السبت، 23 يونيو 2012

لما تكون متعصب


بحبك لما بتكون متعصب ومتنرفز و ..
وايه تانى ؟؟
وبس ..  كفاية عليك كده
أول مرة أشوف حد بيحب حد وهو متعصب
أنا .. وقبل ما تسأل ليه ؟؟ هقولك بس سلفنى ودانك وقلبك ومشاعرك وعينك واحساسك .... ولا أقلك كفاية كده
  علشان بيقول سلف تلف والرد خسارة


طبعا انت عارف انى مجنونة وشعنونة ومش بحب حد يزعقلى
بس لما تكون متعصب ومضايق .....
 استنى بس دماغك ما تروحشى لبعيد .. أكيد يعنى مش هتقلب قطة سيامى لا بتهش ولا بتنش .. وانكمش كده على نفسى فى ركن بعيد عنك .. لأ انسى
ومش هسيبك تكسر الفاظة اللى فيها اللى الورد اللى جبتهولى امبارح لأن هقعد أعيط  على الورد والعياط بيجيب الفقر واحنا طبعا مش ناقصين  غير انى بيكون شكلى وحش أوى  .. وبصراحة أنا خايفة عليك تتخض تموت بعد الشر عليك 
وبعدين 
طبعا انت هتضطر تجيبلى غيره و كمان تجيب فاظة واحنا مش ناقصين مصاريف .. ده أنا حلمت برهف  امبارح كان حاطة ايدها على خدها وشايل هم البمبرز بتاعها
 ولا كمان هسيبك تكسر كوباية النسكافيه اللى لسه عاملاها وملحقتش أشربها  .. ربنا يسامحك مخلتنيش أظبط المود وأعمل دماغ
وكمان مش هخليك تكسر طقم الصينى اللى أهلى دافعين فيه دم قلبهم علشان حضرتك تهدى
وكمان مش هخليك تزعق وتعلى صوتك ..  مش علشان أنا بنت رقيقة وبترعب وبخاف من الصوت العالى .. ولا علشان الجيران هتسمع صوتك ويجوا يحكموا بينا وبعدين احنا نطردهم ونقلهم احنا خلاص اتصالحنا فيقوموا قايلين علينا مجانين .. فنقلهم وهو المجانين أحسن مننا فى ايه ؟؟   
لكن علشان لما بتعلى صوتك .. شعرك بيتنكش ووشك بيحمر  يعنى بيكون شكلك وحش أوى .. وأنا حبيبى مش وحش .. وكمان شكلك الوحش ده بيضحكنى  وأنا مش طالبة معايا ضحك خالص بعد ما ضيعتلى المود
وطبعا لازم أعملك حاجة سخنة علشان صوتك اللى راح من الزعيق 

المهم سيبك من وجع الدماغ ده .. كنا فين
أه لما تكون متعصب
وبما انك دلوقتى حبيبى وجوزى .. يعنى مش ابن الجيران
أه استنى الأول لما أحكيلك حكاية ابن الجيران
انت عارف طبعا يا حبيبى انى أنا كنت أعقل وأحلى بنت فى الشارع  .. كنت بنت لذيذة وعسل وسكر زيادة  .. يعنى تقريبا  زى البسبوسة اللى بتجيبها من  محل الحلويات اللى على أول الشارع .. ومع انى بقلك كل مرة بلاش تجيب منه علشان  بيزودوا السكر فى الحلويات وأنا عاملة ريجيم .. برده بتجيب منه  ..  ربنا يسامحك  بقى مش عارفه أخس الربع كيلو اللى زدتهم 
المهم احنا كنا فين .. 
أه كنا فى ابن الجيران ..  ده بقى مكنتش بطيقه خالص .. كان شايف نفسه أوى .. مش عارفه على ايه 
هو أه كان واد أمور ولذيذ و البنات بتجرى وراه ..  وكمان كان شاعر وبيكتب ويقول  كلام يجنن  .. انت عارف البنات بيموتوا فى اللى يقولهم يا قمر .. يا جميل ........ والاسطوانات الخايبة دية
 بس أنا ولا كان يهمنى أى حاجة من الحاجات دية 
ولما حاول يقولى شوية من الاسطوانات المشروخة  بتاعته دية .... خد اللى فيه نصيب
بلاش بقى نقول حصله ايه ونفضحه حرام
أه أنا بقول كده برده .. ان الله حليم ستار .. وبعدين ما هو ربنا هداه على ايدك
 
المهم سيبك منه
خلينا نكمل ..  لما تكون متعصب وبما انك جوزى حبيبى وأمك موصيانى عليك
أه على فكرة الست والدتك .. أنا غُلبت معاها ..  مفيش حاجة بعملها بتعجبها .. دايما تتطلعلى القطط الفاطسة فى أى حاجة بعملها 
مفيش فايدة معاها خالص وأنا عمالة أقول يا بت استحملى دي زى أمك وربنا هيجازيك خير وبكرة عيالك يتجوزه ويعاملوكى زى ما بتعامليها
المهم انسى .. أنا قلت ربنا يسامحها ويهديها عليا  ..  بس انت عارفنى مش بحب أخلى حاجة جوا خالص

المهم كنا فين
 لما تكون متعصب وبما انك جوزى حبيبى   و أبو عيالى اللى جايين فى السكة

أه أنا انى  حلمت امبارح انى هجيب بنت وعلى فكرة هسميها رهف مش هسميها على اسم أمك 
المهم  أنا قلتلك ان رهف كان قاعدة زعلانة وحاطة ايدها على خدها  .. قلتلها مالك يا بنتى ايه اللى مزعلك كده .. 
المهم متخافشى مكانتش شايلة هم البمبرز بتاعها  .. بصراحة البت طلعت حنينة أوى وكانت بتوصينى عليك  يعنى  زى ما بيقولوا البنت حبيبة أبوها .. 
قالتلى يا ماما لما يكون بابا متعصب أحضنيه 
( لأ بلاش تبصلى البصة دية والله يا خويا أنا قلتلها عيب يا بنت)
راحة قالتلى البنت اللى لسه مطلعتش من بطنى .. 

يا ماما عيب ايه؟؟
 مش عاملة تقولى جوزى ومبقاش ابن الجيران
خلاص ياماما اكسبى فيه ثواب وأحضنيه أوى .. وطبطى عليه وامسحى على راسه وأقرأيله أية الكرسى والمعوذتين لحد ما يهدى 
 أصل ساعتها بابا حبيبى  بيكون راكبه شيطان  وانتى طبعا مش  هتسمحى  أبدا ان شوشو يطلعلك لسانه وينتصر عليكى ..
 وبعدين امسكى ايده وروحوا اتوضوا وصلوا مع بعض ركعتين وأنا هصلى معاكم وأدعيلكم ربنا يهديكم لحد ما أجى وأجننكم أنا بالمبرز بتاعى 

وكمان قالتلى يا ماما 
 خلى شوية مودة من عندك على شوية رحمة من عنده  وكده تبقوا أخر تمام  
يعنى انتى تحتويه شويه وهو يحتويكى شوية 



أنا بصراحة عجبتنى  يحتويك دية 
و سمعت امبارح فى برنامج بيقول .. ادفع عمرك لقلب صادق يحتويك 
رحت بقى فكرت و قلت لما أسمع كلام البت وأغير اللى كنت هعمله لما تكون متعصب علشان تدفع عمرك كله ليا .. 
وبعدين لما تهدى وتبطل عصبية أعمل كوبايتين نسكافية و نقعد وأقلك يالا بقى احكيلى .. كنت مضايق ليه
بس صدقنى صدقنى لو طلعت حاجة تافهة ..  ولا أقلك بلاش  بقى ربنا يسامحك

وهو انتى كنتى ناوية تعملى ايه لما أكون متعصب ورهف خلتك تغيريه 
 عادى يا حبيبى
 لما تكون متعصب وبما انك جوزى حبيبى وابن الجيران اللى ربنا هداه على ايدى وكمان مامتك حبيبتى موصيانى عليك وأبو رهف حبيبة أبوها .. 
هقلك اخزى الشيطان يا حبيبى وقوم نام أحسن

هناك 14 تعليقًا:

  1. هههه جميلة والاسلوب جميل

    بس طويله وانتى عارفه زحمة الايامدى :)



    دمت بخير

    ردحذف
    الردود
    1. شكرا يارؤى
      معلشى بقى أصلها مش بتحب تخلى حاجة جوا خالص

      حذف
  2. اخزي الشيطان يا حاجه ام رهف ويا ابو رهف وربنا يهديكم
    ؛)

    ردحذف
    الردود
    1. أنا قلت كده برده
      شكرا على مرورك وتعليقك

      حذف
  3. ههههههههههههههههههههههههههههههههه
    تحفففففه بجد
    بوست لذيذ اوى وضحكنى
    كنت محتاجه والله البوست ده :)))

    ردحذف
    الردود
    1. فرحانة انه عجبك يا دينا
      أنا قلت انى نكدت عليكى امبارح فحبيت أضحكك النهاردة
      المرة الجاية ربنا يسهل وميكونشى نكد

      حذف
  4. جميلة و لطيفة جدا القصة و استمتعت بها كثيرا..في انتظار جديدك دوما..تحياتي

    ردحذف
    الردود
    1. فرحانة جدا انه عجبك
      شكرا على تعليقك وكلماتك الجميلة

      حذف
  5. ههههههههههههههه
    يا عيني على الستات و رغي الستات :)
    كل ده علشان تقوليله اخزي الشيطان و روح نام
    اعتقد بعد ما هيقرا البوست ده عمره ما هيتضايق و لا يتعصب تاني
    مش علشان يعني عرف ان الست والدته موصياكي عليه و لا ان رهف حبيبة ابوها وصتك عليه و لا علشان خايف على الفاظة و الصيني يتكسروا و بالتالي المصاريف عليه
    علشان بس ميحققلكيش امنيتك في انك تكتبي بوست زي ده تاني :)
    جميل اوي البوست و طريقة سردك حلوة اوي استمتعت بيه جدا و بداية جميلة لليوم

    ردحذف
  6. وممكن كمان بعد ما يقرأه يفضل انه يطق ويموت ويريح دماغه

    ياريت كلنا نبقى هادين ونبطل عصبية

    شكرا دكتور مصطفى على زيارتك وتعليقك

    ردحذف
  7. لالا كدة أنا بدأت أحبك و أحب بوستاتك ..
    زمان كنت أكتب حجات كدة مجنونة على رومانسية على مش عارفة إيه بقى
    بس معرفش مالي بقيت نكدية
    المتهم الوحيد في القضية الثورة :D
    المهم أنا برغي كتير ليه ، عجبتني أووووووي ، و مستنية جديدك أكيد

    ردحذف
    الردود
    1. فرحتك جدا انها عجبتك
      شكرا على متابعتك وكلماتك المشجعة

      حذف
  8. صباح الغاردينيا
    ههههههههههههه
    يعني اول بوست ادخله واضحك من قلبي بجد اسلوبك يجنن
    وربنا يخليلك جوزك ابن الجيران الي مامته موصياكي عليه
    ماتنسوش في وسط الزعل بامبرز رهف :)"
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
    الردود
    1. صباح النور ريماس
      شكرا على زيارتك الجميلة وكلماتك اللطيفة
      نورتى

      حذف