الحب المميت

أصحابى المساكين

عاملين ايه وآخر أخبارتكم ايه مع نفسوايتكم ؟

أكيد بردانين ومكتئبين ومش طايقين بعض وبينكم مشاكل كتير ومحاضر وأقسام ، متقلقوش أنا مش بسأل عشان أصالحكم على بعض ولا ناوية أقلكم حبوا بعض – زى ما نصحنى ضياء ، لأ لو سمحتوا بلاش البصة دية .. هو اللى قال أنا مالى أنا  – ، ولا كمان هصعبها عليكم وأقلكم  خدوا بالكم من نفسوايتكم ولا خليكوا عاقلين - بقى انتوا تعرفوا عنى كده أو انى أقول الكلام العاقل ده .. ده أنا بموت فى الجنان والشر -  من الآخر بقى أنا جاية أقلكم انكم عندكم حق ولازم تثبتوا على موقفكم وتصعدوا المواضيع بينكم – حتى لو كانت تافهة – الى القضايا والمحاكم  .. أيون لازم تعلموها الأدب ..  أصل بعيد عنكم فيه ناس لا ينفع معاها ذوق ولا يحوق فى جتتها شوية انسانية ولا ينصلح حالها الا بالسك على دماغها!

ازاى يعنى تتمرد عليكم وتكتئب كده فجأة من غير ما تستأذن  وكمان ولا نافع معاها نسكافيه ولا شيكولاته ولا جاتوه ..  كده هتفلسوا وتضطروا تستلفوا من ببهاتكم وممهاتكم وطبعا لازم يكتبوا عليكم شيكات أومال يضمنوا حقهم ازاى وانتوا زى القطط بتاكل وتنكر!  وان شاء الله آخرتكم فى السجن ولو سمحتم كل واحد يجيب النسكافيه بتاعه معاه وبلاش أسلوب الشحاته ده .. أنا مش ناوية أدى حد ولا حتى شمة قصدى شفطة – أظن الرسالة وصلت يا محمد جمال - ، أقلكم انتوا أحسن حاجة تولعوا فيها .. أه فى نفسويتكم طبعا  و وأوعوا تكبروا دماغكم معاها .. يعنى خدوا بنصيحة ضياء ( اضربيها اسحليها رشيها بمية نار ) الصراحة طيوبة أوى ضياء يا جماعة ومش عارفة من غيره كنت عملت ايه ... أكيد أكيد كنت هطق أموت !!

المهم يا جماعة بعد ما ولعنا .. قصدى يعنى بعد ما هدينا النفوس بينكم وبين نفسوايتكم !... لو لسه فى نفسوياتكم الروح   يبقى أمركم الى الله هتضطروا تجيبوهالى أنا بقى وأحب أطمنكم انى مش هستعمل معاها نصيحة ضياء مستحيل طبعا أبقى قاسية وأعذبكم بالشكل ده .. ده انتوا بردوا بيقولوا عليكم أصحابى !.. وأمرى الى الله هبقى طيبة وبإيدتينى الاتنين هطلع روح نفسوياتكم .. بس كده .. لأ لو سمحتوا مش عايزة حد يرجع بعد ما يتشنق عشان يشكرنى .. أنا طيبة أه بس ماتروشونيش .. وبعدين الناس لبعضيها ومش صعب يعنى  أبقى رايا وسكينة عشان خاطر عيونكم الحلوة دى !... بس يلا أقعد ساكت أحسن ما أبدأ بيك .. أه بكلمك انت بتدور على مين وراك وجنبك ..  هو حد أصلا طايق يقعد جنبك .. ده حتى نفسويتك هتفلسع منك.. ياد بقلك بطل تلف راسك لتلاقيها مجذوذة ومدلدلة على صدرك !.. قال بعاكسك قال .. ملقتش غيرك يا أخويا عشان أعاكس عيونك .. ده  حتى عينك ضيقة ومفتوحة بالعافية وان شاء الله قريب هيجيلك حول وعمى ألوان!... المهم يا جماعة سيبكم من اللى على راسه بطحة وبيحسس عليها الله يرحمه بقى .. ابقوا اقروا على روحه الفاتحة .. يوووووه بطلوا رغى بقى نستونى كنت عايزة أقول ايه .. أه افتكرت .. الصراحة أنا زهقت من الطيبة اللى أنا فيها دية !! .. و من غير لف ولا دوران أنا وحشتنى ميرو الشريرة أوى  .. طب بزمتكم مش انتوا زهقتوا واتخنقتوا من الطيبة اللى بقت كتير أوى جوانا وحوالينا .. خدت راحتها أوى ولازملها حبة شر يشكموها عشان تبطل ترمى جتتها علينا !! .... وده بردوا كان رأى أحمد لما قلتله انه أكتر واحد  محوشاله حبة شر من زمان وايه رأيه أبدأ بيه ولا عنده اعتراض .. راح رد وقال

(لا لا لا لا مافيش إعتراض أبدا وأنا على أتم إستعداد..أحسن أعترض تقوم العقوبة تزيد! هههه ، وأنا أصلا زهقت من الطيبة إللي فيا وحواليا، عاوزة حاجة شرانية ميرونية قوية تجرني لطريق الشر وأحترف! )

خليكوا شاهدين أهو .. هو اللى متهور ومش عايز يبطل بكش وأونطة .. قال ايه عايز يضحك عليا ويتقى شرى .. بس على مين .... ده أنا ميرو قوية ومفترية أحط الواحد من دول فى دماغى ميطلعش عليه صبح

ومن موقعى هذا أحب أقول ل أحمد انى أعلنتُ عليك الشر

يلا بينا .. استعنا على الشقى بالله ..محدش بياكلها بالساهل اما النصر على الاكتئاب .. أو تطليع روح أحمد ألف مرة

أم سحلول : ميروووووووو هيييييييه ميروووووووو

ميرو : استغفر الله العظيم  الجنان اشتغل غورى يا أم سحلول من وشى دلوقتى

أم سحلول : ميروووووووووووووو جت هيييييييه

ميرو : يخربيتك اسكتى عايزة ايه منى ؟

أم سحلول : كده يا ميرو بتشخطى فيا عشان وحشتينى وفرحت انى شوفتك اهىء اهىء وكمان بتخربى بيتى اهىء اهىء

ميرو: أيون بدأنا اسطوانة العياط ما أنا اللى استاهل ايه اللى رجعنى لوجع القلب ده تانى .. كذا مرة أقولها انها معندهاش بيت عشان يتخرب .. ولولا مدونتى اللى لماها كان زمانها مرمية بره ميتة من البرد  

أم سحلول : كده يا ميرو بتعايرنى اكمنى عنست اهىء اهىء

ميرو: بصى يا أم سحلول من الآخر كده ميرو بتاعت زمان خلاص يا ماما ذهبت ولن تعود .. يعنى مش هتحايل عليكى وأقلك آه قلبى الصغير لا يتحمل .. وربنا لو مبطلتى عياط لأرميكى بره وبعدين أنا قلبى أصلا مش صغير .. ده يا حبة عينى على يدى شايل الهم وساكت

أم سحلول : ايه ده يا ميرو هو انتى قلبك كبر وبتغنيله (أه يا قلبى يا كتاكت يا ما انت شايل الهم وساكت )

ميرو : بتتريقى كمان .. أنا اللى جبت ده كله لنفسى .. صبرنى يارب

أم سحلول :  ميرو مقلتليش انتى كنتى مختفية فين ؟.. وبعدين يعنى ايه ( ذهبتى ولن تعودى ) أوعى تكونى موتى ميرو .. يا مامى لتكونى العفريت بتاعها!

ميرو : ايه يا ختى! .. مامى .. ايه العفريته الفافى دى .. و ايه كنت فين دى ... كمان بتسألى .. ليه ياختى هو انتى كنتى أبويا ولا أمى  ولا المتنيل اللى نهاره اسود وأمه داعياه عليه وهيبقى جوزى !!

أم سحلول : هدى أعصابك يا ميرو .. أنا بس بطمن على نفسى .. أصل مينفعش نقطع على بعض وأديكى شايفة العرسان المنتحرين شاحين ازاى فى السوق ! ،  وبعدين ايه جوزك دى .. هو انتى ناوية تتهورى وتتجوزى قبلى ؟!

ميرو : الصراحة أه يا أم سحلول بفكر أتهور وأعملها وده سبب غيابى  

أم سحلول : كده يا ميرو تسيبينى مكتئبة وتروحى تقعدى مع الجو بتاعك  

ميرو : جو انتى كمان اللى أقعد معاه .... ده أنا كنت فى مستشفى المجانين بطمن عليها خلصت ولا لأ عشان ناوية أعمله هناك أوضة متجهزة بكل أدوات التعذيب وأطلع عليه بقى كل عقدى  ....... وهو يفضل يتحايل عليا اننا نخرج بالمعروف زى ما دخلنا بالمعروف وأنا أبدا موافقش .. فيحاول يرشينى بكام كيس نسكافيه لأن اللئيم عارف انى مدمنة نسكافيه وبضعف قدامه .. بس على مين هو دخول الحمام زى خروجه وعشان ميفكرش تانى انه ممكن يهرب من حبى المميت فهروح مزودة جرعة الكهربا عشان تظبطله دماغه وأغنيله معاها ( وحياة حبى ليك مش حتنازل عنك أبدا مهما يكون ) !!

 

أم سحلول : ياااااه يا ميرو ده انتى بتحبيه أووى !

ميرو : أومال يا بنتى ده هيبقى بينا سنين عذاب وكهربا .. ولازم ولابد أكرمه وأهننه فى حياته لحد موته .. طب عليا الطلاق بالتلاته ماهيخرج من مستشفى المجانين الا على قبره !

أم سحلول : الله يا ميرو ... أنا عايزة من الحب ده

ميرو : من عيونى يا حبيبتى .. انتى يعنى جيتى فى جمل ..أول لما تتجوزى انتى وأحمد هاتهولى  وأنا هعلمك تعذبيه ازاى قصدى يعنى تحبيه ازاى

أم سحلول : ربنا يخليكى ليا يا ميرو

ميرو : على ايه يختى .. أنا أفديكى الساعة لما أشوف أحمد ميت متكهرب .. قصدى يعنى ميت مشنوق .. يوووووه قصدى يعنى ميت من حبك،
المهم قوليلى بقى أخبار الاكتئاب معاكى ؟

أم سحلول : أنا خلاص زهقت من الاكتئاب و عايزة أتجوز وأجيب سحلول وأقعد فى البيت وأبطل تنطيط وعفرته وفصول شر فى خلق الله

ميرو : ليه يا بنتى الجواز والعيال جايين جايين لكن العفرتة حرام تسيبها؟!

أم سحلول : اتز تو ليت بالنسبة لى خلاص

ميرو : ولا توو ليت ولا حاجة ... أحمد قرب يرجع من السفر وقريب هتتجوزوا .. بختك كويس يا مضروبة الواد عمال يهد فى نفسه وصحته عشان خاطر يجيبلك كل اللى انتى عايزاه

أم سحلول : عشمنى بالحلق ، خرمت – أنا – ودانى ، لا الحلق جانى ، ولا كلام الناس كفانى ! ، ده حتى مفتكرنيش بكلمتين حلوين فى عيد الحب .. ده حتى القطط  كانوا بيحتفلوا  .. وهو فالح بس يروح يعاكس البنات على الفيس!!

ميرو: يا عينى يا عينى .. حتى القطط عاملين فيها تايتنك ! .. لأ أحمد مالوش حق خالص يسيبك تتقهرى كده وتحسدى حب القطط وهو عمال يشيت مع البنات على الفيس  ، معلش يا أم سحلول تبات نار تصبح رماد بكره أكيد لما يتجوز حاله هيتصلح ويبطل يلعب بديله ولا مبطلش أقطعوله وارتاحى

أم سحلول : امتى بقى يا ميرو .. ده أنا امبارح كنت قاعدة مع شوية عفاريت مكحكين ونقطونى

ميرو : أه عارفهم دول عندنا منهم وياسعده وياهناه اللى يقع تحت ايديهم ... ونقطوكى ازاى الحشرين دوووول؟

أم سحلول : كنت قاعدة بشيت معاهم فراحت واحدة منهم قالتلى يا مدام رحت أنا قلب على الوش التانى وعملت زى رشاش المدفع وفتحت فى وشها بحبة كلام كتير ونهيته ب  ( مودموازيل من فضلك )

راحت بصتلى من فوق لتحت وبعد كده سألتنى (هو انتى متجوزتيش ليه لحد دلوقتى ؟!) ....... قلتلها لسه النصيب مجاش يا حجة .... راحت قالتلى وهى عاملة نفسها زعلانة ( يا حرام ) وقعدت تقلى لازم تلحقى القطر قبل ما يدوسك .. وأهو ضل راجل ولا ضل حيطة وبطلى كسوف وبصى للواد ببجاحة وسلمى عليه بكل رقة وانتى بتسبيليله لحد ما تجيبيه وراكى على ملا وشه فتتقصف رقبته ويتص فى نظره ويتهبب يتجوزك قبل ما تعنسى ، وزى ما انتى عارفة يا ميرو  أنا بنت ناس ومتربية فمردتش أرد عليها ومشيت ودمعتى على خدى .... بس خليكى شاهدة على طول لسان أم أربعة وأربعين دى وانى مش ناوية أسكتلها تانى!

ميرو : آه يا حبيبتى هو فى حد فى أدبك وهدوئك ورقتك ! .. وعندك حق متسكتيش على حقك أبدا .. بس قوليلى  الصراحة انتى عملتى بنصيحتها ؟

أم سحلول : ايه اللى انتى بتقوليه ده يا ميرو .. أنا عندى مبادىء لا ممكن أتنازل عنهم أبدا 

ميرو : طب عينى فى عينك كده يا أم سحلول 

أم سحلول : لأ عينى وجعانى 

ميرو : طب تعالى احكيلى ومتقلقيش سرك فى بير مش بيسرب  .. ها قولى عرفتى  تصطادى عريس ولا طلعتى خايبة وكسفتينا ؟

أم سحلول : لأ عرفت طبعا ...فاكرة الواد المغنى التركى الرغاى؟

ميرو : أه فاكراه ... مش ده اللى شوهتى الأغنية بتاعته ( اللى مش قرأ برميل طرشى وورق الورد هتلاقوها ( هنا ) )

أم سحلول : شوهت ايه انتى كمان .... ده عجبه جدا اجابتى على أسئلته ودور عليا لحد ما وصل لمكانى فى برميل الطرشى وبقى فيه بينا حوارات واتصالات على أعلى مستوى

ميرو : بقى كده يا أم سحلول تخونى أحمد ومن برميل الطرشى اللى شاهد على اتصالاتكم البرميلية اللى غلبتونى بيها!

أم سحلول : ما هو من غلبى وضيقتى يا ميرو .. أصل أحمد ده مفيش منه فايدة ، ولا منه رجا .. ايدك منه والأرض !

ميرو : أه طبعا وهو أنتى هتقوليلى على صديقى الصدوق أحمد .. الحق يتقال والكدب خيبة هو شخصية كده معقدة ومملة ورخمة آخر 30 حاجة .. ده حتى أخته رحاب سيحتله على الفيس كله عشان مش راضى يروح الحفلة معاها .. والبنية ياعينى قعدت تتحايل وهو قلبه قاسى ملانش خالص من زنها عليه !

أم سحلول : هو كمان ليه اخوات ؟!

ميرو : أومال مقطوع من شجرة ! ..... وعلى فكرة أخته رحاب دى مش سهلة خالص .. قال ايه كانت عايزة تشوفك وقالتلى بالحرف الواحد (  ممكن متعجبنيش ونلغي الجوازة )

أم سحلول : طب ومورتهاش صورتى ليه يا ميرو عشان تتبط وتعرف انها مش هتلاقى لأخوها زيى؟ !

ميرو: صورة ايه يا هبلة ... دى عايزة تعمل معاكى زى ما عملت مارى منيب مع لبنى عبد العزيز فى الفيلم اللى نسيت اسمه

أم سحلول : يووووه بقى يا ميرو كل حاجة مش فاكراها كده .. كنت عايزة أتفرج عليه .. أدى آخرة ادمانك للنسكافيه بقى عندك الزهايمر!

ميرو : اخرسى يا بت لأحطك فى لستة النسيان

أم سحلول : خلاص يا ميرو الطيب أحسن..  كملى عملتى ايه مع اللى متتسماش ؟

ميرو : مين دى ؟ .. قصدك على رحاب ... لأ دى طلعت طيبة خالص وكانت نيتها المستخبية انها تخلص من أحمد عشان خنقها .. اسمعى يا ستى قالتلى ايه

(

 Rehab Saleh
  اصل احمد اخويا ده غلباااااااااااااااااااااااان جدا وانا عايزة اطمن عليه
طيب لو وحشة ماااشي لكن من جوة كمان وحشة لالالالالالالالالالالا انا ارفض
انا هشتغل حماتها من دلوقتي هههههههههه

Marwa Zahran  : 

ههههههه .. عايزة تطمنى عليه فى عالم العفاريت ! .. ده انتى عايزة تخلصى منه بسرعة ..... يااااه ده أحمد شكله غلباااان أوووى .. ما تقلقيش يا شابة على أخوكى .. هناك هيبقى فى الحفظ والصون )

واللى أكدلى كلامها وفكرتى عن أحمد الكلام اللى وقع وقاله بلسانه

Ahmed Ahmed Saleh

( بصي يا رحاب يا أختي، عارفة أنتي الطيبة والحنية والنعومة وكل الصفات الحلوة إللي فيا دي هتتقلب بعد الجواز للنقيض!
يعني ماتقلقيش عليا! ) 

يعنى قصر الكلام يا أم سحلول أنا مش عايزاكى تحسى بالذنب .. أحمد صديقى أه .. بس الحقيقة هو يستاهل أكتر من كده .. أذا كان أخته مش طايقاه وعايزة تفلسعه يبقى انتى بنفسويتك المعقدة وخلقك الضيق هتبقى عليه ده احتمال تانى يوم جواز ألاقيه متعلق فى السقف وراسه مدلدلة وعينه مبرنقة ولسانه طالع لبره .. ياااااااااه خسارة شكله كان هيبقى تحفة أووى وهو مشنوق وكان نفسى أتصور معاه صورة وأنا بقصله لسانه وأحتفظ بيه هو والصورة للذكرى !!

 

المهم يا أم سحلول سيبك من منظر أحمد المشنوق وقوليلى وصلتى لفين مع المغنى التركى ؟

أم سحلول : الواد طلع حد لذيذ ولطيف خااااااالص

ميرو : طب كويس صبرتى ونلتى يا أم سحلول هتتجوزوا امتى بقى؟

أم سحلول : لأ ما أنا فلسعت منه

ميرو : انتى اللى فلسعتى ! .. وليه بقى ؟!

أم سحلول : وجعلى دماغى يا ميرو .. رغاى أوى وبيسأل كتير لحد ما خلى الصواميل اللى مربوطة فى دماغى اتفككت

ميرو : وهو ده سبب يخليكى تسيبيه يا موكوسة .. كنتى دورى على على زرار ال  mute  بتاعه واكتمى صوته شوية ... وبعدين مش يمكن الواد بيحبك وعايز يتعرف عليكى أكتر

أم سحلول : لأ يا ميرو ده قليل الأدب

ميرو : ليه عمل ايه الموكوس ده ؟!

أم سحلول : عمال يختى يغنيلى

( لو قلت لك اني احبك ، فلا اعلم هل ستحبني انت ايضاً ؟؟هل ستمسك بيدي إن وقعت امامك ؟؟
لو قلت لك انك نور عيني ، فلا اعلم هل سوف اكون انا ايضاً ؟؟هل ستمسك بيدي الى ما لا نهايه إن وثقت بك ؟؟ )

ميرو : وفيها ايه دى كلمات حلوة أوى .. احساسه يجنن ابن الايه .. يلا ياستى يا بختك .. أنا مش بقر عليكى أنا بحقد بس!

أم سحلول : بس يا ميرو انتى غلبانة ومش فاهمة حاجة

ميرو : طب فهمينى انتى يا فلحوسة هانم ايه قلة الأدب فى كلامه ده ؟!

أم سحلول : الباشا فاكر لما يقلى بحبك ويا نور عينى هوافق أمسك ايده ..... قليل الأدب بيغرغر بيا .... لأ يا ميرو أنا لا ممكن أعمل كده أبدا .. أنا عفريته معنسة أه بس متربية وبنت ناس معذورين شوية

ميرو : يا شيخة روحى هو فقر وعنطزة ؟ ... وبعدين يا بنت الناس المعذورين الراجل مش قصده يمشيكى فى طريق الانحراف .. ده بس بيقولك يا نورعينى

أم سحلول : يعنى ايه بردوا مش فاهمة يقصد ايه بنور عينى .... أه  .. يكونشى أعمى وعايزنى أمسك ايده وأعديه الشارع .. عشان كده متحركش من قدام القطر لما طوحته ناحيته!

ميرو : يخربيتك قتلتيه .. انتى مش قلتيلى فلسعتى منه وبس؟!

أم سحلول : متقلقيش عليه يا ميرو .. لسه فيه الروح ومتلقح فى المستشفى بيحاولوا يجمعوه على بعضه تانى

ميرو : لا حول ولا قوة الا بالله .. هو للدرجة دية بقى متبعتر .... الصراحة يا أم سحلول هو يستاهل .. بقى بعد ماتوافقى تتنازلى عن مبادئك وتقفى تسبليله يقلك عدينى الشارع .. رجالة آخر زمن .. بس متزعليش نفسويتك ولاتقهريها خالص.. ليكى عندى عريس طيب وابن حلال  .. هبقى أحكيلك عنه المرة الجاية عشان انتى رغاية ووجعتيلى دماغىبحكاياتك اللى مش بتخلص !

أم سحلول : ماشى يا ميرو .. أنا مستنية بس متتأخريش عليا

................

آخرة الحب المميت يا أصحابى ان أحمد اتفلسع وصاحبه المغنى الرغاى أم سحلول طلعت غلها فيه والله يكون فى عونه بقى ويعرفوا يجمعوه تاتى .. وبعدين أم سحلول عملت deactivation  للأكونت بتاعها على الفيس وقعدت فى ركن المدونة تغنى أغنية شيرين

كتير بنعشق ولا بنطول ... وكتير بنعشق ولا بنقول
ومفيش حكايه بتستمر زى مابدأت ليه على طول ؟؟؟

فى عشق بيستنانا وعشق بنستناه
وعشق بينسينا العشق اللى عشقناه

أأأأأأأأأأأأأأأأه

القلب اللى بيجرحنا ف حاجه اكيد جارحاه
وجراحنا بتفكرنا بالقلب اللى جرحناه

 ..............

فى النهاية يا صديقى أنا مش عايزاك تقهر فى نفسويتك ولا تنفعل ولا تحرق دمك خاااااالص .... وأوعى تتهور وتحاول تقتحم المدونة مش عشان هتلاقيها مقفولة وهتتعب عقبال لما تخترقها .. لا بالعكس ده أنا مش عارفة أقفلها  أصل الموكوسة حبيبتك استضافت عفاريت حارتها المقاريض يشتوا كام يوم عندى فى المدونة .. ومن غير ما تاخد اذنى .. تصور ! .. أصله كان بيت أبوها .. ومن يومها والمدونة حالها اتقلب .. يعنى من الآخر أوعى تقرب منهم .. لأن أى مقاريض الأيام دية أعوذ بالله مش بيخافوا من حد نوهائى !

 .....
دلوقتى بقى أقدر أقلكم ان الدنيا لذيذة جدا ونغنى بقى ( الدنيا ربيع والجو بديع ) .. يااااااااه يا جماعة الشر ده طلع علاج مفيد أووى للاكتئاب
هروح أشرب نسكافيه  بقى .. اتفضلوا معايا .... وعقلكم ميروحش لبعيد .. أكيد يعنى مش هتشربوا .. هتتفرجوا بس!

أه يا أحمد كنت عايزة أقلك قبل ما أمشى انك تسلملى على صديقك المغنى أورهان ..  انا عارفة انك صاحب واجب وأكيد لو مجالكش اكتئاب نفسى حاد أو سكتة قلبية بعد الشر يعنى هتروح تزوره  فياريتتقله ميرو بتقلك ألف سلامة  وتوصله انى معجبة بيه جدا وان شاء الله لو ربنا نفخ فيه وخف يبقى يجيلى مستشفى المجانين وميقلقش خالص من أم سحلول أنا المرة دية اللى هعمل معاه الواجب .. أومال ايه ده صديق صديقى ولازم ولابد نكرمه!!