمل زي فوزية في مسرحية سُك على بناتك لما طلبت الطلاق لأن جوزها مسك ايدها..قال إية بيعديني !!!
    هههههههه..
    بصراحة- بس ما تقوليلهاش !- عروسة تستاهل انتحر عشانها؛ هي صحيح شكلها عاوزة تنكد عليا عيشتي و كل شوية تطلب فلوس، بس ده حله بإذن الله سهل..دي بتعرف 3 لغات !!..أيوة كدة عشان تقدر نتكلم في وسط الناس من غير ماحد حِشري يفهم كلامنا !!
    ...
    مروة، و ده رجاء لأني بجد مش هأتحمل ، فكي أسرها من برميل الطرشي و انا هأرضى بيها بالسكر أو بالملح !!..بيني و بينك دي مش طيبة..دي شوية خباثة عشان تقول : و الله أحمد ده طلع جنتلمان ما رضيش بتعذيبي..هو ده اللي يستاهل حبي و أسكنه قلبي..اتصلي بالمأذون يا ميرو !!

    ردحذف
  2. أعيني عليك أسديكي

    حلال عليك يا معلم

    والحمد لله شكلها اتعلق بيك وموافقة عليك

    بس ازاي يا ميرو ماتعرفيش لعبة ورق الورد .. انا كضياء اتصدمت الحقيقة
    ههههههههههههه هههههههههههههههههه

    حلووووووووووووووة

    بالتوفيق دايما

    ردحذف
  3. هههههههههههههههههههه
    ياعينى عليك يا احمد
    ربنا يوفقك بقى وتتهنى انت وام سحلول وسحلول لما يجى ان شاء الله

    ردحذف
  4. ههههههههههه
    حلو البوست اوى يا ميرو وربنا يكون فى عون الاخ احمد بقى
    عسل يا ميرو
    تقبلى مرورى

    ردحذف
  5. صباح الغاردينيا ميرو
    هههههههههههههههههه
    ههههههههههههههههههه
    والله ضحكت وأخيراً عرفنا العريس
    يلا ياأحمد شد حيلك كلنا لهاههههه
    قصدي ألف مبروك ..
    ربنا يخليكي ياميرو على أجمل سعد بخفة دمك وروحك الحلوة "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  6. وبسم الله الرحمن الرحيم هنبتدى الليله ااااه اااااه
    عريسنا الزين كحيل العين وعروسة اهى حلوه جميله اااااه ااااااه
    الفرح الفرح والعريس العريييييس والعروسه احلا سلام للعروسه
    ( توررتو تو تررو رورو توروروتو تو )
    احلا سلام وتحيه من عندى انا لاخويا وشقيقى احمد بمناسبة جوازه من ام سحلول
    ياعم ده لسه ما اتجوزهاش دا يا دوب وافق بس على الجواز
    عرفنا يا سيدى بس ما دام الواد رايد العفريته والعفريته رايداه وموافقه يبقى انا اول من يحتفل بيهم والزفه من عندى .
    ( وفى الخلفيه سامعين صويت )
    يالهووووووووى ما كانش يومك يا حبيبيى
    اللى بيموت بيلبسله اسود
    واللى بيعيش بيلبسوله اسود
    طب واللى هيتجوز ام سحلول يلبسوله ايه اديداس اديداس

    وتعقيبا على ما مضى لن اقول الا كما قال ضياء فى رائعته

    اعينى عليك اساحبى

    ههههههههههههههههههههه


    بجد بوست جامد

    تحياتى

    ردحذف