الأربعاء، 4 يوليو 2012

أم سحلول ومشكلتها النفساوية

خير اللهم ما أجعله خير
( تؤتؤ ..  بداية مش حلوة .. هو أنتى حلمتى حلم وعايز حد يفسرهولك ؟؟ .. ياريت الموضوع كان حلم ولا كابوس وهصحى منه  .. ده أكبر من كده بكتييييييييييير   )

 كان يا مكان يا سادة يا كرام
( ايه اللى انتى كتباه ده ؟؟ انتى هتحكى حدوته .. ده العيال كده يناموا منك )

يوووووه بقى أنا هوجع قلبى  وأكل فى ظوافرى وأشد فى شعرى ليه ؟  مفيش بداية
 
بصوا بقى  يا أصحابى .. أنا كنت عايزة أمهدلكم الموضوع .. علشان بس مش تخافوا ولا تتخضوا  وبعد الشر عليكوا يجرالكم حاجة .. بس أعمل ايه بقى حاولت وفشلت .. علشان كده أنا عايزة أنصحكم نصيحة لوجه الله وأهو كله بثوابه
انتوا  لو نويتوا تقرأوا الحوار الجاى ده .. لازم تقرأوه لحد أخر كلمة وبعدين تعلقوا عليه  ..  ولو انتوا  من الناس اللى بيكسلوا يعلقوا زيى أنا .. يبقى لازم بعد ما تقرأوا  تروحوا بسرعة على قائمة أصدقائكم  وتمسحونى من عندكم وكمان المدونة تمسحوها من عندكم
خلاص كده اتفقنا .. أنا كده عملت اللى عليا وحذرتكم وكمان قلتلكم خيارين تختاروا منهم  .. ماليش دعوة بقى بأى حاجة تحصل ..
أنا مش بهزر على الفكر ة الموضوع خطير جداااا


ازيك يا ميرو
ميرو : انتى مين ؟
أنا العفريتة
ميرو : أهلا وسهلا
العفريتة :هو انتى مش خايفة منى ؟
ميرو : وأخاف منك ليه ؟ .. هو أنا أعرفك أصلا .. ده يا دوب لسه بنتعرف .. ومش قلتى غير انك


ايه ؟؟  أنا سمعت صح .. ( سلام قول من رب رحيم ) ..  الله يخربيت التوهان اللى أنا فيه ده .. دية قالت انها عفريتة .. 
عفريته ازاى يعنى ؟؟  )


عفريتة : عفريتة متعفرتة زى بقية العفاريت
ميرو : و عايزة ايه منى  ؟ ودخلتى عندى ازاى ؟
أنا مش فاكره انى ضيفت عندى عفريتة ولا طلبت صداقة عفريتة ..  هما العفاريت ليهم فى الفيس بوك  والشات .. ليكون انتوا احتليتوا الفيس بوك
العفريتة : أومال انتوا اللى ليكوا بس  ..  مالناش نفس نتعرف ونقول زيكم ( هاى ... ممكن نتعرف ؟؟ )
ده انتوا يا بشر طماعين قوى .. يا ساتر عليكوا عايزين كل حاجة ليكم وبس
ميرو : يا ستى أنا مقصدشى ..  اتعرفى براحتك وقولى هاى .. أنا مالى أنا .. انتى عايزة منى ايه   ؟
العفريتة : ماشى اعتذارك مقبول
ميرو : ايه العفريتة التنكة دية ؟
العفريتة : بتقولى حاجة
ميرو : كنت بقول يعنى لو أعرف سبب الزيارة الحلوة دية 
أصل أنا .. اهىء اهىء .. حالتى النفساوية وحشة أوى الأيام دية .. اهىء اهىء
وسمعت انك كنتى نفسك تبقى دكتورة نفساوية .. وملقتش طريقة أكلمك بيها غير انى أعفرتلك الحساب
اهىءاهىء
ميرو : طيب يا ستى .. بطلى عياط بقى .. قلبى وجعنى
اهدى بقى .. علشان الأكونت  ميغرقشى بدموعك.. مش كفاية عفرتيه


 ( استغفر الله العظيم يارب .. مين بس اللى قال انى كنت عايزة أكون دكتورة نفسية )

ميرو : صحيح هو انتى اسمك ايه ؟
العفريتة : يعنى ايه ؟
ميرو : يعنى بينادوا عليكى بيقولوا ايه ؟
يعنى أنا مثلا بينادونى مروة وساعات ميرو وأنا بنادى على نفسى
العفريتة : عارفه .. ميرو الخنقة المملة
ميرو : طب وليه الغلط ده يا أخت عفريتة
العفريتة : ما انتى خنقتينى .. بقلك عايزة أحكى وأخرج اللى جوايا .. عمالة ترغى وتقوليلى اسمك ايه

( ده ايه العفريتة الخنقة دية .. وبتقول عليا أنا اللى خنقة .. مش تشوف نفسها الأول )

ميرو : يا أخت عفريتة لازم نتعرف الأول .. مش ده كلامك برده ..  وعلشان محدش مننا يزعل .. أنا هسميكى 
العفريتة : وهتسمينى ايه ؟
ميرو : أم سحلول
العفريتة :أم ايه يا حبيبتى ؟
ميرو : ايه يا حجة مالك ؟ أنا قلت حاجة غلط
العفريتة : سحلول مين يا قمر ؟ .. ده أنا لسه مدخلتش دنيا علشان يبقى عندى عيال وكمان اسمه سحلول
ميرو : والله بجد صعبتى عليا .. شكل ده الموضوع اللى مضايقك .. حتى العفريت عندهم عنوسة 
أه .. اهىء اهىء .. كل العفاريت اللى قدى اتجوزوا .. وأنا عايزة أتجوز وأخلفلى عفريت صغير

( دية مالها قلبت على هند صبرى ليه ؟ يا خوفى لتكون عايزانى أبقى سوسن بدر )

العفريتة : متعرفيش عفريت ابن حلال أتجوزه .. وتبقى كسبتى فيا ثواب

أهو ده اللى أنا خايفة منه .. مش عارفه ليها حاسه انى هشتغل  خاطبة

ميرو: لأ معرفشى .. انتى أول عفريته أتشرف بمعرفتها  .. بس ممكن تتكعبلى بواحد ابن حلال زيك كده على الفيس .. يعنى تقوليله هاى وبعدين على طول تاخديه على المأذون 
العفريتة :اسكتى والنبى بلا خيبة ..  كلهم عايزين يتسلوا ومش عايزين  يتجوزوا  .. مفيش واحد فيهم تكون أمه دعياله ويدخل معايا دنيا
  
قصدك تكون داعية عليه

ميرو : تلاقيكى انتى بس اللى بتطلبى طلبات كتير وهما لسه عفاريت فى بداية حياتهم
العفريتة : لأ ده أنا غلبانة .. أنا عايزاها بس يحبنى ويعملى جروب على الفيس بوك نعيش فيه أنا وهو وعيالنا لما يجوا يبقوا يتنططوا براحتهم فيهم ونعفرت بقى الفيس علشان يبقى روش  وليه طعم  .. علشان بصراحة انتوا خنقة أوى  
العفريتة :انتى بتاكلى فى ظوافرك ليه ؟
ميرو : بفكر
العفريتة : بتفكرى فى ايه ؟
ميرو :بصى يا ستى أنا عندى حل لمشكلتك وربنا يسامحنى بقى
العريتة :  ازاى ؟
ميرو: أنا هجوزك .. بس عندى شرط
العفريتة : ايه هو  ؟
ميرو : انك تسمى أول ابن تخلفيه سحلول .. وتبقى اسمك أم سحلول
العفريتة : بس سحلول ده اسم وحش أوى .. شوفى اسم تانى
ميرو :لأ هو سحلول .. وكمان انتى عفريتة عايزة اسمك ولا اسم ابنك يكون ايه .. رهف ومراد مثلا
العفريتة : طب لو جت بنت
ميرو : هنسميها سحلولة
العفريتة : خلاص ماشى موافقة .. المهم أتجوز
ميرو : بصى يا ستى ..  أنا عندى أصحاب كتير على الفيس عايزين يتجوزوا .. ودايما بيقولولى متعرفيش عروسة بنت حلال  زى ما انتى طلبتى منى
فا أنا بقى علشان أرتاح وأجوزهم وأطمن عليهم .. أصلهم زى اخواتى وعايزة أفرحهم وأفرح بيهم  .. فنويت أشتغل خاطبة  وهكتب حوارنا ده على الفيس أو المدونة
وأى ولد هيقرأ الحوار ومش هيكتب تعليق عليه .. هقلك عليه وانتى بقى وشطارتك .. تمسكى فيه وتعفرتيله الحساب وتخليه يحبك وبعدين تقتليه بأى طريقة وبعدين تتجوزى عفريته وتخلفى سحلول .. وأبقى كده وفقت راسين فى الحلال 
بس لما تيجى تقتلى أصحابى .. اقتليهم براحة بطريقة متخلهومشى يتعذبوا  ..  برده  دول أصحابى و هيصعبوا عليا  
بس أعمل ايه بقى .. مش هما اللى عايزين يتجوزوا ؟
العفريتة : طب ما نختار اللى هيعلقوا على الحوار أحسن
ميرو: لأ يا ذكية .. اللى بيعلقوا قليلين ..  وممكن كمان  يكونوا متجوزين ولا مخطوبين
خليكى ناصحة ..  الكسلانين اللى مش بيعلقوا كتير ..  كده هيبقى قدامك ولاد  كتار  تقدرى تختارى منهم العريس اللى هيخش معاكى دنيا العفاريت ويخرج من دنيا البشر 
العفريتة : طيب لو مش كانوا كسلانين  وعلقوا على الحوار
ميرو : يبقى كده الولاد أمهم داعيلهم .. ومش هينفع يخشوا معاكى دنيا العفاريت 
العفريتة : طب وايه الحل ؟
ميرو : هنمسك بقى يا ستى فى أصحابى البنوتات القمامير
العفريتة : بس متقوليش عليهم قمامير .. أنا بس اللى قمر
ميرو : أه طبعا .. ( انتى الوجه المظلم للقمر
العفريته :بتقولى حاجة
ميرو : لأ يا أم سحلول .. وانا أقدر
العفريتة : ها مقولتيش فايدتهم ايه دوووول
بما ان البنات كمان عايزين يتجوزوا ..  فأنا وانتى هنقعد ندعيلهم كتير انهم يتجوزوا .. بس ابقى ادعى بضمير وبلاش نفسنة وأهو رمضان قرب علشان تدعى كتير  
العفريتة : أنا بقلك أنا اللى عايزة أتجوز .. تقوليلى أدعى لغيرى .. ما أدعى لنفسى أحسن
ميرو : ياستى أصبرى بس .. ده انتى عفريته متسرعة
ما احنا لو مش اتحلت  عندنا مشكلة العنوسة مش هتتحل عندكم انتوا كمان .. ومش هتتجوزى ولا هتجيبى سحلول
العفريتة : ازاى يعنى يا فلسوفة
يا ذكية لما البنات يتجوزوا .عندنا . انتوا كمان هتتجوزوا .. لأنهم ما شاء الله بنات سكر .. فهيخلوا حياتهم سكر فى سكر .. والأزواج من كتر السكر  اللى غرقوا قيه .. هيموتوا بغيبوبة سكر  .. ولما يطلع عفريتهم .. الله يرحمهم بقى .. انتوا تتجوزوا
شفتى بقى حل  مشكلة العنوسة سهل  ازاى
العفريتة :  أه صح فكرة تجنن .. والله انتى  سكر يا ميرو
ميرو  :  أه ما أنا عارفه علشان كده مش ناوية أتجوز
العفريتة : وليه كده ؟ مش لازم تتعاونى فى حل مشكلة العنوسةعندنا
ميرو :  لأ يا ستى أنا مش عايزة أخد ذنب واحد يموت بغيبوبة سكر  علشان أحل مشكلة العنوسة عندكم .
العفريتة : بقى كده .. طيب أنا قاعدة على أنفاسك وهعفرتلك الأكونت  لحد ما اتجوز


أصحابى الحلوين  .. مفيش حد متطوع يحب أم سحلول ويتجوزها ويريحنى منها .. صدقونى هى عفريتة طيبة وبنت حلال بس مشاغبة شوية .. وكمان متخرجة من كلية العفرته قسم نفسنة ومعاها دكتوراه كمان

وهنزلكم صورتها علشان تعرفوا أد ايه هى قمر



أكيد كلكم هتتكعبلوا وتحبوها من أول نظرة  .. وهى ناوية تعمل قريب أكونت باسم العفريتة المتعفرتة أم سحلول  علشان تستقبل عليه طلبات الزواج  ^__^

هناك 10 تعليقات:

  1. هااااي !!
    ههههههههه..
    بجد صعبت عليا..بس انتي عمالة تندهي ليها بأم سحلول من غير ما نعرف اسمها..لو إسمها حلو زي كلامها كدة هأقبلها بشكلها دة..بس المهم هي تقبلني و توافق عليا !!
    ..أهي على الأقل الحياة معاها مش هتكون مسكرة زي بنات البشر و أموت من السكر وانا بحب المخللات !!..تخنقني و نتجوز أحسن !!
    ..
    و الله جميل الحوار ده،يبدو فكاهي و لكن به أشياء و أشياء،هو في الحقيقة أقرب الى الساخر منه الى الفكاهي،فالفكاهي للضحك أما الساخر فعادة يكون للبكاء..غلاسة نت و عنوسة و كسل..الخ !!
    ..
    استمتعت جدا بالقصة/الحوار الجميل ده..وده المعتاد..تحياتي

    ردحذف
    الردود
    1. تسلم يارب على كلماتك الجميلة

      أنا بقلها أم سحلول علشان هى مش ليها اسم غير عفريتة .. وأنا اخترتلها اسم أم سحلول بس مش عاجباه
      وهى بتقلك انها هتدرس عرضك للجواز وترد عليك

      حذف
  2. بجد رائعه وقد اضحكتنى كثيرا فى بعض الجمل وخاصة هذه التى تخيلتها تحدث امامى ( العفريتة : وهتسمينى ايه ؟
    ميرو : أم سحلول
    العفريتة :أم ايه يا حبيبتى ؟
    ميرو : ايه يا حجة مالك ؟ أنا قلت حاجة غلط
    العفريتة : سحلول مين يا قمر ؟ .. ده أنا لسه مدخلتش دنيا علشان يبقى عندى عيال وكمان اسمه سحلول
    ) بجد مش قادر امسك نفسى من الضحك

    تحياتى لابداعك الرائع

    ردحذف
    الردود
    1. فرحانة جدا بزيارتك .. يارب دايما تكون مبسوووط
      شكرا لكلماتك الجميلة

      حذف
  3. عايز اقولك إن دمك خفيف أوي ما شاء الله عليكي

    حوارك تحفة.. ببتسم طول الوقت وأنا بقرأ

    ويا ستي انا موافق اخلصك منها .. بس بما إني مادي

    تدفعي كاااام؟

    ردحذف
    الردود
    1. تسلم يارب ربنا يكرمك
      فرحانة انها عجبتك
      وبما انى بخيلة جدا ومضيع فلوسى كلها على النسكافيه .. هدفعلك مج كبير نسكافيه وكيس بسكويت .. يالا بقى ان شاء الله محدش حوش

      حذف
  4. هههههههههههههه
    والله اني احمد اخويا عنده حق لما قالي ادخل مدونتك
    بجد تحفة
    وعجبني اسلوبك اووي
    ويا عيني ده انا كنت بحسب ان العنوسة ف البني ادمين بس اتضح انها راحت للعفاريت كمان
    ههههههههههه صباحك بنفسج يا قمر

    ردحذف
    الردود
    1. صباح النور رحاب

      فرحانة أوى انها عجبتك
      شكرا على زيارتك وكلماتك الجميلة

      حذف
  5. صباح الغاردينيا ياميرو
    امممم ليه كدا دنا بخاف من العفاريت بس حسيت ام سحلول طيبة اوي ههههههههه بس بردو مش عاوزة اتعرف عليها يارب ماتعرفش مدونة خطيبي والفيس بوك بتاعه ههههههههه <<< بتغير من عفريته "
    ؛؛
    ؛
    لروحك عبق الغاردينيا
    reemaas

    ردحذف
    الردود
    1. صباح النور ريماس
      وحشتنى تعليقاتك
      مش تخافى مش هخليها تعرف مكان خطيبك
      شكرا على زيارتك وتعليقك الجميل

      حذف