الأحد، 8 يوليو 2012

أمنية ولكن !

أوقات كتير من كتر الوجع بنفقد القدرة على الكلام والشكوى  أو حتى البكاء
بنتمنى ان حياتنا تنتهى علشان نرتاح من الألم .. وحتى كمان بنتمنى ان  لو كان فى ايدينا الاختيار  اننا مش نتولد أصلا .. وممكن كمان تفكيرنا يوصلنا للانتحار لكن بنوقف التنفيذ  علشان خوفنا من عذاب ربنا لما نموت كافرين
كل الألم والتفكير ده بيوصل للموت .. نهاية حياتنا .. هى دية الأمنية اللى هتريحنا من الألم والوجع
لكن لما بتقرب الأمنية مننا بطريق غير مباشر .. لما حد قريب منك بيموت
وقتها تفكيرك بيختلف .. بتحط نفسك مكانه .. بتسألها
لو انت مكانه .. هتفرح لأن أمنيتك هتتحقق ؟
مش عارف
ليه هو انت حابب تعيش ؟
لأ بس خايف 
طب انت عايز تموت ؟
مش عارف .. يمكن أرتاح
انت واثق انك هترتاح ؟
مش فاهم .. قصدك ايه ؟
يعنى انت زى ما تولدت .. الطفل البرىء اللى مش عمل ذنوب ؟
مطمن انك هتدخل الجنة ؟
هتقدر تقابل ربنا وتقله أنا تعبت وعايز أرتاح .. عايز أدخل الجنة ؟

كلنا بنتعب ونتألم ونوصل لمرحلة اليأس ولما حد يجى يكلمنا عن الأمل بنبصله باستغراب ولسان حالنا بيقول ( انت مصدق اللى انت بتقوله ده ؟ )

 احنا مش الطفل البرىء اللى مش ارتكب ذنوب علشان يتمنى الموت
ومش كلنا الانسان اللى متمسك بالحياة وعايز يعيشها ونفسه يعمل حاجات كتير

بنعيش ونرتكب ذنوب وبنعمل حسنات ..  بس مش يمكن يجى وقت نلاقى نفسنا بنعمل حسنات أكترمن الذنوب  .. مش يمكن يجى الوقت اللى نحب حياتنا ونقدر نتصالح مع أنفسنا
ليه بنختار الطريق السهل .. ليه منحاولشى نقرب الوقت ده علشان لما نموت نستاهل الراحة ؟؟

اللهم لا تقبض أرواحنا الا وأنت راضى عنا )


هناك 8 تعليقات:

  1. اللهم آميــــن..
    ..
    ممكن جدا و لكن ليس بالتمني و لكن بالعمل و السعي، كرهنا لحياتنا و تمنينا للموت ليس حل و لا راحة فهو في كل الاحوال لن يغير شئ، أما اعادتنا لجميع حساباتنا في حياتنا يعطينا فرصة للتعويض لصنع نوع من التوازن بين السيئ الذي مر و بين الحسن الذي بدأنا فيه للتو، و الأكيد اننا اذا استمرينا في الطريق الحسن سيتضاءل جدا أمامه الجزء السيئ..
    ..تحياتي

    ردحذف
  2. مفيش حد راضي بحاله و عين ابن ادم مش بيملاها غير التراب
    لو كل واحد حس بالرضا هيلاقي السعادة اللي بيتمناها و مش هيفكر انه يتمنى الموت
    تحياتي

    ردحذف
  3. اللهم آمين

    احنا هنعيش ونموت واحنا مش راضين بحالنا
    اللى وارد جدا يكون غيرنا اصلا بيتمناه واحنا مش حاسين

    ردحذف
  4. صباح الغاردينيا ميرو
    كلنا بنزعل من الدنيا بنحتج على ظروفنا بنعاتب انفسنا وساعات بنخاصمها ونتمنى بجد نموت لما بنزعل أبسط كلمة بنقولها " يارب اموت " بس بجد لو متنا حنرتاح لو متنا بالغلط والذنب حنرتاح الي افضل من دا كله نحاول نحسن ظروفنا ونتقرب من ربنا عشان ساعتها بس هنعرف الراحة الحقيقية "
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
  5. اللهم آمين

    الحوار الداخلي اللي كتبتيه عجبني أوي يا ميرو
    والإحساس اللي في كل سطر واصل أوي للي يقرا


    تسم إيدك

    ردحذف
  6. سبحان الله
    توارد الخواطر جائز جدا
    وكأنك تكتبيننى
    أتصدقين اننى كنت اكتب بالامس موضوع بعنوان ( الاتساق مع النفس )وتقريبا كان يدور هذا الحوار فى ذهنى
    ولكن بجد احييكى على قدرتك الرائعة فى التعبير عما يدور فى انفسنا وبلورة هذا الاحساس الى كلمات
    دمتى ودام ابداعك

    ردحذف
  7. احيانا الحياه بتكون قاسيه علينا بس ده جزء منها ما ينفعش ننلغيه فيها المهم الصبر وتعدي كل المحن ان شاء الله
    تحياتي

    ردحذف
  8. شكرا على مروركم وتعليقاتكم الجميلة

    ردحذف