الثلاثاء، 10 يوليو 2012

لولولولى .. عريسى جه .. أنا جايا أهو





 لولولولى .. عريسى جه .. أنا جايا أهو 
ميرو :
 أبوس ايدك يا شيخة ارحمينى بقى .. دماغى هتنفجر من الصداع  
أم سحلول : 
بعد الشر عليكى يا ميرو من الانفجار .. ان شاء الله كل البنات اللى اتجوزوا قبلى وانتى لأ
ميرو: 
وليه الحقد ده ؟؟ حرام عليكى ربنا يخليهم لعيالهم
أم سحلول :
 هما اللى يستاهلوا حد قالهم يتجوزوا قبل منى .. وكمان كل شوية يغيظونى ويسألونى بتناكة .. ايه لسه مفيش أخبار  جديدة ؟ مفيش عريس اتعمى واتكعبل فيكى ونوى يتجوزك شفقة حتى ؟؟
ميرو :
 طيب يا ستى أديكى دلوقتى هتغظيهم ..  بس وطى صوتك علشان فضحتينا فى الشبكة العنكبوتية
أم سحلول : 
 أصلا أنا فرحانة اووووى .. ان ربنا كرمنى وجبر بخاطرى وبعتلى بعد طووووووووول انتظار أكتر من عريس وكمان أنا اللى هتنك عليهم وأختار منهم واحد
بقلك ايه يا ميرو .. هو ما ينفعشى أتجوزهم كلهم ؟؟
ميرو : 
ده انتى شكلك من كتر الفرحة لسعتى وضربت فيوزات مخك .. بقلك ايه يا حجة اهدى شوية واعقلى علشان أنا أصحابى مش هيتجوزوا عفريتة مجنونة وركزى معايا علشان لسه هفهمك حاجات تعمليها بدل ما تفضحينا والعريس يطفش منك
أم سحلول :
 طيب ياميرو براحة شوية .. انتى هتزلينى ولا ايه ؟؟
ميرو : 
أه عندك مانع ؟؟
أم سحلول : 
ربنا يسامحك .. اهىء اهىء
ميرو : 
 يااااااااااارب يا حجة .. وقلنا بطلى بقى  عياط المدونة هتغرق ومش هتتجوزى خاااااااااالص


أصحابى الحلوين انتوا طبعا لسه فاكرين مشكلة أم سحلول النفساوية
واللى نسيها أو لسه مش قرأها يلحق نفسه ويقرأها  أحسنله .. علشان أنا مش ناوية أحكى تانى كفاية انى حاسة ان دماغى ورمت بسبب الزن اللى فوق دماغى




أم سحلول :
 ايه يا ميرو مالك بقيتى نرفوزة كده ليه .. خليكى طيبة مع العرسان بتوعى ولا انتى عايزة تطفشيهم ؟
ميرو : 
يعنى أنا دلوقتى اللى بقيت شريرة
مش انتى  اللى بقالك كذا يوم من وقت ما عرضنا مشكلتك النفساوية على الفيس والمدونة وانتى قاعدة تزنى عليا زى الدبانة اللى ناوية على موتها مع انى قاعدة أقلك ان مودى الأيام دية مش متظبط ومش ليا نفس أتكلم  كلام عفريتى  لكن انتى معندكيش دم خالص
أم سحلول : 
ما أنا عايزة أتجوز يا ميرو .. ولا انتى ناوية تخللينى ؟؟
ميرو :
أه فيه عريس من أصحابى طالب انى أخللك علشان هو مش بيحب البنات المسكرة  .. هبقى أكلمك عنه بعدييييييييين
المهم خلينا نتكلم جد علشان أخلص بقى من الحياة العفريتية اللى عايشاها دية
أم سحلول :
 كده يا ميرو .. عايز تخلصى منى بسرعة كده .. مكانشى العشم برده .. اهىء اهىء .. ده حتى لسه فيه تعارف وبعدين خطوبة وبعدين ..
ميرو: 
هو فيه لسه بعدين .. لأ يا حجة احنا معندناش بنات بتتعرف .. بيتجوزوا على طووووووووول وانتى وحظك بقى .. ياما البطيخة تطلع حمرا أو قرعة
واسمعى بقى اللى هقوله ربنا يهدك .. دماغى وجعتنى
أم سحلول :
 ان شاء الله حمرا ..  قولى يالا بسرعة .. أهو أبقى استفدت منك بحاجة قبل ما تنفجر دماغك
ميرو : 
ماشى يا مصلحجية .. هنتكلم جد .. دلوقتى احنا هنغير خطتنا الشريرة .. لأنى فيه شوية من أصحابى تطوعوا وناوين ينتحروا ويتجوزوكى .. يعنى مش هنضطر نعفرت الأكونت بتاع أصحابى  الكسلانين اللى مش علقوا
أم سحلول : 
طيب هو انتى يا ميرو وريتيهم صورتى ؟
ميرو :
 أه طبعا
أم سحلول : 
طب مش كنت قلتيلى علشان أحط شوية أحمر وأزرق  فى وشى علشان أطلع حلوة وأعجبهم
ميرو : 
يا نهارك الأسود .. عايزة تضربى دوكو فى وشك .. لأ يا أم سحلول احنا مش اتفقنا على كده ..  عايزانى أضحك على أصحابى وأغشهم .. لأ ياختى لازم يكون عندنا ضمير  .. يعنى العريس المنتحر لازم يشوفك على حقيقتك ..
 مش لازم يعنى تلغبطى وشك وتبقى  زى عروسة المولد علشان  تعجبيه .. يا عبيطة الجمال جمال الروح والأخلاق مش جمال المظهر والشكل .. وهو لو مش عاجبه شكلك ..  الباب العفريتى يفوت أشجع عريس منتحر   
وكمان ما هو بعد كده هيشوفك وأنتى لسه صاحية من النوم وشعرك منكوش ..  هيقول ايه بقى .. كنا بنخدعه مثلا  .. واما هيقعد يعيط ويقول هاتولى عروستى .. أو هيطب ساكت وترجعى تانى تعفرتيلى الأكونت علشان أشوفلك واحد منتحر تانى غير اللى قتلتيه
أم سحلول :
طيب ايه رأيك يا ميرو لو قصيت شعرى قصة جديدة  بس أنا  بحب شعرى الطويل ..  ولا أقولك  ألون كم خصلة كده ألوان مختلفة يعنى أحمر على أصفر على أخضر .. والله هيبقى شكلى يجنن
ميرو : 
يعنى أصوت أنا دلوقتى وألم الناس عليا .. ويقولوا البت بعد ما كانت عاقلة اتجننت
 الله يحرق العفاريت كلهم  والأكونت والمدونة ولا أقلك ليه حرام عليا لما أدعى على حد .. أنا هسيبلك المدونة والفيس وعفرتيهم براحتك 
أم سحلول : 
ايه يا ميرو زعلانة ليه .. هو أنا قلت حاجة غلط .. ده أنا غلبانة ؟؟
ميرو : 
أيوه .. هو انتوا كمان بتتفرجوا على أفلام 
أم سحلول : 
ومسلسلات تركية ولبنانية كمان  .. لسه حتى كنت بتفرج على مراد علمدار فى وادى الذئاب .. بصراحة مسلسل يجنن 
وكمان اتفرجت على البت روبى علشان أتعلم منها شوية شر .. تحبى أحكيلك اللى اتعلمته منها ؟؟ 
ميرو : 
لأ يا حجة متشكرين .. هو احنا كنا فين ؟
أه بصى يا حجة افهمى بقه ..   خليكى على طبيعتك .. الجواز ده رزق .. يعنى لو رزقك العريس المنتحر ده .. يبقى هيتعمى فى نظره ويحبك بشكلك ده اللى يقطع الخميرة من البيت .. هيحبك بعيوبك قبل مميزاتك .. ومش هيشوف غيرك فى الدنيا
وعموما يا ستى علشان ترتاحى وتريحينى من مسلسلاتك .. أصحابى كلهم قالوا عليكى قمر

أم سحلول :
 بجد يا ميرو هما شايفنى قمر
ميرو : 
أه يا بنتى وأنا هضحك عليكى ليه ؟ .. وبعدين خليك تقيلة وواثقة من نفسك وبلاش تدلقى كده ..
 ده انتوا خيبة أوى يا عفاريت الأيام دية
أم سحلول : 
ماشى يا ميرو هعمل كل اللى بتقوليلى عليه المهم أتجوز بقى  
ميرو :
بصى يا ستى بعد ما نختار العريس المنتحر .. هتتعرفوا وبعدين تحددوا ميعاد علشان يجيب هو عيلته علشان تتعرف على عيلتك العفريتية
هيجى بقى يا ستى هو والست الوالدة والسيد الوالد واخواته البنات و..

أم سحلول :
 كفاية يا ميرو .. هو هيجيب العيلة كلها .. بيتنا العفريتى صغير ومش هيكفى كل دووول .. وكمان احنا معندناش أكل .. خليهم يجيبوا أكل معاهم
ميرو:
 هنبتديها بالبخل
أم سحلول :
 مش بخل يا ميرو .. أصل احنا كل مرة نجيب جاتوه وحاجة ساقعة وعصاير .. وبعدين العريس ياكل هو وأهله الجاتو كله .. وأنا ببقى هموت على حته جاتوه بس بقول يابت عيب دول ضيوف ويمكن بعد كده نبقى أهل .. وبعدين يمشوا ولا بنبقى أهل ولا حاجة لحد ما بقينا  مفلسين وعلينا ديون و....
ميرو : 
خلاص خلاص انتى هتشحتى .. وأكيد العريس كمان مفلس ماهو زيك كل شوية يروح يخطب ويجيب شيكولاته وجاتوه .. خلاص  هبقى أجبلكم أنا وأمرى الى الله .. مع انى برده مفلسة بسبب ادمان النسكافيه .. شكلنا كده هنتجمع على باب المدونة نشحت علشان نجوزكم 
أم سحلول : 
صحيح يا ميرو هو انتى مش ناوية تتعالجى بقى من الادمان ده ؟؟
ميرو : 
وانتى مالك يا عفريتة يا حشرية انتى 
أم سحلول : 
خلاص يا حبيبتى براحة على نفسك .. أنا كنت خايفة على فلوسك بس
ميرو :
 أه كنت بفتكرك خايفة عليا .. (عفريتة مادية خايفة لفلوسى تخلص ومعرفشى أجيبلهم الجاتوه ويبقى شكلهم وحش قدام أهل العريس المنتحر )
المهم خلينا فى الزيارة اللى مش هتخلص دية  
 أول ما الباب يخبط .. وحياة أبوكى العفريت  بلاش تتهبلى وتجرى على الباب وتقولى ( عريسى جه .. أنا جايه أهو )
أم سحلول : 
أومال أسيب عريسى على الباب لحد ما يمشى ؟؟
ميرو :
 انتى هتستهبلى يا أم سحلول .. هو انتى هتقابليهم لوحدك .. أومال فين أبوكى وأمك العفاريت الكبار ؟؟
أم سحلول :
 طيب ماشى هخليهم هما يفتحوا  .. وهبقى أقف ورا الستارة علشان أشوفه كويس .. مش يمكن ميعجبنيش ؟؟
ميرو : 
بقلك ايه يا ختى بلاش تناكة .. واحمدى ربنا انه أصلا رضى ينتحر ويتجوزك
اهمدى بقى وخلينى أكمل الكلمتين دووول بدل ما انساهم
لما بقى الحجة مامتك   تنادى عليكى .. أبوس ايدك ياشيخة بلاش ضحتك الواسعة  اللى تجنن دية تتفتح من أول بقك لأخره بدل ما  يفتكروكى هتاكليهم ويهربوا من أولها ..
 ابتسمى برقة كده علشان الواد يدلق وبصى فى الأرض واعملى فيها مكسوفة شوية
أم سحلول : 
انتى بتلغبطينى ليه دلوقتى ..  مش قلتى خليكى على طبيعتك .. وبلاش تخدعيه ؟
ميرو : 
أه قلت ولسه عند رأيى .. بس أعملك ايه وانتى عفريته بجحة  ..  المفروض أصلا فى الموقف ده تكونى مكسوفة  وبما انك مش كده  فمثلى ياختى شوية مش هيضروا برده يمكن تتعودى بعد كده على الكسوف
أم سحلول :
 ماشى يا ميرو .. أنا مش عارفه ايه التعقيدات والعادات الغريبة  بتاعتكم دية
ميرو :
 أومال انتوا عندكم ايه ؟ .. ولا أقلك بلاش خلينا نكمل وأبقى أعرف بعدين .. بلاش فضايح
المهم هتسلمى على مامته .. حماتك المستقبلية .. وطبعا أول ما تدخلى هتلاقيه بقها بيتحرك .. متخافيش مش بتشتمك فى سرها ولا حاجة .. بس هى بتقول بسم الله الرحمن الرحيم .. وسلام قولا من رب رحيم .. ويمكن كمان تقرأ القرأن كله وبعدين لما تخلص  هتقلك انصرف انصرف
أم سحلول : 
يعنى كده لازم أستعدلها  كويس
ميرو :
 ليه يا حجة هو أنتى داخلة حرب ؟
أم سحلول :
 أه يا ميرو .. الحرب الباردة من حضرت الست حماتى .. أصل أنا عارفة الحاجات دية من العفاريت صحابى اللى اتجوزوا .. هتبدأها طبعا  بنظرات بارده ونار غضب مشعللة بتنط من عينها .. وكل شوية تقعد توشوش ابنها وتقله ملقتش غير العفريتة دية تتجوزها .. ما البنات الحلوين مالين دنيتنا .. جتك خيبة وانت ماسك فى عفريتة مش عارفين فين وشها من قفاها  .. وهاتك يارغى لحد ما الواد يطفش
 ميرو : 
ما انتى لازم تستحملى .. الحكاية مش سهلة عليها  .. ده انتى هتخطفى ابنها حبيبها لدنيا العفاريت
 أم سحلول :
 ماأنا هعمل كده .. هو انتى فاكرانى هبلة علشان أقع فى الفخ اللى هيا عاملاهولى وأتخانق معاها من أولها وأخلى الواد يهرب منى  .. أنا هحط قناع الطيبة والحنية وازيك يا ماما وحشتينى وأنا أصلا مش هبقى طايقاها   
بس هستحمل  لما اتجوزه وهطلعه عليه هو وأمه 
ميرو : 
وهتعملى ايه ياختى .. اشجينى اشجينى ؟؟
أم سحلول :  
 هبدأها  بالحرب المشعللة
( عصبية زيادة عن اللزوم + غضب أعمى  + غيرة مدمرة   ) هى دية بقى خلطة الحرب المشعللة الجامدة جدا
ميرو :
 يخربيتك يا أم سحلول .. ده انتى طلعتى مش سهلة خاااااااااالص وناوية تقلبيها حرب بين دنيا البشر ودنيا العفاريت
أم سحلول :
 أومال انتى فاكرانى طيبة وهبلة وعلى نياتى .. وبطى كلمة يخربيتك دية .. هو لسه اتفتح علشان تخربيه ؟
وبعدين  بقلك ايه يا ميرو خلى الخطة دية سر بينى وبينك علشان كده أصحابك هيكرهونىويطفشوا بعد ما عرفوا نيتى الشريرة
ميرو:
لأ أنا مش هخبى حاجة على أصحابى .. ومتخافيش هما اتدبسوا خلاص .. أصلى انتى متعرفيش الفخ اللى أنا وقعتهم فيه 
ومن غير متسألى هتعرفى بس الأول لازم  أدرس شخصيتك النفساوية المدمرة دية  وأعالجك 


أصحابى هقلكم على النتيجة المرة الجاية .. وعلى فكرة يا حلوين  مفيش هرباااااااااااااان .. المدونة والفيس متكهربين .. يعنى  انتوا اتحاصرتوا ووقعتوا فى الفخ خلاص
ولا أقلكم بصراحة كده ومن غير لف ودوران .. أنا عايزاكم تهربوا علشان تتكهربوا وتروحوا بسرعة علطول لدنيا العفاريت ونختصر بقى الوقت والجاتوه اللى هدفع فيه دم قلبى والزيارة والحرب الباردة وأحوش أنا بقى فلوسى للادمان .. صدقونى مش بخل .. بس انتوا عارفين الدنيا بقت صعبة أوى .. وكل شوية الحاجة بتغلى .. ده حتى النسكافيه سعره ولع .. بس أنا ناوية أشترى منه كميات كتيرة ولما  يخلص ويشح من السوق  ..  أبيعه أنا بقى   بأسعار غالية ..  الشمة .. قصدى الكيس ب 5 جنيه


مش برده فكرة تجنن  هههههههههههههههه
 على فكرة دية ضحكة شريرة أم سحلول علمتهانى .. شكلى كده بدل ما هعالجها .. هى اللى هتجننى 
مش مهم وهما المجانين أحسن منى فى ايه يعنى ؟؟

أكيد بتقولوا .. يووووووووه بقى .. التدوينة دية مش ناوية تخلص بقى 
خلاص  أخر حاجة .. تابعونى علشان تعرفوا مين هو فارس أحلام أم سحلول  واللى هيبقى أبو سحلول فى المستقبل ان شاء الله


هناك 14 تعليقًا:

  1. هههههههههههههه
    أنهار أزرق يا ميرووو

    دانتي طلعتي شريرة أوي على فكرة
    ههههههههههههههه

    على فكرة انا سحبت كلمتي .. احم .. $: ماتعمليش حسابي ف الليلة دي

    ردحذف
    الردود
    1. انسى يا ضياء .. كلامك طلع خلاص دنيا العفاريت واتوثق عندهم .. يعنى هتدخل فى قضايا ومحاكم عفريتى ويقولوا بتلعب بمشاعر البنت العفريتة ودمرت سمعتها ومفيش كده حد هيبصلها من العفاريت
      وبعدين متخافشى ده حتى أم سحلول طيبة وغلبانة وأنا هبقى أوصيها عليك
      ولو مصمم .. اهرب واتكهرب .. انت حر بقى .. هتوجع قلبى معاكم ليه

      حذف
  2. هههههههههههههههههههههههههههههههه
    البوست ده مشكللللله وربنا
    شوقتينى والله اعرف مين المنتحر اللى اتقدم لام سحلول
    اسلوبك لوحده بيضحكنى يا مروه بجد

    ردحذف
    الردود
    1. متقلقيش يادينا قريب جدا هنعرفه كلنا
      ربنا يسعدك دايما
      شكرا على مرورك

      حذف
  3. شكلك انتى وام سحلول اطيب من بعض علشان الضحكه الشريره نيهاهاهاهاهاااااا
    أما الجنان فدا امر ينظر فيه
    ههههههههههه
    سعدت بمتابعتك

    ردحذف
    الردود
    1. والله يا محمد أنا مش بحب أكتب الضحكة ( ههههه ) دية أصلا
      بحس ان بينى وبينها طار
      بالذات الضحكة لما بتتحس بتكون أجمل وأصدق ..ممكن أقعد أدوس على حرف الهاء من هنا للسنة الجاية وأنا أصلا أكون مخنوقة .. يعنى بضحك على نفسى وعلى اللى بكلمه .. غلبت أفهم أصحابى كده محدش راضى يفهمنى فيهم
      المهم الحمد لله علشان أصحابى يرتاحوا فشلت فى التعبير عن الضحة الشريرة كمان

      شكرا على مرورك وتعليقك الجميل

      حذف
  4. عسل يا ميرو اول مره اقرالك حاجه بالعاميه
    شبعت ضحك يا عسل
    حلوه القصه

    ردحذف
    الردود
    1. أم سحلول دايما فى الخدمة
      ربنا يسعدك ويفرحك دايما
      شكرا هبة على مرورك وتعليقك الجميل

      حذف
  5. يعني كدة واضح ان طريق الرجوع اتسد !!
    و انا أصلا ما كنتش ناوي على رجوع طالما بدأت طريق لازم أنهيه..و على فكرة بجد يا مروة أنا بأشكرك لأنك لمحتي لها على موضوع المخللات ده زمانها دلوقت غرقانة في بطرمان ..لأ..برميل طرشي !!
    و على فكرة..أنا ممكن أشيل عنك تمن الجاتوهات..وأجيب ساقع كمان..بشرط انك ما تديش عنوان ام سحلول لحد غيري !!..يعني أبقى العريس الوحيد عشان ترضى بيا !!
    ...
    و الله دايما باستمتع بحواراتك مع ام سحلول..و ان شاء الله هتنتهي بالرفاء و البنين..و التبات و النبات و الصبيان و البنات !!!

    ردحذف
    الردود
    1. أخيرا مروة من غير أستاذة
      الحمد لله .. يعنى كده أقدر أقول أحمد من غير أستاذ
      أنا بجد كده فرحانة جدا

      وعلشان خاطرى بقى لما تجيب الجاتوهات والحاجة الساقعة متنساشين فى الادمان بتاعى وأهو تكسب فيا ثواب وحسنة قليلة تمنع بلاوى كتيرة وهنيالك يا فاعل الخير والثواب .. ربنا هيرزقك بأم سحلول على طول

      دايما بيفرحنى تعليقك وبيشرفنى متابعاتك لتدويناتى المجنونة
      شكرا يا أحمد

      حذف
  6. مساء الغاردينيا ميرووو
    يانهار اسود اوعي يكون خطيبي بس هههههههههه
    دنا احرق المدونة والفيس :(
    <<< بتعيط "
    ؛؛
    ؛
    متابعاكي انتي والست ام سحلول دي
    انا برشح لها عريس لقطه ايه رأيك في مصطفى سيف دا مضرب عن الجواز عاوز له عفريته تجننه ههههههههههههه
    <<<< بتقول في نفسها يارب مايقرأ كلامها :) "
    ؛؛
    ؛
    لروحك عبق الغاردينيا
    reemaas

    ردحذف
    الردود
    1. مساء النرر يا قمر
      لأ من غير حرايق ان شاء الله مش هتقرب من خطيبك
      ربنا يسهل وونقنعنه بالجواز من أم سحلول

      شكرا ريماس على تعليقك ومتابعتك الدائمة لمدونتى

      حذف
  7. واضح كده ان اللي هيعلق هنا هيروح في ستين داهية هههههههه
    لا يا ستي انا مش ناوي انتحر انا ماشي
    جميلة التدوينة اوي و لذيذة كمان يا ميرو

    ردحذف
    الردود
    1. خلاص د/ مصطفى اتدبست
      ودخلت قائمة المنتحرين

      دايما بتنور المدونة بوجودك وكلماتك الجميلة
      شكرا

      حذف