حاجة حلوة

لوسمحتوا  الكل يجمع هنا بسرعة بسرعة

عايزة أقلكم على موضوع خطير جدا 

خدوا نفسكم بقى  وركزوا معايا 

بقلكم ايه ياولاد محدش شاف النضارة بتاعتى ؟ .. خلاص خلاص لقيتها ..  استعنا على الشقى بالله  

لأ بلاش تركزوا وتبحلقوا أوى كده فى الشاشة ..  لنظركم يضعف وتقولوا مروة السبب

طيب يا عم براحة متزقكش أنا مالى  خليه يضعف بس ابقى كل كل يوم جزرة  

خلاص خلاص مبتحبش النصايح .. طيب خليك  ريلاكس 

بطلوا رغى بقى وخلونى  أفتكر كنت عايزة أقول ايه !

متقلقوش أكيد مش عايزاكم علشان تتذوقوا بسكوتاتى وكحكاتى ، اينعم هما اختراعاتى وعمايل ايدتينى  الاتنين دووووول وأكيد أكيد كنتوا هتاكلوا صوابعينكم وراهم زى العيال اخواتى 

بس الصراحة الصراحة أولا انا مش معايا رصيد أطلبلكم الاسعاف ، وثانيا هما أكيد حفظوا رقمى  من كتر ما اتصلت بيهم ومش هيردوا عليا تانى ، وثالثا أنا دلوقتى مش فاضية لأنى منقوطة .. بما انكم مش سألتوا  أنا منقوطة ليه ؟ .. يبقى من عينتينى الاتنين أنا هحكيلكم كل حاجة !

 سبب  نقطتى المنقوطة هى التهمة الزور اللى اتهموا بيها بسكوتاتى وكحكاتى واللى سببتلهم سمعة وحشة ! .. تلاقى الجيران  جايين يزوروا العيال اخواتى الغلبانين .. أصل فى سركم كده - وخلوا السر فى بير -  جالهم تلبك معوى .. بس متقلقوش هما بقوا كويسين بعد غسيل المعدة اللى عملوه ، المهم بيجوا يزوروهم  بالنهار علشان يكون الوقت صيام ومش يضطروا ياكلوا  من عمال ايدتينى ،  واللى بينقطنى أكتر  انهم بيكونوا جايين بطبق بسكوتاتهم وكحكاتهم معاهم .. قال ايه عايزينى أتذوقهم وأشوفهم حلوين ولا لأ ! ، مش عارفه بيعاملوا بسكوتاتى وكحكاتى  كده ليه .. هما ذنبهم  يعنى ان العيال اخواتى معدتهم مش قدرت تستحمل طعامتهم ؟ !

بس متخافوش عليا ..  أنا ولا همنى ولا آثر معايا ، محدش هيقدر يحبطنى أبدااااا ..أنا هقعد بعد الفطار أكل عمايل ايدتينى اللى تعبت فيهم  .. وانتوا بقى عليكم  تطلبولى الاسعاف

بس أنا احتياطى هتشاهد علشان أنا عارفة انكم عايزين تخلصوا منى

يوووووووه  بطلوا رغى بقى خلونى أقلكم ايه الموضوع الخطير قبل ما أودع !

 

لأ  يا ذكى .. مش عايزة أقلكم كل سنة وانتوا طيبين .. ما أنا قلتلكم امبارح ! .. مرة واحدة كفاية علشان بتخنق بسرعة   

 أنا كده هتخنق وهتجنن بجد ..  لبس عيد ايه  انت كمان اللى عايزة أخد رأيكم فيه ! ، مش سمعنى وأنا بغنى (قالوا راحت علينا خلاص ) ؟!

بص يابنى أنا هفهمك علشان انت شكلك غلبان وصعبت عليا أوى 

الحكاية انهم بيقولوا ان الواحد لما بيكبر مش بيجيب لبس عيد

رحت قلتلهم .. يعنى ايه كبرت ..  يكونشى أنا بقى عندى 60 سنة وأنا مش واخدة بالى ؟؟!

رحت لقيتهم بيبصولى باستغراب .. كأن فيه حاجة فى شكلى غلط 

استنوا كده لما أحسبها ، 24 سنة و11 شهر يبقى 35 و17 يوم يبقى 52 و11 ساعة يبقى 63 ودقيقتان يبقى 65 سنة ، تصدقوا كان عندهم حق وأنا ظلمتهم  ..  أنا كبرت وراحت عليا .. يالا بقى ربنا يسامحنى .. قولوا .. آميييييييييييييييييين

بس برده فيه حاجة تجنن أكتر

العيدية اللى اتلغت دية وبرده لنفس السبب .. نفسى أعرف ليه ؟ ما يقولوا بصراحة كده انى فلستهم  !

والحاجة اللى تنقط أكتر هى  العيال المقاريض اللى طلعولى فى البخت دووول علشان يفلسونى ،  الناس تتجوز وتجيب عيال والمفروض أنا بقى أدى عيدية ، طب وأنا مااااااااااالى .. مش كفاية راحت عليا .. لأ كمان لازم أعلن  افلاسى

المهم بلاش تقلبوا عليا المواجع بقى

يوووووه بقى مش قلتلكم بطل رغى ، بقلكم مش فاضلى كتيييييييييير !

بصوا بقى سيبكم من الجنان اللى فوق ده وركزوا معايا  علشان هنقوووول كلمتين جد

أنا وأصحابى فى الكلية كنا متعودين نعمل حاجة حلوة ليلة العيد .. وأكيد الحاجة دية الفكرة بتاعتهم هما  .. انتوا عارفين أنا مش بيطلع  منى غير الأفكار المجنونة

وبما انى أنا وأصحابى اتفرقنا وكل واحد دلوقتى فى حياته .. يبقى مفيش غيركم تدبسوا معايا فى الحاجة الحلوة دية

والحاجة الحلوة دية هنعملها فى ساعة الا ربع 

 بس هنصحى كلنا فى نفس الوقت وليكن مثلا الساعة 3 قبل الفجر

هنتوضى ونصلى ركعتين ونقرأ فيهم أخر صفحة من سورة الزمر

﴿ وسيق الذين اتقوا ربهم الى الجنة زمرا حتى اذا جاؤها وفتحت ابوابها وقال لهم خزنتها سلام عليكم طبتم فأدخلوها خالدين ﴾
وبعدين ندعى ان  ربنا يدخلنا الجنة مع بعض زى ما اجتمعنا على طاعته وذكره مع بعض

والوقت الباقى قرآن واستغفار 

بس كده

 وربنا يتقبل منا ومنكم ان شاء الله
اللهم اجعلنا ممن يقال لهم سلام عليكم طبتم فأدخلوها خالدين

احبكم فى الله

يالا بقى سلام أشوفكم بخير 

وياريت محدش ينسى عيديتى مع العيال الصغيرين

خبى السر يا قمحاية مهما تزن النحلاية

بمناسبة ان رمضان بكره .. كل سنة وانتوا طيبين .. عايزة أسألكم سؤال رخم أووووى
بس بقلكم ايه تجاوبوا من غير شتيمة .. 
وحتى كمان عارفين الاحساس اللى بتحسوا بيه لما بتكون مخنوقين من حد رخم ..     الاحساس اللى من جوه ده .. عارفينه صح ؟
برده ممنوع ..
يعنى من الأخر ممنوع تتهوروا أو تتخنقوا أو تتضايقوا
معلشى يقى اللى أوله قهر أخره ربنا ربنا يسامحنى 

                                             
صايمين ولازى كل سنة ؟؟

سؤال بنسأله كل سنة على سبيل الاستظراف
طبعا أنا أقصد الأولاد بالاستظراف ده
وقبل ما تتحيروا وتسألوا ليه كده ؟
هقلكم تفرقة عنصرية بقى
وقبل ما تتهوروا وتقولوا ايه البت الرخمة دية هقلكم 

( ربنا ربنا يسامحكم )




بعد الرخامة والخنقة .. نويت أصالحكم بسر خطير
بس قربوا ودانكم علشان محدش يسمعنا وبالذات أم سحلول .. تمسكهالى زلة
هى حاجة عملتها وأنا صغيرة ومقلتش لحد عليه .. أو بمعنى أصح أنكرت بشدة انى عملتها
بس انتوا طبعا أصحابى ومش بحب أخبى عليكم حاجة

وهقلكم زى ما وائل جسار قال
خبى السر يا قمحاية مهما تزن النحلاية

طبعا هتقولولى قولى سرك فى بير ..
ماشى وأنا هصدقكم
بس لو رحتوا قولتوه للنحلة هغرقكم فى البير أو فى برميل الطرشى مع أم سحلول
خلاص كده اتفقنا .. 
برده اللى أول سر أخره ربنا ربنا يسامحكم 

السر بقى
ان أنا لما كنت صغيرة أوى كان عندى 5 سنين تقريبا .. كانت أول سنة ليا فى الصيام
كنت شاطرة بقى و بصوم اليوم كله ومش بيعيط زى العيال المفجعوين

 ( اوعى تكونوا منهم .. ولو انتوا منهم بلاش تقولوليلى علشان انتوا عارفينى مش بعرف أخبى سر جوايا )

المهم أنا زى كل يوم صمت عادى وبعدين فطرنا برده عادى و بعدين نمت على أساس انى هصحى زى كل يوم أتسحر قبل ما أصوم اليوم التانى
بفتح عينى وصحيت بشكلى العسل المنكوش ده



ببص حواليا .. خير اللهم ما أجعله خير .. لقيت الدنيا منورة .. قام قلبى وقع فى رجلى لأن كده معناه ان معاد السحور راح خلاص
زعلت بس مش زعلت أوى .. قلت مش مشكلة تلاقيى مامتى حبيبتى راحت عليها نومه
مشيت فى البيت وأنا لسه بفرك عينى .. رحت اتخبطت فى الترابيزة .. رحت ببص قدامى .. اتفاجأت وبحلقت .. لقيت أثار الخيانة والغدر ..
اكتشفت انهم صحيوا واتسحروا وسايبين بقية الأكل على التريبزة .. يعنى كمان مش مخبيين خيانتهم .. رحت أنا بقى اتنرفزت جدا ووجعنى قلبى اللى وقع فى رجلى ..
( قبل ما تسألوا ازاى وجعنى .. هقلكم أصلها مش محتاجة نباهة على فكرة .. مش انا اتخبطت فى الترابيزة فى رجلى .. طبعا المفروض كنت عيطت وصوتى المسرسع وصل لحد أخر الشارع .. بس حظهم حلو لأنى لما اتفاجأت بالخيانة نسيت الوجع وبعدين لما اتأكدت منها حسيت بالوجع ولأن قلبى وقع فى رجلى .. فكان لازم يتعدى بشوية وجع .. أكيد مش فهمتوا حاجة .. 
صدقونى ولا أنا )


 

بطلوا بقى أستلتكم دية وأطلعوا من دماغى وخلونى أكمل
كنا فين ؟
أه افتكرت .. لما اكتشفت الخيانة اتنرفزت و لقيت نفسى جوه التلاجة .. ومحدش يسألنى ليه علشان مش فاكره اللى ودانى عندها يمكن كنت عايزة تلج ولا حاجة تخفف قلبى اللى اتوجع فى رجلى
فتحت التلاجة بحلقت أكتر .. اكتشفت خيانة أعظم .. لقيت حلويات وجاتوه وأنا بمووووووووووت فى حاجة اسمها جاتوه بالشيكولاته .. مقدرتش أستحمل طبعا انهم مش صحونى وكلوا لوحدهم .. تقريبا كانوا خايفين أخلصلهم على الجاتوه كله
وعلشان أنتقم وأبوظلهم خطتهم .. ومن غير ما أطول عليكم بقيت شبه الولد القمر ده 

وفجأة وبعد ما كانت الدنيا هدووووووووء .. لقيت مرة واحدة صوت مامتى من ورايا
( بتعملى ايه جوه التلاجة يا مروة ؟ )
طبعا كان شكلى كفاية انه يجاوب عنى
بس أنا بقى سألت بلماضة :
انتوا مصحتونيش أتسحر امبارح ليه ؟
ردت مامتى بخنقة منى :
صحيناكى ومردتيش تصحى .. بقى نومك تقيل أوى
قمت قلت بمسكنة وطيبةواستسلام بالأمر الواقع :
خلاص بقى هصوم من غير ما اتسحر
 
وهربت من قدام مامتى ورحت غسلت ايدى ووشى من أثار الجريمة اللى عملتها ونويت أكمل صيام ولا كأنى عملت حاجة

بس مامتى حبيبتى طالعة لبنتها .. أنا يعنى .. مش بتعرف تخلى سر جواها أبدا .. ( عندنا ميزة تجنن )
قالت بحسن نية ان مروة فطرت النهارده .. وطبعا الشخص اللى عنده الميزة اللى عندنا برده بحسن نية نقل الخبر .. ولأن احنا بيت عيلة عندهم كلهم الميزة دية الخبر اتنشر بسرعة وكانت فضيحة جامدة .. كل شوية أقابل عيل رخم ( قصدى طبعا الأولاد ) يقعد يضحك ويقلى انتى فاطرة النهارده .. لحد ما لقيت زفة تجنن بتجرى ورايا على السلم و بتغنى الأغنية اللى مش فاكرها دية

يافاطر رمضان ياخاسر دينك القطة السوداء هطقع مصرينك
   

المهم أنا هربت منهم بأعجوبة .. واتخاصمت أنا ومامتى بطريقة الصباع الصغير .. ولما جه بابا أنكرت بشدة انى فطرت وقعدت بره على السلم أعيط وأشتكى للدبدوب .. وعلشان يدخلونى من بره جابولى بقية الجاتوه أكله .. وانتهى الموضوع ان اللى ماما شافته جوه التلاجه بياكل الجاتوه الصبح كان عفريت 
( من الواضح كده ان أم سحلول كانت مضطهدانى من وأنا صغيرة زى ما بتعمل مع ضياء دلوقتى)

المشكلة دلوقتى بقى ان كل ما حد ينادينى وأنا جوه التلاجة أفتكر الحكاية دية والسر الخطير ده
ولو سمحتم مفيش حد يستغرب أو يتريق
أنا بقضى أكتر اليوم جوه التلاجة عادى يعنى .. وأمى تفضل تنادى عليا
يا بنتى اقفل التلاجة .. نفسى أعرف بتعملى ايه جوه ؟
ولحد دلوقتى مش عارفه تعرف أنا بعمل ايه جوه لحد ما هتتجنن منى .. تقريبا كده أنا لحد دلوقتى بنتقم من مامتى
( ربنا يباركلى فى عمرها يارب )
 

..................................

نروح بقى لأم سحلول

أحمد
 
معلشى بقى مش هخرجها من البرميل دلوقتى .. خليها تتعذب شوية .. مش كفاية كلت الجاتوه من التلاجة وطلعتنى فاطره وخلت العيالة يتريقوا عليا وسببولى عقدة مخليانى بحب أقعد فى التلاجة لحد دلوقتى .. ده كده بقى بينى وبينها تار .. وأنا صعيدية ولازم أخد بالتار


ضياء
 
أنا أخدتلك حقك أهو ومش هخرجها دلوقتى ..
تقريبا هى اللى مسحت التعليق  بتاعك .. أو يمكن أحمد .. أنا بهدى النفوس مش أكتر
بس ده مش معناه انك هتعرف تهرب زى ما انت عاوز .. احتمال فى رمضان أتجنن وأستغلك زى أحمد علشان أنتقم من أم سحلول .. أو أدبسك برده زى أحمد .. يعنى انت وحظك .. حسب الظروف بقى
بس عندك حل علشان تأجل استغلالك شوية .. انت تقعد تدعيلى فى رمضان ان ربنا يهدينى وأبطل جنان لحد العيد .. ويمكن أخلص منها فى العيد ونفرح فيكم .. قصدى بيكم .. وأهو تبقى الفرحة فرحتين

دينا , ريماس , وهبة 
 
أم سحلول زعلانة منكم جدا لأنكم قعدتم تضحكوا على مشكلتها النفساوية .. ومش بتحاولوا تساعدوا فى حلها خالص
وبتقلكم متخافوش هى عفريتة عندها ضمير ومش بتحب تخطف خطيب حد .. بس هى عطفت عليكم وهتديكم فرصة قبل ما تتصرف معاكم .. تتعاونوا مع بعض وتتصرفولها فى عريس منتحر عقبال ما هى تتعذب شوية فى برميل الطرشى
وأنا علشان أساعدكم ومتقولوش عليا ندلة واتخليت عنكم .. مش هطلعها دلوقتى من برميل الطرشى .. بس انتوا ادعوا انها تفطس

محمد 
 
صعب أوى طلبك ده .. انت عارف انى بحوش منه كميات كتيرة علشان لما يشح من السوق أبيعه أنا بقى بأسعار غالية جدا وأستغل الناس المدمنين زيى
بس ممكن علشان أخليك مدمن أعملك كوباية وبعدين بقى أستغلك براحتى

مصطفى سيف الدين

أم سحلول مش نافع معاها حاجة خالص ومش ناوية تنصرف الا لما أجوزها عريس منتحر أو تجننى وبعدين تجننكم
بس هو فيه اقتراح من حد بيعزك جدا وهو

ايه رأيك لو تخطبها ؟
 على فكرة يا ريماس أنا مقلتش حاجة خالص 
 
انتى بقى ضحى وخلينا نفرح بيكم على العيد علشان أم سحلول تبعد عن خطيبها

...................................



بجد فرحانة جدااااااااااااااا انى اتعرفت عليكم .. وبصراحة معنديش كلام يوصف فرحتى بيكم ومشاعرى ناحيتكم
غير انى 

( بحبكم فى الله )

كل عام وانتوا بألف خير وصحة وسعادة
كل عام وانتوا اللى الله أقرب وعن معصيته أبعد وعلى طاعته أدوم

............................

نبطل جنان بقى ونتكلم جد شوية

حكايات لاسعة

 الفكرة حلوة أوى 

بس بما انى   مش عرفت أجاوب على أكتر الأسئلة  فأنا قلت بقى أضحك عليكو وأوجع دماغكم بشوية تدوينات قديمة بحبها وشوية حكايات لاسعة

 الفراق ليس نهاية الحب والصداقة    
 http://moment-hopes.blogspot.com/2012/04/blog-post_12.html

 بحب  التدوينة دية جداا علشان  بتفكرنى بأصحابى من الكلية 

 صرخات من أعمق أعماق النفس البشرية

http://moment-hopes.blogspot.com/2012/05/blog-post.html

حلو أوى اننا نحس بغيرنا .. ونحاول نقرأه من جوه .. ومش ننتسرع ونحكم عليه من صفاته المكتسبة من مشكلة بيعيشها وبيحاول يخبيها بتصرفات ورد فعل بيكون غريب وقاسى .. وأكيد الغلط هيكون مننا احنا لانه لو حس معانا بالراحة .. بشوية دفى انسانى .. مش هيتصرف كده وبالتالى هنقدر نساعده

خربشات قلم مجنون

http://moment-hopes.blogspot.com/2012/06/blog-post_20.html

غالبا بتفهم غلط .. بيقولوا انى غامضة وده يمكن علشان مش عندى أسرار أو حاجة  مهمة أخبيها  .. فبيفتكروا ان ده غموض
 علشان كده كتبتلهم التدوينة دية

سسأظل كما أنا

جريئة خجولة ، واضحة غامضة ، متمردة مسالمة ، عنيدا مرنة ، بريئة مشاغبة ، حالمة واقعية ، حنونة  قاسية 

لن أهتم مهما تناقضت صفاتى فى نظر غيرى .. ولن أهتم اذا اتهمنى البعض بالغرور أو الجنون أو الغموض أوالقسوة أو.....  ، لن أنفى التهمة .. ولن أحاول إثبات العكس

فهذه أنا عندما أكون مع من لا يفهمنى .. أتكلم بلغة غريبة صعبة ، ولكن من يحبنى يستطيع أن يتعلمها 

ديه جزء من خاطرة ( سأظل كما أنا ) فى كتاب لحظات تأمل



غلاسة 




صحيت من النوم على صوت منبه التليفون الرخم اللى بظبطه كل يوم  على نفس المعاد . 

 وزى كل يوم سمعت  صوت غلس جوايا  بييقولى نامى تانى .. انت وراكى ايه يعنى .. وانت غاوية تعب وخلاص  .. ايه اللى يصحيكى بدرى كده .. هتروحى تبيعى لبن ؟؟
ومش بيسكت غير لما أنا أسكته وأرد  بغيظ وغلاسة أكتر من غلاسته  : 

انت مالك .. أه بحب أتعب نفسى .. وعند فيك مش هبيع لبن .. هبيع نسكافيه

الموضوع بقى انى مهما نمت متأخر لازم أصحى فى نفس الميعاد اللى بصحى فيه كل يوم  ( اللى هو الساعة 4 الفجر ) لحد ما بقى تقريبا معدل نومى 3 أو 4  ساعات .. ونفسى أعرف السبب الحقيقى لموضوع الغلاسة على نفسى ده
يمكن علشان بحب أكون صاحية فى الوقت اللى الناس  بيحبوا النوم فيه أو زى ما بتقول  أمى حبيبتى من كتر النسكافيه اللى بتشربيه بيخلى دماغك صاحية وارحمى نفسك شوية .. أو يمكن علشان دماغى على طول شغالة ومش بتحب تنام كتير..   أو لأنى اتعودت من أيام الكلية بقى الله يسامحها الصحيان بدرى .. كنا دايما بنصحى الفجر علشان نروح المحاضرات الساعة 8 بالظبط 

شريرة جداااا


انتصرت على نفسى المتمردة  وقمت من السرير وبعد شوية سمعت صوت دوشة فى المطبخ .. رحت أشوف ايه الحكاية .. يمكن يكون حرامى يقوم يتخض من شكلى وأنا لسه صاحية من النوم ويطب ساكت

  المهم رحت ومش لقيت حرامى (  حظه حلو ..أمه دعياله ) 
لقيت  خناقة كبيرة بين النسكافيه والشاى
برطمان النسكافيه ماسك سكينة .. وبرطمان الشاى ماسك شوكة .. والحلل والأطباق بيحجزوا بينهم والمعالق الصغيرة عمالة تتنطط فرحانة
 النسكافيه عمال يضحك ويغيظ  الشاى ويقوله ميرو هتشرب منى أنا مش منك انت .. والشاى عمال يعيط ويقوله والله لأقتلك .. ميرو وعدتنى امبارح انها هتشرب منى أنا .. بصراحة أنا صعب على الشاى بس هو كداب لأنى مش وعدته
المهم فى الأخر لأنى شريرة ومدمنة نسكافيه .. شربت نسكافيه وسبت الشاى يعيط وقلتله يا عم غير من  نكهاتك شوية.. اتعلم من النسكافيه وبطل كدب بقى ..  هو أنا هشربك شفقة

بس بعد شوية رحت صالحته .. وأكيد يعنى مش علشان خاطر صعب عليا 

لكن علشان أنا بموت فى  البسكويت بالشاى بتاع الأطفال 
 طبعا انتوا فاكرين انى بمسك البسكوتة وأغمسها فى كوباية الشاى

لأ مش كده خالص .. لأ أنا مش بنوتة رقيقة وطيبة كده ..  وهى هتخلص منى كده بسرعة .. لأنى أنا شريرة بحب أعذبها قبل ما أكلها 

أنا هقولكم الطريقة الصح وأدينى أكسب فيكوا ثواب وأعلمكم شوية شر ينفعوكم

بصوا انتوا تجيبوا كوباية الشاى وكيس البسكويت من غير ما تفتحوه وتتجيبوا شاكوش وتنزلوا بيه على كيس البسكويت لحد ما يبقى فتافيت  .. وبعدين طبعا تفتحوه ده لو ما تفتحتش واتبعتر منكم فى كل حتة شوية وتفضوا فى الكوباية وبألف هنا وشفا

 احساس بالذنب بيخنق

القراءة والكتابة والرسم هوايات جميلة جدا بحس انى   معاهم  كذا شخصية .. ساعات ببقى مجنونة أو مضحكة أو رومانسية أو كئيبة أو واقعية أو ... بس المشكلة انها بتخلينى أحب دايما أكون فى عالم لوحدى .. بفضل  السكوت على الكلام .. الهدوء على الدوشة  ......ز
ودية بقى المشكلة .. لأنى ببقى خنقة ومملة لو حد حظه وحش واضطر يتكلم أو يقعد معايا   .. بفضل ساكته .. وبيصعب عليا وبقعد  أفكر أكلمه فى ايه .. وفى الأخر مش بلاقى .. المهم فى النهاية بحس ناحيته بالذنب

مستشفى للجنون والادمان
 



لأنى مدمنة نسكافيه وأكتر الأوقات  دماغى بتلسع وببقى شريرة جدا .. فنويت انى أعمل مستشفى  تجمع المجانين وتعلم ادمان النسكافيه
علشان نبقى كلنا مجانين زى بعض
علشان كده  اللى عايز يدخل المستشفى لازم تكون عنده نية للادمان  وأوعده هيبقى شكله زى الولد الأمور ده .. والمفاجأة اللى تجنن ان أم سحلول هتكون معانا فى المستشفى

لما تكون متعصب

بحبك لما بتكون متعصب ومتنرفز و ..

وايه تانى ؟؟

وبس ..  كفاية عليك كده

أول مرة أشوف حد بيحب حد وهو متعصب

أنا .. وقبل ما تسأل ليه ؟؟ هقولك بس سلفنى ودانك وقلبك ومشاعرك وعينك واحساسك .... ولا أقلك كفاية كده

  علشان بيقول سلف تلف والرد خسارة

طبعا انت عارف انى مجنونة وشعنونة ومش بحب حد يزعقلى

بس لما تكون متعصب ومضايق .....

 استنى بس دماغك ما تروحشى لبعيد .. أكيد يعنى مش هتقلب قطة سيامى لا بتهش ولا بتنش .. وانكمش كده على نفسى فى ركن بعيد عنك .. لأ انسى

ومش هسيبك تكسر الفاظة اللى فيها اللى الورد اللى جبتهولى امبارح لأن هقعد أعيط  على الورد والعياط بيجيب الفقر واحنا طبعا مش ناقصين  غير انى بيكون شكلى وحش أوى  .. وبصراحة أنا خايفة عليك تتخض تموت بعد الشر عليك 

وبعدين 

طبعا انت هتضطر تجيبلى غيره و كمان تجيب فاظة واحنا مش ناقصين مصاريف .. ده أنا حلمت برهف  امبارح كان حاطة ايدها على خدها وشايل هم البمبرز بتاعها

 ولا كمان هسيبك تكسر كوباية النسكافيه اللى لسه عاملاها وملحقتش أشربها  .. ربنا يسامحك مخلتنيش أظبط المود وأعمل دماغ

وكمان مش هخليك تكسر طقم الصينى اللى أهلى دافعين فيه دم قلبهم علشان حضرتك تهدى

وكمان مش هخليك تزعق وتعلى صوتك ..  مش علشان أنا بنت رقيقة وبترعب وبخاف من الصوت العالى .. ولا علشان الجيران هتسمع صوتك ويجوا يحكموا بينا وبعدين احنا نطردهم ونقلهم احنا خلاص اتصالحنا فيقوموا قايلين علينا مجانين .. فنقلهم وهو المجانين أحسن مننا فى ايه ؟؟   

لكن علشان لما بتعلى صوتك .. شعرك بيتنكش ووشك بيحمر  يعنى بيكون شكلك وحش أوى .. وأنا حبيبى مش وحش .. وكمان شكلك الوحش ده بيضحكنى  وأنا مش طالبة معايا ضحك خالص بعد ما ضيعتلى المود
وطبعا لازم أعملك حاجة سخنة علشان صوتك اللى راح من الزعيق 

المهم سيبك من وجع الدماغ ده .. كنا فين
أه لما تكون متعصب

وبما انك دلوقتى حبيبى وجوزى .. يعنى مش ابن الجيران

أه استنى الأول لما أحكيلك حكاية ابن الجيران

انت عارف طبعا يا حبيبى انى أنا كنت أعقل وأحلى بنت فى الشارع  .. كنت بنت لذيذة وعسل وسكر زيادة  .. يعنى تقريبا  زى البسبوسة اللى بتجيبها من  محل الحلويات اللى على أول الشارع .. ومع انى بقلك كل مرة بلاش تجيب منه علشان  بيزودوا السكر فى الحلويات وأنا عاملة ريجيم .. برده بتجيب منه  ..  ربنا يسامحك  بقى مش عارفه أخس الربع كيلو اللى زدتهم 

المهم احنا كنا فين .. 
أه كنا فى ابن الجيران ..  ده بقى مكنتش بطيقه خالص .. كان شايف نفسه أوى .. مش عارفه على ايه 

هو أه كان واد أمور ولذيذ و البنات بتجرى وراه ..  وكمان كان شاعر وبيكتب ويقول  كلام يجنن  .. انت عارف البنات بيموتوا فى اللى يقولهم يا قمر .. يا جميل ........ والاسطوانات الخايبة دية

 بس أنا ولا كان يهمنى أى حاجة من الحاجات دية 

ولما حاول يقولى شوية من الاسطوانات المشروخة  بتاعته دية .... خد اللى فيه نصيب

بلاش بقى نقول حصله ايه ونفضحه حرام

أه أنا بقول كده برده .. ان الله حليم ستار .. وبعدين ما هو ربنا هداه على ايدك

 

المهم سيبك منه

خلينا نكمل ..  لما تكون متعصب وبما انك جوزى حبيبى وأمك موصيانى عليك

أه على فكرة الست والدتك .. أنا غُلبت معاها ..  مفيش حاجة بعملها بتعجبها .. دايما تتطلعلى القطط الفاطسة فى أى حاجة بعملها 

مفيش فايدة معاها خالص وأنا عمالة أقول يا بت استحملى دي زى أمك وربنا هيجازيك خير وبكرة عيالك يتجوزه ويعاملوكى زى ما بتعامليها

المهم انسى .. أنا قلت ربنا يسامحها ويهديها عليا  ..  بس انت عارفنى مش بحب أخلى حاجة جوا خالص

المهم كنا فين

 لما تكون متعصب وبما انك جوزى حبيبى   و أبو عيالى اللى جايين فى السكة

أه أنا انى  حلمت امبارح انى هجيب بنت وعلى فكرة هسميها رهف مش هسميها على اسم أمك 

المهم  أنا قلتلك ان رهف كان قاعدة زعلانة وحاطة ايدها على خدها  .. قلتلها مالك يا بنتى ايه اللى مزعلك كده .. 

المهم متخافشى مكانتش شايلة هم البمبرز بتاعها  .. بصراحة البت طلعت حنينة أوى وكانت بتوصينى عليك  يعنى  زى ما بيقولوا البنت حبيبة أبوها .. 

قالتلى يا ماما لما يكون بابا متعصب أحضنيه 

( لأ بلاش تبصلى البصة دية والله يا خويا أنا قلتلها عيب يا بنت)

راحة قالتلى البنت اللى لسه مطلعتش من بطنى .. 

يا ماما عيب ايه؟؟
 مش عاملة تقولى جوزى ومبقاش ابن الجيران

خلاص ياماما اكسبى فيه ثواب وأحضنيه أوى .. وطبطى عليه وامسحى على راسه وأقرأيله أية الكرسى والمعوذتين لحد ما يهدى 
 أصل ساعتها بابا حبيبى  بيكون راكبه شيطان  وانتى طبعا مش  هتسمحى  أبدا ان شوشو يطلعلك لسانه وينتصر عليكى ..
 وبعدين امسكى ايده وروحوا اتوضوا وصلوا مع بعض ركعتين وأنا هصلى معاكم وأدعيلكم ربنا يهديكم لحد ما أجى وأجننكم أنا بالمبرز بتاعى 

وكمان قالتلى يا ماما 

 خلى شوية مودة من عندك على شوية رحمة من عنده  وكده تبقوا أخر تمام  

يعنى انتى تحتويه شويه وهو يحتويكى شوية 

أنا بصراحة عجبتنى  يحتويك دية 

و سمعت امبارح فى برنامج بيقول .. ادفع عمرك لقلب صادق يحتويك 

رحت بقى فكرت و قلت لما أسمع كلام البت وأغير اللى كنت هعمله لما تكون متعصب علشان تدفع عمرك كله ليا .. 

وبعدين لما تهدى وتبطل عصبية أعمل كوبايتين نسكافية و نقعد وأقلك يالا بقى احكيلى .. كنت مضايق ليه

بس صدقنى صدقنى لو طلعت حاجة تافهة ..  ولا أقلك بلاش  بقى ربنا يسامحك

وهو انتى كنتى ناوية تعملى ايه لما أكون متعصب ورهف خلتك تغيريه 

 عادى يا حبيبى
 لما تكون متعصب وبما انك جوزى حبيبى وابن الجيران اللى ربنا هداه على ايدى وكمان مامتك حبيبتى موصيانى عليك وأبو رهف حبيبة أبوها .. 
هقلك اخزى الشيطان يا حبيبى وقوم نام أحسن

رسالة من كائن معقد يستحق الدراسة

( لم أكن ممثلة بارعة أتقنت دورها بمهارة على مسرح الحياة ..
شعرت روحى بالغربة والوحدة فأحضرت قلمى وألوانى وأطلقت العنان لروحى لتحلق بعيدا فى أعماق الخيال ورسمنا معا عالم جميل ولونته بأبهى وأجمل الألوان ..
عالم روائى خيالى كنت أنا فيه المؤلف فكتبت أحداث بسيطة مختلفة .. أحيانا مثيرة، وأحيانا مضحكة ، وأحيانا حزينة ، وأحيانا رومانسية ،.... ولكنها مليئة بالمعانى العميقة التى تزين عالمى فتلمس أوتار القلوب و تمس أعماقه
وكنت الممثلة البارعة فمثلت جميع الأدوار بمهارة واتقان وعندما رفع الستار وأضيئت الأنوار .. بدأت بالتصفيق الحاد لأننى كنت أيضا الجمهور  )

أتخيل ابتسامتك الساخرة المستهزئة بما قرأته
حسنا سأتغاضى عن سخريتك و سأحاول التحكم فى غضب الفتاة الوقحة التى بداخلى وسأوضح لك الأمر
أنا لستً الفتاة الطيبة البريئة التى هى أقرب الى ملاك ضل طريقه ولا يعرف طريق العودة الى عالمه .. فأضطر أسفاً أن يعيش فى دنيا البشر كما يدعى الكثيرون وأنت منهم
ولا أرغب فى تجسيد دور الفتاة الشريرة التى تحب العبث ويسرها ان يتألم الناس .. فتكذب وتحبك الخطط حتى اذا أشعلتها نارا ذهبت فرحة بما حققت .. و أغلب الوقت تصاب بالأرق ويفارقها النوم ليس بسبب تأنيب ضميرها ولكن فرحا وزهوا ونشوة بانجازاتها العظيمة

قال لى أحدهم ذات مرة أننى كائن معقد يستحق الدراسة .. لم أشعر بالذعر حينها .. ولم يفرح هو بما قال
كان ينتظر أن يلمس الاضطراب بداخلى ولكنى قلت له بهدوء جملة سمعتها وأحببتها فى مسلسل سخيف كتصريحه السخيف
( أنا شخص تحتاج معرفته حتى تحبه )

مازلت تبتسم و تقول من هذه المجنونة ؟؟!!
هذه المرة الفتاة الوقحة هى من تغاضت عن تجاوزك بارادتها لأنها تحب جنونها وتستمتع وهى تقضم أظافر يديها وتلتهم شفتيها بتلذذ كمصاصى الدماء
ودائما عندما تفكر تقطب جبينها فتبدو ملامحها عابسة أكثر الوقت .. فتجعلنى دائما أبدو كمعلمة فاشلة  أحاول تعليمها كيفية الابتسام ولكن بلاجدوى  فهى شخصية جادة معقدة مرهقة عنيدة مملة حتى أنا مللت منها
فدائما لا تفعل الا ما يحلو لها ولا تكترث لرأيى ولا لردود أفعال الأشخاص من حولها وأنت منهم
 تقول أنها 
لا ترتاح للطافتك الزائدة وتوددك المبالغ فيه


أتخيلك وقد اختفت ابتسامتك الساخرة ، وعلت الدهشة وجههك ، وكست الحيرة ملامحك ،  و شفتاك تردد (فتاة مستفزة)
لن أستطيع التحمل أكثر من ذلك .. سـأترك الفتاة الوقحة لتنفس عن غضبها المكبوت وتقول لك
ما شأنك أنت بما أكتب .. أو بما أرسم .. أو بما أحلم ؟؟
أكتب كلمات مبعثرة ليس لها معنى  ، وأرسم عالمى الافتراضى كما يحلو لى
أردت أن تقرأنى وتكتشف ما أخفيه .. فجعلتك تتوهم أننى كالبحر فى غموضه يخفى الكثييير من الأسرار
ونجحت أن أكون تلك الفتاة الغامضة .. السهل الممتنع الذى أصابك بالحيرة حتى ضعت فى دهاليز عالمى
و أصبحت تهذى كالمجنون  عالمك غامض وملىء بالخفايا وستحاول بكل قوتك أن تفك مغاليق أسرارى

أتعلم أننى أشعر بالشفقة عليك 
أكنت تظن أن لطافتك الزائدة ستخدعنى ، وتوددك المبالغ فيه سيخترقنى ؟؟
يا سيدى لا تكلف نفسك عناء البحث ودعنى أقتبس لك بعض كلمات ( محمد حامد ) من رواية بورتريه الوحدة
( كل ما أخفيه لا يعدو عن كونه تفاصيل دقيقة سخيفة مهملة مملة تتشابه مع تفاصيلك السخيفة التى تخفيها )

ودعنى أسألك سؤال مستفز
الغموض ..
هل هو يستهويك الى هذه الدرجة ؟؟
هل هو يستحق كل هذا البحث والتحرى ؟؟

( ملحوظة : لا أنتظر ردك السخيف على سؤالى المستفز .. من الأفضل أن تحتفظ به لنفسك ..  لأننى لا أهتم بقرائتك ولن أكلف نفسى عناء التلصص حول تفاصيلك السخيفة التى تخفيها )

امضاء :
فتاة ( ضع أى لفظ تحب)