الخميس، 5 يوليو 2012

حكايات لاسعة



 الفكرة حلوة أوى 
بس بما انى   مش عرفت أجاوب على أكتر الأسئلة  فأنا قلت بقى أضحك عليكو وأوجع دماغكم بشوية تدوينات قديمة بحبها وشوية حكايات لاسعة


 الفراق ليس نهاية الحب والصداقة    

 http://moment-hopes.blogspot.com/2012/04/blog-post_12.html

 بحب  التدوينة دية جداا علشان  بتفكرنى بأصحابى من الكلية 

 صرخات من أعمق أعماق النفس البشرية

حلو أوى اننا نحس بغيرنا .. ونحاول نقرأه من جوه .. ومش ننتسرع ونحكم عليه من صفاته المكتسبة من مشكلة بيعيشها وبيحاول يخبيها بتصرفات ورد فعل بيكون غريب وقاسى .. وأكيد الغلط هيكون مننا احنا لانه لو حس معانا بالراحة .. بشوية دفى انسانى .. مش هيتصرف كده وبالتالى هنقدر نساعده

خربشات قلم مجنون

غالبا بتفهم غلط .. بيقولوا انى غامضة وده يمكن علشان مش عندى أسرار أو حاجة  مهمة أخبيها  .. فبيفتكروا ان ده غموض
 علشان كده كتبتلهم التدوينة دية


سسأظل كما أنا





جريئة خجولة ، واضحة غامضة ، متمردة مسالمة ، عنيدا مرنة ، بريئة مشاغبة ، حالمة واقعية ، حنونة  قاسية 
لن أهتم مهما تناقضت صفاتى فى نظر غيرى .. ولن أهتم اذا اتهمنى البعض بالغرور أو الجنون أو الغموض أوالقسوة أو.....  ، لن أنفى التهمة .. ولن أحاول إثبات العكس
فهذه أنا عندما أكون مع من لا يفهمنى .. أتكلم بلغة غريبة صعبة ، ولكن من يحبنى يستطيع أن يتعلمها 

ديه جزء من خاطرة ( سأظل كما أنا ) فى كتاب لحظات تأمل



غلاسة 




صحيت من النوم على صوت منبه التليفون الرخم اللى بظبطه كل يوم  على نفس المعاد . 

 وزى كل يوم سمعت  صوت غلس جوايا  بييقولى نامى تانى .. انت وراكى ايه يعنى .. وانت غاوية تعب وخلاص  .. ايه اللى يصحيكى بدرى كده .. هتروحى تبيعى لبن ؟؟
ومش بيسكت غير لما أنا أسكته وأرد  بغيظ وغلاسة أكتر من غلاسته  : 
انت مالك .. أه بحب أتعب نفسى .. وعند فيك مش هبيع لبن .. هبيع نسكافيه

الموضوع بقى انى مهما نمت متأخر لازم أصحى فى نفس الميعاد اللى بصحى فيه كل يوم  ( اللى هو الساعة 4 الفجر ) لحد ما بقى تقريبا معدل نومى 3 أو 4  ساعات .. ونفسى أعرف السبب الحقيقى لموضوع الغلاسة على نفسى ده
يمكن علشان بحب أكون صاحية فى الوقت اللى الناس  بيحبوا النوم فيه أو زى ما بتقول  أمى حبيبتى من كتر النسكافيه اللى بتشربيه بيخلى دماغك صاحية وارحمى نفسك شوية .. أو يمكن علشان دماغى على طول شغالة ومش بتحب تنام كتير..   أو لأنى اتعودت من أيام الكلية بقى الله يسامحها الصحيان بدرى .. كنا دايما بنصحى الفجر علشان نروح المحاضرات الساعة 8 بالظبط 



شريرة جداااا


انتصرت على نفسى المتمردة  وقمت من السرير وبعد شوية سمعت صوت دوشة فى المطبخ .. رحت أشوف ايه الحكاية .. يمكن يكون حرامى يقوم يتخض من شكلى وأنا لسه صاحية من النوم ويطب ساكت

  المهم رحت ومش لقيت حرامى (  حظه حلو ..أمه دعياله ) 

لقيت  خناقة كبيرة بين النسكافيه والشاى
برطمان النسكافيه ماسك سكينة .. وبرطمان الشاى ماسك شوكة .. والحلل والأطباق بيحجزوا بينهم والمعالق الصغيرة عمالة تتنطط فرحانة
 النسكافيه عمال يضحك ويغيظ  الشاى ويقوله ميرو هتشرب منى أنا مش منك انت .. والشاى عمال يعيط ويقوله والله لأقتلك .. ميرو وعدتنى امبارح انها هتشرب منى أنا .. بصراحة أنا صعب على الشاى بس هو كداب لأنى مش وعدته
المهم فى الأخر لأنى شريرة ومدمنة نسكافيه .. شربت نسكافيه وسبت الشاى يعيط وقلتله يا عم غير من  نكهاتك شوية.. اتعلم من النسكافيه وبطل كدب بقى ..  هو أنا هشربك شفقة


بس بعد شوية رحت صالحته .. وأكيد يعنى مش علشان خاطر صعب عليا 
لكن علشان أنا بموت فى  البسكويت بالشاى بتاع الأطفال 
 طبعا انتوا فاكرين انى بمسك البسكوتة وأغمسها فى كوباية الشاى
لأ مش كده خالص .. لأ أنا مش بنوتة رقيقة وطيبة كده ..  وهى هتخلص منى كده بسرعة .. لأنى أنا شريرة بحب أعذبها قبل ما أكلها 
أنا هقولكم الطريقة الصح وأدينى أكسب فيكوا ثواب وأعلمكم شوية شر ينفعوكم
بصوا انتوا تجيبوا كوباية الشاى وكيس البسكويت من غير ما تفتحوه وتتجيبوا شاكوش وتنزلوا بيه على كيس البسكويت لحد ما يبقى فتافيت  .. وبعدين طبعا تفتحوه ده لو ما تفتحتش واتبعتر منكم فى كل حتة شوية وتفضوا فى الكوباية وبألف هنا وشفا


 احساس بالذنب بيخنق





القراءة والكتابة والرسم هوايات جميلة جدا بحس انى   معاهم  كذا شخصية .. ساعات ببقى مجنونة أو مضحكة أو رومانسية أو كئيبة أو واقعية أو ... بس المشكلة انها بتخلينى أحب دايما أكون فى عالم لوحدى .. بفضل  السكوت على الكلام .. الهدوء على الدوشة  ......ز
ودية بقى المشكلة .. لأنى ببقى خنقة ومملة لو حد حظه وحش واضطر يتكلم أو يقعد معايا   .. بفضل ساكته .. وبيصعب عليا وبقعد  أفكر أكلمه فى ايه .. وفى الأخر مش بلاقى .. المهم فى النهاية بحس ناحيته بالذنب





مستشفى للجنون والادمان
 



لأنى مدمنة نسكافيه وأكتر الأوقات  دماغى بتلسع وببقى شريرة جدا .. فنويت انى أعمل مستشفى  تجمع المجانين وتعلم ادمان النسكافيه
علشان نبقى كلنا مجانين زى بعض
علشان كده  اللى عايز يدخل المستشفى لازم تكون عنده نية للادمان  وأوعده هيبقى شكله زى الولد الأمور ده .. والمفاجأة اللى تجنن ان أم سحلول هتكون معانا فى المستشفى











هناك 6 تعليقات:

  1. :)))))))))))))))))
    ايه الكلام اللي يهبل ده :D
    وتحياتي لام سحلول

    ردحذف
  2. ههههههههههههه
    بصي بقى لازم تعذريني .. بضطر كل مرة قبل ما اعلق اضحك D:

    بشوية تطوير يا ميرو متأكد هيبقى عندنا أديبة ساخرة من الطراز الأول.. مش عارف لو بتقرأي لمحمد عفيفي وأحمد خالد توفيق وأحمد رجب .. بس لو لاء .. ارجوكي اقريلهم.. هيفرق معاكي كتير :)

    مبسوط جدا إني (قرأتك)في البوست دي

    وليا طلب صغنطط..

    احجزيلي جناح في المستشفى D:D:D:

    ردحذف
    الردود
    1. بس كده انت تأمر
      واضحك براحتك .. أنا سعيدة بسعادتك
      قرأتلهم بس مش كتير
      حاليا أنا بكتب عن الواقع البديل وواخد تفكيرى كله بس ان شاء الله هحاول أعمل بنصيحتك لأنى ساعات بتجنن وبحب أكتب بالطريقة دية

      شكرا على النصيحة وعلى متابعتك وكلماتك الجميلة المشجعة

      حذف
  3. أولا احجزي لي مكان في المستشفى..مش عشان بحب النسكافية و لا عشان عندي نية للإدمان..بصراحة و من الاخر و على بلاطة عشان أم سحلول هتبقى هناك !!
    ...
    تخيلي أنا تقريبا زييك، ممكن أتني 3 سنين من غير ما أتكلم سواء لوحدي أو في وسط الناس؟بس ده مش في كل الأحوال يعني لو الكلام فاضي بأفضل الصمت-ماليش في الرغي يعني-لكن لو الحوار هادف بالاقي نفسي بأتكلم بحماسة جامدة اوي !!
    ..
    ما صورتيش خناقة الشاي و النسكافيه فيديو؟ كان نفسي أوي أشوفها !!
    ..
    رجعتينا لأيام زمان !! شاي و بسكويت..دا كتير أوي ..انا كدة هاعيط !!
    ..
    بالنسبة للنوم انا هنا في البيت بأنام و اصحى بظروفها، لكن لما أكون في شغلي في الصحراء بأصحى في ميعادي و لو كنت نايم حتى قبلها بساعة..المسئولية بقى !!
    ...
    المشكلة ان الواحد لو علق على كل اللي انتي كتباه مش هيخلص !! كفاية كدة !!
    تحياتي

    ردحذف
    الردود
    1. تمام كده بقينا 4 فى مستشفى المجانين ..
      أنا مش بحب الكلام عموما بس فى الكتابة بتحول لشخصية تانية خالص
      خناقة الشاى والنسكافيه كانت جامدة جدا بس للأسف مش عرفت أصور حاجة .. كل واحد فيهم كان ماسكنى من ايد وبيتحايل عليا أشربه .. أصور أنا ازاى بقى
      لأ معلشى بلاش عياط كفاية أم سحلول مغرقالى الفيس والمدونة بدموعها
      فعلا المسئولية بتجبر الانسان على حاجات تيييير .. بس أنا فاضية بقى ومش ورايا حاجة غير انى أحل خناقات النسكافيه والشاى

      شكرا جدا على تعليقاتك الجميلة
      دايما بستمتع وأنا بقرأها وأرد عليها
      وأم سحلول فرحانة أوى انك عايز تدخل المستشفى علشان خاطرها .. مش بقلك كده هتدبس ونفرح بيكم قريب بس متنساش المدونة لما تروح دنيا العفاريت .. هستناك دايما تعفرتها

      حذف