جاءنا البيان التالى

أيها العريس المنتحر 

انتبه

 جاءنا البيان التالى

       

بعد أن أصبحت مشكلة أم سحلول النفساوية حديث الفيسبوك والمدونات .. وبعد أن تعاطفتم معها و تطوعتم مشكورين لحل مشكلتها

وبعد التحليل الدقيق والنظرة المتأنية الفاحصة المتفحصة لنفساوية أم سحلول العدوانية المدمرة

الحمد لله أخيرا بعد طول انتظار .. انقشعت الغيوم وظهرت النتيجة التى تؤكد اصابة أم سحلول بمرض جنون العفاريت

أصدقائى المنتحرين

أنا ميرو طبعا افتكرتونى ولو مش افتكرتونى .. افرحوا وهيصوا لأن أكيد أكيد هتستريحوا

بصوا بقى ياحلوين ياللى افتكرتونى وان شاء الله هتتجننوا معايا 

( أصل أنا مش هتجنن لوحدى .. ولا ايه يبقى لازمة الصداقة ؟؟ )

المهم سيبكم من الكلام المعقد اللى فوق ده بتاع جاءنا البيان التالى وركزوا معايا ..

بصراحة كده نتيجة التحليل النفسى لأم سحلول بين انها

عفريتة طيبة بس مجنونة شويتين تلاتة يعنى من الأخر كده ومن غير لف ولا دوران فيوزات مخها ضربت خلاص ودية للأسف مش هعرف أعالجها ..

أنا قلت أقلكم علشان مبقاش بخدع العريس المنتحر .. بس متخافشى انت ممكن لما تتجوزها توديها لكهربائى شاطر وربنا يسهل يمكن يحصل على ايده الشفا

وعايزاكم بقى تفرحوا لأن أم سحلول عندها مميزات كتير تجنن

و أهم ميزة بقى بتميز أم سحلول عن باقى العفاريت هى حقدها وغيرتها الشديدة من كل البنات اللى فى دنيا البشر ودنيا العفاريت .. وطبعا ده من حظ العريس المنتحر لأن أم سحلول هتمارس عليه ميزتها دية بعد الجواز

يعنى لو فكر مجرد تفكير انه يعمل لايك أو يكتب كومنت أو يدردش فى الشات مع بنت غيرها هتعفرتلهم الأكونت ودية أقل حاجة عندها طبعا

أنا قلت أفرحكم وأرفع من روحكم المعنوية علشان تنتحروا بنفس .. وربنا يكون فى عونكم  بقى

أم سحلول :

ما تخلصى بقى يا ميرو وتبطلى رغى .. عايزة أتعرف على عريسى ؟؟

ميرو :

أنا رغاية يااااا .. ولا أقلك أنا مش هرد عليكى .. ربنا يسامحك 

أم سحلول :

يااارب .. بس ليه الأدب ده يا ميرو ؟

ميرو :

برده مش هتستفزينى .. اعوذ بالله منك يا شوشو .. بصى يا ستى .. رمضان جى وأنا عايزة أتدرب انى أمسك لسانى شوية

أم سحلول :

أه علشان كده .. فهمت ياذكية

ميرو :

أه يا ختى .. هو أنتى فاكرنى عبيطة علشان أخليكى تاخدى حسنات على قفايا

المهم سيينى بقى أكمل شرح نفسيتك الشريرة
كنا بنقول ايه ؟؟
أه بعد بقى ما بحثت وحللت ودققت ..
لقيت أسباب غريبة جدا خلت أم سحلول بقت عصبية ومجنونة وغيورة
أم سحلول ومن هى عفريتة صغيرة وهى بتحلم بفارس الأحلام
والعبيطة كانت فاكره نفسها سندريلا وفارس الأحلام المنتظر هو الأمير الوسيم

( عبيطة ايه بس ؟؟ .. أنا قلت همسك لسانى .. الله يخربيتك يا أم سحول .. يوووووووه بقى .. أمسكه ازاى ده ؟؟ )

أم سحلول :

هع هع هعوع هعوع

ميرو :

حلوة الضحكة الشريرة دية .. جبتيها منين ؟؟

أم سحلول :

قريتها فى كتاب عفريتى شرير جدا .. صحيح كان فى حد من أصحابك بيقول انى طيبة .. ابقى خليه يسمع الضحكة الشريرة دية علشان يترعب ويوصلى بسرعة

ميرو:

ماشى يا مثقفة
بقلك ايه هو انتى عرفتى قصة سندريلا والأمير الوسيم منين ؟؟

أم سحلول :

كنت بهرب من مدرستى الألمانية وأنا فى ابتدائى وأروح ...

ميرو :

من ايه يا ختى ؟ ألمانية ايه ؟ احنا هنبتدى الجوازة بالفشر والكذب ؟

أم سحلول :

وأنا هكدب ليه ؟ خلينى بقى أكمل
كنت بروح دنيا البشر عندكم وأتفرج مع العيال المقاريض .. أصلنا كنا لسه معندناش تلفزيون
لما بقيت فى اعدادى ورحت المدرسة الفرنسية بقى عندنا تلفزيون

ميرو :

ايه ؟؟؟

أم سحلول :

استنى بقى يا ميرو خلينى أكمل
ولما كبرت ورحت الجامعة الأمريكية بقى عندنا بقى مكتبة .. بروحها على طول .. أصل أنا عفريتة مثقفة

ميرو:

من الواضح كده ان فيوزاتك ضربت الأخر ولازم نلحقك ونجوزك بسرعة
وكنتى  فين بقى فى  الثانوية العامة ؟
أم سحلول :
معندناش .. لغيناها من المراحل الدراسية
انتى عايزانا نكرر غلطكم ؟
لأ احنا ناصحين أووى
ميرو : 

غلط ايه يا حجة ؟

أم سحلول :

أصل احنا لا قينا العيال عندكم لازم ياخدوا دروس خصوصية ويتجننوا ويشدوا فى شعرهم علشان يجيبوا مجموع كبير ويدخلوا كلية كويسة وبعدين يتخرجوا ويقعدوا فوق السطوح أو على القهاوى يبصوا للسما و يعدوا النجوم
فقلنا بقى نخلينا ناصحين ومنكررشى الغلط بتاعكم علشان احنا معندناش نجوم يعدوها

ميرو :

طيب يا فلحوصة اقعدى ساكتة شوية خلينى أكمل


المهم يا أصحابى أم سحلول استنت كتير الأمير الوسيم .. ففقدت الأمل انه يجى ووافقت تقابل العفاريت الكتير اللى اتقدمولها
 انتوا عارفين طبعا انها قمورة جدا وما شاء الله عليها تتحب بسرعة
بس للأسف مكانشى بيحصل نصيب

ميرو :

اتفضلى حضرتك اشرحيلى ليه مكانشى بيحصل نصيب؟
أم سحلول :
ما دام قلتى حضرتك .. يبقى مش هكسفك وهفهمك بس فتحى مخك معايا شوية

( عفريتة تنكة )

بصى يا ستى أنا اتقدملى ناس كتييييير وصحيح أنا رفضت أكترهم بس و حياة مامتى العفريتة مش افترى وتناكة
أنا هقلك وانتى احكمى فى الأخر

1)

أول واحد فيهم بتاع ( وهى عاملة ايه دلوقتى )

ميرو :

وماله ده كمان ؟؟ مش دية تقريبا أغنية عمرو دياب ؟؟
أم سحلول :
أه
ده يا ستى حب البت جارتنا 

ميرو :

واسمها ايه دية ؟

أم سحلول :

هيكون اسمها ايه يعنى ؟؟
اسمها المايصة أصلها عفريتة مسهوكة ومدلعة من بتوع ميلودى اللى عندكم دووول

ميرو:

ميلودى .. يبقى نسميها زعبوبة

أم سحلول :

انتى بتجيبى الأسماء دية منين ؟

ميرو :

يا بنتى انتوا عفاريت .. يعنى مش هينفع أسميكم أسماء فرافيرى .. المهم عملت ايه زعبوبة مع الأخ ده ؟؟

أم سحلول :

مقصوفة الرقبة بقت تقفله فى البلكونة .. تتسهوك وتتدلع وتشاورله لحد ما وقع لشوشته وادلق زى الجردل وحبها المنيل على عينه .. وبعدين فلسعته .. اديته استمارة ستة

ميرو :

وده ماله بقى بيكى ؟
أم سحلول :
أصل يا ستى علشان يخليها تغير جه خطبنى أنا .. وبقى هيجننى
شوية يتكلم عنها وحش ويروح قايم ضارب نفسه بالقلم وهو بيلعن اليوم اللى شافاها فيه فى البلكونة .. وشوية يحس بالذنب ويفتكر انه ظلمها ويقعد يحكيلى عنها ويقول عنها حاجات جميلة ويقلب لعمرو دياب ويفضل يغنى ( وهي عامله ايه دلوقت ومين هون عليها الوقت قولولي لو في صالحها ... اروحلها واصالحها ) .. وبعدين يقوم زى المجنون ويصرخ :
 انتى كمان زيها .. كلكم خونة .. هقتلكم كلكم

ميرو :

ياااربى أنا شفت الفيلم ده فين قبل كده ؟؟
الله يخربيت الزهايمر ده

أم سحلول :

ولا أنا فاكره بس لو كنتى سمعتى كلامى وبطلتى ادمان النسكافيه ده كنتى افتكرتى ومتعبتنيش معاكى

ميرو :

أعوذ بالله منك يا شوشو .. يارب خلينى هادية ومخنقهاش .. كملى يا ختى عملتى معاه ايه ده ؟؟

أم سحلول :

حصلى ازبهلال وقلت أنا كده هتجنن فقلت يا فكيك

ده عايزله دكتور نفساوى .. ممكن لما تخلصى علاجى .. أبقى أبعتهولك تعالجيه .. مش انتى برده ناوية تعملى مستشفى للمجانين ؟؟

ميرو:

أه يختى .. بس دية مستشفى للبشر

أم سحلول :

معلشى يا ميرو .. ابقى اعملى قسم فيها للعفاريت .. وأهو تكسبى ثواب فينا وهنيالك يا فاعل الخير والثواب

ميرو :

مش قلتلك قبل كده بطلى أسلوب الشحاتة بتاعك ده ؟ .. كملى بقى خلصينى بدل ما انتحر أنا

............

2 )

أم سحلول :

التانى بقى يا ستى كان مصاب بمرض خطير

ميرو :

لا حول ولا قوة الا بالله .. وده كان عنده ايه ؟

أم سحلول :

كان مصاب بالخرس .. عامل زى التليفون على السيلانت على طوووووووووول

ميرو :

هما مش بيقولوا الخرس الزوجى ده بيبقى بعد الجواز

أم سحلول:

ربنا بيحبنى وبانت أعراضه بدرى واحنا فى مرحلة الخطوبة
انتى عارفانى رغاية ومش بعرف أسكت .. ده أنا حتى عاملة عرض كلم 6 أصحاب بــ 6 قروش للدقيقة وطول الليل والنهار دودودو دودودو لحد ما بتهد وأنام

ميرو :

أه أنا عارفه .. ( يارب هدها ) .. قولى أمين يا أم سحلول

أم سحلول :

آمين .. كنتى بتدعيلى .. ربنا يخليكى ليا يا ميرو يارب

ميرو:

كملى
ده عملتى معاه ايه ؟

أم سحلول :

قلت خلينى أجرب وأعمل محاولات لاصلاح زرار ال mute اللى علق عنده ده .. يمكن يكون مخاصمنى
ورحت غنتله
( فضلت احيلة مايردش اقولة ياعم مايردش اقولة يا سيدى مايردش)
اعملة اية تانى بقى ؟؟
اولع فى نفسى

وبعد شوية من المحايلات .. عطف عليا وخلى واحدة بنت حلال ترد عليا وتقول ( يا حجة قلنالك إن الرقم المطلوب غير متاح حالياً ربما يكون مغلقاً أو خارج نطاق الخدمة .. من فضلك متتعبيش نفسك وتحاولى الاتصال تانى .. ربما يكون مات )

ميرو :

يا مفتريه جبتيلوا سكته قلبية

أم سحلول :

وأنا مالى ياختى
الله يرحمه بقى المأسوف على شبابه كان عيان بمرض خطير والحمد لله انه رحل قبل ما يعدينى بفيروس الخرس

ميرو :

طيب فى حد تانى ؟
......

4)

أم سحلول :

أه طبعا لسه سى السيد
ده بقى عنده جينات التحكم زيادة شويتين تلاتة
متقمص أوى دور سى السيد وعايزنى أبقى أمينة
قلت خلينى هادية وغنيتله أغنية سعاد حسنى ( البنت زى الولد مهيش كماله عدد )

برده لقيت مفيش فايدة وحسيت اننا داخلين حرب .. فقلت لازم أطلع منتصرة .. وطبعا الهجوم خير وسيلة للدفاع .. وبدأت بوصلة ردح معتبرة

قلتله لأ يا بابا .. أنا انسانة مش جارية عندك وبعدين تقمصت دور واحدة من اللى بينادوا بالمساوة بين المرأة والرجل ورصيتله كلام كتير مش فاكراه دلوقتى وبعدين بقى زودت من عندى شوية وصوتى بقى جلجل وأنا بنادى بحق المرأة فى شرب الشيشة تفاح
طبعا هو طلع واد عيل ومقدرشى يستحمل أول مواجهة 

ميرو :

مات هو كمان ؟

أم سحلول :

لأ خد ديله فى سنانه وفلسع
والله يا ميرو رجالة غريبة .. بيجربوا ليه بدل هما أصلا مش عارفين يمثلوا دور سى السيد ؟؟
ولو افترضنا انهم مثلوا صح ..ما يستحملوا بقى اللى يجرالهم

ميرو:

لأ يا ستى الطيب أحسن .. كويس انه فلسع .. كده أحسن بدل ما تتجوزوا وبعدين تفرجوا الناس عليكم
 ............

 5)

أم سحلول :

أخر واحد بقى يا ستى شحات ومش حلته حاجة ودايما كان يبعتلى كلمنى شكرا

ميرو :

يا ستى خدوهم فقراء يغنيكم ربنا

أم سحلول :

والله يا ميرو أنا قلت كده برده وطولت فترة الخطوبة سنة واتنين وتلاتة .. كل يوم يجى يتغدى ويتعشى عندنا ونجيب جاتوه وحاجة ساقعة .. ده حتى كمان كنت بجيبله من النسكافيه بتاعك
ولما أجى أكلمه فى الجواز .. يتنرفز ويبصلى من فوق لتحت ويقلى حاسبى على كلامك .. انتى مش عارفة بتكلمى مين ؟
وفى الأخر بعد ده كله حضرته راح سافر يشتغل فى بلاد الغربة ومشى على حل شعره مع واحدة أوحش منى بعد ما حجزنى 5 سنين ووقف حالى .. الهى يوقف حاله يارب

ودلوقتى بقى أمى وأبويا وقرايبى العفاريت بيتهمونى انى تنكة ومغرورة ومش عاجبنى حد وبفكر بعاطفتى أكتر من عقلى
يعنى مثلا يرضيكى يا ميرو أتجوز عفريت عجوز ومكحكح علشان خاطر معاه فلوس كتير ؟

ميرو :

بصراحة يا أم سحلول صعبتى عليا .. علشان كده بقيتى وعصبية وحساسة جدا ومش بتستحملى كلمة من حد و

أم سحلول :

كملى كملى متكسفيش .. شريرة وضربت فيوزاتك

ميرو :

يا ستى أنا مقصدشى .. أنا قصدى ان كل اللى بيحصلك ده بسبب انك بقيتى عانس

أم سحلول :

فى ايه يا ميرو ؟ ما تاخدى بالك من كلامك شوية .. الملافظ سعد
ده انتى  لسه كنتى بتقولى عايز أمسك لسانى علشان خاطر رمضان .. ولا هو كلام وبس ؟

ميرو :

ما قلنا منقصدشى بقى وعلى فكرة كمان عندهم حق انتى عفريتة تنكة

أم سحلول :

كده يا ميرو أنا تنكة .. اهىء اهى ء .. مكانشى العشم تيجى منك اهىء اهىء

ميرو :

على فكرة مش هتصعبى عليا خالص ومش هتهدد كمان من دموعك اللى هتغرق المدونة
أم سحلول :
ماشى يا ميرو .. أنا همشى ومش هتشوفى وشى تانى 

ميرو :

فى داهية .. البلد اللى تودى ..
 أم سحلول استنى

أم سحلول :

اهىء اهىء .. لأ اعتذارك مرفوض

ميرو:

ومين اللى قال انى ناوية أعتذرلك أصلا ؟
أنا كنت عايزة أقلك .. اقفلى باب المدونة وراكى علشان زعبوبة وحبيبها المجنون قاعدين بره .. وبصراحة أنا مصدقت خلصت منك

أم سحلول :

ماشى ياميرو.. مع السلامة

ميرو :

مع ستين ألف سلامة

الحمد لله ارتحت من أم سحلول وقرايبها وعرسانها المجانين .. وكمان أصحابى مش مضطرين ينتحروا ويتجوزوها

أم سحلول :

ميرو .. ابقى قولى لعرسانى المنتحرين فى الفيوتشر انهم لو عندهم أى أسئلة يسألوا وميتكسفوش وأنا هضطر غصب عنى أقعد معاكى تانى .. مع انى اتخنقت منك بس هستحملك علشان خاطرهم مرة تانية علشان أجاوب على أسئلتهم
ومتخافيش هقفل الباب ورايا ..
 سى يو يالا باى

ميرو :

مين ياختى ؟؟
فيوتشر و سى يو يالا باى

طيب منك ليهم بقى ؟
سيبى مدونتى وانصرفى بقى
أنا تعبت حرام عليكى اعتقينى لوجه الله

أنا كده هتجنن ..

أكيد انتوا فرحانين فيا

حقكم ما أنا اللى جبت ده كله لنفسى 

على فكره من غير محد يشتم 

المدونة لسه متكهربة  يعنى  مش مسموحلكم بالهرووووب 

وأنا بقى أمرى الى الله هروح أشرب مج كبيييييييير نسكافيه وأجى أستقبل  أسئلتكم لأم سحلول 
 أصل هيا عطفت عليا وشغلتنى عندها سكرتيرة