الجمعة، 15 يونيو 2012

بقى عندى حلم وهيتولد قريب

بقى عندى حلم
جزء منى ومن روحى واحساسى ومشاعرى  ونبض قلبى
بقى عندى حلم
 اتكون جوايا .. حسيته بيكبر باللحظات والدقايق والساعات والأيام ...
بقى عندى حلم
هيتولد قريب ومستنية ولادته  على أحر من الجمر
مستنية بشوق أسمع صرخته ..  أشوفه وألمسه بايدي وأحضنه كأنه طفلى
مستنية  أحكيله أد ايه كنت فرحانة وأنا بفكرله فى اسم .. وأنا بتخيله هيكون شكله ازاى .. وأد ايه كان حلم شقى ومشاغب وتعبنى أووووووووى  لحد ما اتكون وطلع للدنيا 



حلو أوى انه يكون عندك حلم بتسعى انك تحققه
والأحلى انك تلاقى حد يشجعك ويساعدك فى تحقيقه ويشاركك الفرح لما يبقى حقيقة
طبعا انتوا مستغربين فرحتى وعايزين تعرفوا ايه حكاية الحلم الشقى المشاغب ده
طيب بما انى افترضت انكم مستغربين .. ولأنى فرحانة بحلمى حتى لو كان مشاغب وشقى .. فقررت أطلع المستخبى وأرغى كتير على غير العادة
وغلاسة بقى هستغلكم و أوجع دماغكم شوية بحكايات ملغبطة لحد ما نوصل  ازاى بقى عندى حلم

طبعا انتوا عارفين  الناس اللى بيقولوا عليهم دحيحة .. اللى حياتهم كلها بتبقى مذاكرة علشان يجيبوا مجموع كبير فى الثانوية العامة وغالبا بيكونوا مركزين انهم يسجلوا الهدف فى مرمى كلية الطب
وأنا الحمد لله كنت منهم بس الكورة معايا حودت شوية و لبست  فى العارضة ودخلت كلية العلوم أو بمعنى أصح وقعت فيها ( ربنا يجعل كلامنا خفيف عليها )
وادبست أنا بقى فى مذاكرة الكيمياء والفيزياء والمعامل ونحط حاجة على حاجة تطلعنا حاجة ملهاش علاقة بأى حاجة ونهارنا بيكون أسود لو مطلعتش
سيبكم انتوا من الحاجة اللى مش عارفين ايه فايدتها .. ونقول الحمد لله  اتخرجت من كلية العلوم بتقدير امتياز وكنت من الأوائل ( لحسن تفتكرونى عيلة فاشلة ) ..
بس دايما كنت حاسه انى فى المكان الغلط .. يعنى بذاكر لأنى المفروض أذاكر 
و كمان مش ده حلمى اللى ممكن ألاقى نفسى معاه
المهم خلاص بقى خلينا نسيب كلية العلوم فى حالها علشان متزعلشى وتفجرلى المدونة وكمان نقول استغفر الله العظيم و بلاش نجيب فى سيرتها أكتر من كده
ولأنى الحمد لله برده مشتغلتش ( وعلى فكرة أوعى حد  يسأل ليه :p )
بدأت أتعلم حاجات ملهاش علاقة باللى كنت بدرسه خالص
ولأنى كنت بحب الحلويات والمخبوزات جدا .. بدأت أتعلم أنواع كتير حلوة من على النت وخليت المطبخ معمل تجارب لوصفاتى الغريبة واخواتى كانوا حقل التجارب وطبعا كتير فشلت وصفاتى  وعقاب لنفسى كنت بأكل نفسى بالعافية أى حاجة تبوظ معايا  وأوقات كتير برده بتنجح الوصفة وكنت بفرح أوى لما بتنجح حاجة معايا لدرجة انى كنت بفكر أفتح محل مخبوزات وحلويات .. وبعدين لقيت حاجة تانية شدتنى أكتر 
وهى الاكسسورات  
كانت  هواية .. بس كانت هواية صعبة أوى وعايزة صبر وطولة بال
والحمد لله قدرت أتعلمها لوحدى برده من على النت .. وعملت مجموعة تصاميم حلوة بايدى وبعت منهم وبرده فكرت أفتح محل لتصميم وبيع الاكسسورات .. بس بعدين عينى وجعتنى وزهقت وسبتها وقضتها بيات شتوى

خليت وقتى كله للقراءة والرسم بس  .. من صغرى بحب الرسم والقراءة أوى .. بحب أرسم الورد والنخل والشجر .. وبحب أقرأ القصص البوليسية والرعب
ولما كبرت برده لسه بحب أرسم المناظر الطبيعية واكتشفت بعد ما خلصت الكلية انه كان نفسى أدخل كلية تربية فنية 
وبحب أقرأ  كل أنواع الكتب (  ماعدا البوليسية والرعب وكمان السياسية ( ومحدش برده يسأل ليه ))
المهم لما حد كان يعوزنى كان يلاقينى  كده قاعدة لوحدى مع كتاب فى أى ركن  ناسية نفسى والدنيا من حواليا لحد ما أوصل لأخر صفحة
وبقى عندى هوايتين ( القراءة والرسم ) بحبهم جدا وبيريحونى جدا

كل ده ومكنتش ليا علاقة بالكتابة بس كنت من الناس اللى بتحب تكتب الأحداث المؤثرة فى حياتها
ومعرفشى ايه اللى خلانى اتكعبلت فى حب الكتابة
بس ساعات بيكون جوانا كلام مش بنعرف نقوله  .. فى النقطة دية الرسم والقراءة مقدروش يريحونى .. فبدأت أكتب أى حاجة جوايا .. أى كلمات ملغبطة .. لقيت نفسى برتاح  .. حسيت انى لقيت نفسى معاها .. حسيتها صديقة مريحة  بتفهمنى وبفهمها
وحبيت أووى جملة أكتب لأتداوى (إيزابيل الليندي) .. لمست حاجة جوايا ولقيتها بتعبر عنى
وبقت دايما صديقتى معايا  فى كل لحظة .. لحظة حزن .. فرح .. تمرد .. أمل .. حلم ........
خلتنى أفكر و أحس بكل معنى ورا أى كلمة بسمعها أو بقولها .. وزاد احساسى باللى حواليا أكتر وبدأت أفكر فى أى موقف أو تصرف بيحصل حواليا أو معايا وأحاول أفسره وأعبر عن بالكتابة

لحد ما بقى عندى حلم هو ( لحظات تأمل ) .. وبقى عندى هدف انى أطلعه للنور
حبيت أنشره وأكيد مش فاكره نفسى احسان عبد القدوس ولا أنيس منصور ولا حد من الناس الجامدة دية
بس مهما كان هو ايه ..  بيكون حلمى .. جزء من نفسى من روحى ومن مشاعرى وأيامى وحياتى
وسعيت لتحقيق حلمى
 وساعدنى انى أعرف دار نشر ليلى الكاتب الشاب الطموح ( محمد غالية )
وبرده مجموعة من الكتاب المتعاونين لما سألتهم عن الدار  شكرولى فيها جدا وقالوليلى توكلى على الله  زى ( الكاتب والصحفى أستاذ فتحى المزين  .. والكاتبة المبدعة نيفين كمال .. والكاتبة الرائعة شيرين سامى .. والكاتبة الجميلة أمل زيادة   )
وبعت كتابى على ايميل الدار و كنت مستغربة من نفسى أوى لأنى مكنتش مستعجلة على ردهم زى بقية الشباب اللى مشتركين فى المرحلة
 وبصراحة متأخروش ردوا عليا بعد فترة قصيرة انهم قبلوا كتابى ومستنين تحديد ميعاد توقيع العقد
وقتها مكنتش عارفه أحدد مشاعرى .. أكيد كنت فرحانة .. بس كنت قلقانة وخايفة ومش مصدقة انهم قبلوا الكتاب ( تقريبا أنا كنت بجرب أنا كتابى هيتقبل ولا لأ )
وعمالة أطمن  لنفسى ( انتى خايفة ليه مش كنتى بتقولى حلمى  حتى لو مكانشى جامد وعايزه  أطلعه للنور ..  وبعدين أرد على نفسى  هى الحكاية قلبت جد أوى كده ليه  )

ودلوقتى حلمى بقى حقيقة 
ليه اسم ( لحظات تأمل ) وكمان الغلاف بتاعه رقيق أوى ( أه وانت مالكم بعاكسه )
 
وكمان عملتله صفحة منور فيها الغلاف الرقيق السكر ده ( زيادة معاكسة )

http://www.facebook.com/LhzatTaml 

     
 وبرده بمساعدة أستاذ فتحى بقى لحلمى خبر فى جريدة الصباح العربى 


http://www.sabaharabi.com/details.php?newID=2488

معلشى بقى وجعتلكم دماغكم
بس أنا فرحانة انى بقيت مرتبطة بهواية جميلة لقيت نفسى معاها .. وبقى عندى منها حلم جميل عمالة أعد  الأيام اللى فاضلة على ميعاد ولادته لأنه
 ( حلمى .. وليدى الأول .. وولادتى الثانية  )

هناك 11 تعليقًا:

  1. حبيبتى الف الف مبروك
    وان شاء الله حلمك يكسر الدنيا
    وانا مبسوطة جدا ان حلمك الجميل ده كان سبب فى انى اتعرف عليكى ربنا يوفقك ويحققلك كل احلامك دايما يارب

    ردحذف
    الردود
    1. شكرا أية الله يبارك فيكى
      أنا فرحانة أكتر انى عرفت بنات طيبين زيكم
      ربنا يكرمك على كلماتك ودعائك الجميل ويوفقك ويحققلك أحلامك زى ما بتتمنيها

      حذف
  2. ألف مبروووووووك
    وبالتوفيق يارب

    ردحذف
    الردود
    1. تسلمى منى الله يبارك فيكى .. ربنا يكرمك .. بالتوفيق دايما يارب

      حذف
  3. اول مرة أزور مدونتك،واسلوبك جميل و أعتقد بالتالي ان كتابك سيكون جميل و ممتع..كل التوفيق

    ردحذف
    الردود
    1. شكرا أحمد على تشجعيك وكلماتك الجميلة ويارب متكونشى أخر مرة تزور المدونة

      حذف
  4. الف الف مبروك يا حبيبتى
    مبسوطه ليكى انك فرحانه كده وقدرتى تحققى حلمك
    يارب احلامك كلها تقدرى تحققيها
    ويكون الكتاب ده بدايه لسلسله نجاحات كبيره اوى
    ربنا يوفقك يا جميله :)

    ردحذف
    الردود
    1. تسلمى حبيتى
      الله يبارك فيكى
      ربنا يكرمك على الدعاء
      وبالتوفيق ليكى ولكل المسلمين يارب

      حذف
  5. في الحقيقة لا أجد من الكلام ما أتفوه به أمام هذه الموجة من المشاعر والأحلام والجياشة، فقد أحسست حقاً بتلك الفرحة العارمة..
    فأسأل الله لك التوفيق والنجاح والسداد..
    تقبلي مروري وفائق تقديري واحترامي

    ردحذف
    الردود
    1. تسلم مهند
      ربنا يكرمك
      نورت المدونة

      حذف
  6. نقدر نقول إنها رحلة بحث عن الذات.. ونقدر نقول برضه إنك من المحظوظين اللي ف الدنيا اللي عرفو همه عايزين إيه وبيعملوه

    بالتوفيق دايما

    بكتب التعليق ده بعد صدور الكتاب وتحقيق حلمك.. وكمان قرأته وعجبني

    وإن شاء الله يحقق مبيعات كويسة وتعملي بعده كتب كتيييييييييير

    ردحذف